ແຜ່ນດິນໄຫວທີ່ມີຄວາມແຮງ 6.0
ຣິກເຕີໄດ້ສັ່ນສະເທືອນພາກເໜືອ
ຂອງອີຕາລີ ເຮັດໃຫ້ປະຊາຊົນ
ຢ່າງໜ້ອຍ 4 ຄົນເສຍຊີວິດ ບາດ
ເຈັບຫຼາຍສິບຄົນ ແລະສ້າງຄວາມ
ເສຍຫາຍໃຫ້ແກ່ຕຶກອາຄານຫຼາຍ
ຫຼັງ.
ກົມສໍາຫຼວດທໍລະນີວິທະຍາ
ສະຫະລັດກ່າວວ່າ ແຜ່ນດິນໄຫວ
ມີຈຸດໃຈກາງຢູ່ເລິກຈາກໜ້າດິນ
ລົງໄປປະມານ 5 ຫຼັກກິໂລແມັດ
ຫ່າງຈາກເມືອງ Bologna ໃນພາກຕາເວັນຕົກສຽງເໜືອຂອງປະເທດ ປະມານ 35 ຫຼັກ ໄປທາງທິດຕາເວັນຕົກສຽງເໜືອ.
ແຜ່ນດິນໄຫວດັ່ງກ່າວເກີດຂຶ້ນເວລາປະມານ 4:00 ໂມງເຊົ້າຕາມເວລາໃນທ້ອງຖິ່ນ ເຮັດໃຫ້ພວກບ້ານຊາວເມືອງແລ່ນແຕກຕື່ນອອກໄປສູ່ຖະໜົນຫົນທາງສາຍຕ່າງໆ.
ປະຊາຊົນ 3 ຄົນເສຍຊີວິດເວລາໂຮງງານຜະລິດດິນກະເບື້ອງແຫ່ງນຶ່ງພັງທະລາຍລົງທີ່ເມືອງ Sant’ Agostino ແລະອີກຄົນນຶ່ງເສຍຊີວິດທີ່ເມືອງ Ponte Rodon do Bondeno ຢູ່ທາງທິດຕາເວັນຕົກສຽງ ເໜືອຂອງເມືອງ Ferrara ໃກ້ໆກັນນັ້ນ.
ໄດ້ມີແຜ່ນດິນໄຫວຕິດຕໍ່ກັນມາຫຼາຍບັ້ນ ຫຼັງຈາກເກີດແຜ່ນດິນໄຫວຄັ້ງໃຫຍ່ເທື່ອທໍາອິດນັ້ນແລ້ວ. ແຜ່ນດິນໄຫວຄັ້ງຮ້າຍແຮງທີ່ສຸດທີ່ຕິດຕາມມາ ແມ່ນວັດແທກໄດ້ 5.1 ຣິກເຕີ ໂດຍໄດ້ສັ່ນສະເທືອນຂົງເຂດດັ່ງກ່າວປະມານ 1 ຊົ່ວໂມງຕໍ່ມາ.
ຖະໜົນຫົນທາງແມ່ນເຕັມໄປດ້ວຍເສດສິ່ງຂອງຫັກພັງແລະຜູ້ຄົນໃນຕອນເຊົ້າວັນອາທິດ ໃນຂະນະທີ່ປະຊາຊົນໃນທ້ອງຖິ່ນພາກັນປະເມິນເບິ່ງຄວາມເສັຍຫາຍຂອງບ້ານເຮືອນແລະທຸລະກິດຂອງເຂົາເຈົ້ານັ້ນ. ຈອມແຫຼມໆຂອງໂບດເກົ່າແກ່ຫລາຍແຫ່ງ ແລະຕຶກອາຄານສູງໆຫລາຍຫລັງໄດ້ພັງທະລາຍລົງເຊ່ນກັນ.