ລິ້ງ ສຳຫລັບເຂົ້າຫາ

ອິສຣາແອລ ສົ່ງທະຫານ ເຂົ້າໄປໃນເຂດກາຊາ ເພີ່ມຂຶ້ນອີກ (ວີດີໂອ/ສະໄລດ໌)


ຊາວປາແລສໄຕນ໌ ແລ່ນຫາບ່ອນລີ້ ຫຼັງຈາກການໂຈມຕີທາງອາ ກາດຂອງອິສຣາແອລ ໃສ່ຄຸ້ມShijaiyah ຂອງເມືອງ Gaza City, ວັນທີ 20 ກໍລະກົດ 2014.

ອິສຣາ​ແອ​ລ ​ໄດ້​ເພີ່ມ​ທະວີການ​ບຸກ​ໂຈມ​ຕີ​ທາງ​ພາກ​ພື້ນ​ດິນ​ຂອງ
​ຕົນ​ຕໍ່​ເຂດ​ກາຊາ​ທີ່​ຖືກ​ປິດ​ລ້ອມ ບ່ອນ​ທີ່​ພວກ​ປາ​ແລ​ສ​ໄຕ​ນ໌ຖືກ​
ສັງຫານ​ເພີ່ມ​ຂຶ້ນ​ໃນ​ວັນອາທິດ​ມື້​ນີ້ ​ໃນ​ຂະນະ​ທີ່​ປະຊາຊົນ​ຫຼາຍ
​ພັນ​ຄົນ​ພາກັນ​ຫຼົບໜີ​ຈາກເຂດຕ່າງໆ ​ທີ່​ຖືກ​ໂຈມ​ຕີຢ່າງ​ໜັກ​ທີ່​
ສຸດ​ນັ້ນ.

ກອງທັບ​ອິສຣາ​ແອ​ລ ກ່າວ​ໃນ​ວັນ​ອາທິດ​ມື້​ນີ້​ວ່າ ຕົນ​ໄດ້​ສົ່ງ​
ທະຫານ​ເພີ່ມອີກ ​ເຂົ້າ​ໄປ​ຍັງ​ດິນ​ແດນ​ຂອງ​ພວກ​ປາ​ແລ​ສ​ໄຕ​ນ໌.

ບັນດາ​ເຈົ້າ​ໜ້າ​ທີ່​ສາທາລະນະ​ສຸກ​ຂອງ​ປາ​ແລ​ສ​ໄຕ​ນ໌ ກ່າວ​ວ່າ
ຈຳນວນຜູ້​ເສຍ​ຊີວິດ​ໃນ​ການບຸກ​ໂຈມ​ຕີ​ຂອງອິສຣາ​ແອ​ລ ມາ​ໄດ້​ເກືອບ 2 ສັບປະດາ ​ໄດ້​ເພີ່ມ​ຂຶ້ນ​ເປັນ 400 ຄົນ​ແລ້ວ ສ່ວນ​ຫຼາຍ​ແມ່ນ​ພວກ​ພົນລະ​ເຮືອນ ຊຶ່ງ​ຢ່າງ​ນ້ອຍ 40 ຄົນ
​ໄດ້​ເສຍ​ຊີວິດ​ໄປ​ໃນ​ວັນ​ອາທິດ​ມື້​ນີ້. ​ແຕ່​ຈຳນວນ​ດັ່ງກ່າວ ​ຍັງ​ບໍ່​ທັນ​ໄດ້​ຮັບການ​ຢືນຢັນ​ເທື່ອ.

ອິສຣາ​ແອ​ລ ກ່າວ​ວ່າ ພົນລະ​ເຮືອນ 2 ຄົນ​ແລະ​ທະຫານ 5 ຄົນ ​ໄດ້​ເສຍ​ຊີວິດ​ໄປ ນັບ​
ແຕ່​ຄວາມ​ຮຸນ​ແຮງ​ໄດ້​ເກີດ​ຂຶ້ນ​ໃນ​ວັນ​ທີ 8 ກໍລະກົດ ນີ້.

ໃນ​ວັນ​ອາທິດ​ມື້​ນີ້ ທັງ​ສອງ​ຝ່າຍ ​ໄດ້​ຕົກລົງ​ກັນ​ ​ຢຸດ​ຍິງ​ກັນ​ເປັນ​ເວລາ 2 ຊົ່ວ​ໂມງ​ ເພື່ອ​
ມະນຸດສະທຳ ​ໃນ​ເຂດ​ນຶ່ງ​ທີ່​ຖືກ​ໂຈມ​ຕີ​ໜັກ​ໃນເຂດ​ກາ​ຊາ​ນັ້ນ.

ການ​ຢຸດ​ຍິງ​ດັ່ງກ່າວ ​ທີ່ຮ້ອງ​ຂໍ​ໄປໂດຍ​ຄະນະ​ກຳມະການ​ສະພາກາ​ແດງ​ສາກົນ ຈະ​ດຳ​ເນີ​ນ
ໄປ ໃນ​ຄຸ້ມ Shijaiyah ຮອດ​ເວລາ 12 ໂມງ 30 ຕາມ​ເວລາ​ສາກົນ ກໍ​ຄື 7 ​ໂມງ​ເຄິ່ງຕອນ​ແລງ ຢູ່​ປະ​ເທດ​ລາວ.


ພວກ​ປາ​ແລ​ສ​ໄຕ​ນ໌ກຸ່ມ​ໃຫຍ່ໆ​ຫຼາຍກຸ່ມ ​ໄດ້​ພາກັນ​ໜີ​ຈາກ​ພາກເໜືອ​ຂອງ​ເຂດ​ກາຊາ​ທີ່​ຖືກ​ໂຈມ​ຕີ​ໜັກ​ໃນ​ວັນ​ອາທິດ​ມື້​ນີ້ ຫຼັງ​ຈາກ​ຖືກ​ປືນ​ໃຫຍ່​ຂອງ​ອິສຣາ​ແອ​ລລະດົມ​ຍິງ​ໃສ່ ຢ່າງ​ໜັກ​ ໃນ​ຄືນ​ຜ່ານ​ມາ​ນີ້.

ຄາດ​ກັນ​ວ່າ ທ່ານ​ພັນ​ກີ​ມູນ ​ເລຂາທິການ​ໃຫຍ່​ສະຫະ​ປະຊາ​ຊາດ ຈະ​ເດີນທາງ​ໄປ​ຍັງ​ພາກ​ຕາ​ເວັນ​ອອກ​ກາງ​ໃນ​ວັນ​ອາທິດ​ມື້​ນີ້ ​ເພື່ອ​ຊອກ​ຫາ​ຊ່ອງ​ທາງ​ຍຸດຕິ​ຄວາມ​ຮຸນ​ແຮງ ລະຫວ່າງ​ອິສຣາ​ແອ​ລ​ແລະ​ປາ​ແລ​ສ​ໄຕ​ນ໌ນັ້ນ.

ສະຫະ​ປະຊາ​ຊາດ ກ່າວ​ວ່າ ທ່ານ​ພັນ​ກີ​ມູນ ຈະ​ຢຸດ​ແວ່​ທຳ​ອິດ​ທີ່ Doha ​ແລະ​ຫຼັງ​ຈາກ​ນັ້ນ​ຈະ​ເດີນທາງ​ໄປ​ຢ້ຽມຢາມ Kuwait City, Cairo, Jerusalem, Ramallah ​ແລະ​ Amman.

ບັນດາ​ເຈົ້າ​ໜ້າ​ທີ່​ກ່າວ​ວ່າ ການ​ເດີນທາງ​ຂອງ​ທ່ານ​ພັນ​ກີ​ມູນ ​ເປັນ​ພາກສ່ວນ​ນຶ່ງ​ຂອງ​ຄວາມ​ພະຍາຍາມ​ຂອງ​ທ່ານ ​ເພື່ອ​ຊຸກຍູ້​ໃຫ້​ມີການ​ຢຸດ​ຍິງ​ທີ່​ໝັ້ນຄົງ ລະຫວ່າງ​ອິສຣາ​ແອ​ລ ​ແລະ​ພວກ​ຫົວ​ຮຸນ​ແຮງ​ ​ຮາ​ມັສ.


ອົງການ​ຂ່າວ Reuters ລາຍ​ງານ​ວ່າ ທ່ານ​ພັນ​ກີ​ມູນ ຈະ​ພົບ​ປະ​ກັບ​ປະທານາທິບໍດີ Mah
moud Abbas ​ແຫ່ງ​ປາ​ແລ​ສ​ໄຕ​ນ໌ ​ໃນ​ວັນ​ອາທິດ​ມື້​ນີ້ ຢູ່ Qatar ບ່ອນ​ທີ່​ທ່ານ Abbas
ມີ​ໝາຍ​ກຳນົດ​ທີ່​ຈະ​ພົບປະ​ກັບ​ທ່ານ Khaled Meshaal ຜູ້ນຳ​ກຸ່ມ​ຮາ​ມັສ ​ເພື່ອ​ໂອ້​ລົມ​
ສົນທະນາ​ກັນ​ເລື້ອງ​ການ​ຢຸດ​ຍິງ ທີ່​ອີ​ຈິບ​ສະ​ເໜີ​ຂຶ້ນ​ນັ້ນ.

ອິສຣາ​ແອ​ລ ​ໄດ້​ເປີດ​ສາກ​ທຳ​ການ​ບຸກ​ໂຈມ​ຕີ​ທາງ​ພາກ​ພື້ນ​ດິນ ​ເຂົ້າ​ໄປ​ໃນ​ເຂດ​ກາຊາ​ທີ່ຢູ່​ພາຍ​ໃຕ້​ການ​ປົກຄອງ​ຂອງ​ກຸ່ມ​ຮາ​ມັສ ​ໃນ​ແລງ​ວັນ​ພະຫັດແລ້ວ​ນີ້ ຫຼັງ​ຈາກ​ການ​ເຕືອນ​ຊ້ຳ​ແລ້ວ​ຊ້ຳ​ອີກ ​ແລະ​ການ​ໂຈມ​ຕີ​ທາງ​ອາກາດ ບໍ່​ໄດ້ເຮັດ​ໃຫ້​ກຸ່ມ​ຮາ​ມັສ ຢຸດເຊົາ​ຍິງຈະ​ຫຼວດ​ມາໃສ່​ຫົວ ​ເມືອງ​ຕ່າງໆ​ຂອງ​ອິສຣາ​ແອ​ລ.

ກອງທັບອິສຣາ​ແອ​ລ ກ່າວ​ວ່າ ຕົນ​ໄດ້​ໂຈມ​ຕີ​ເປົ້າ​ໝາຍ​ປະມານ 200 ​ແຫ່ງ​ຂອງ​ກຸ່ມ​ຮາ​ມັສ ນັບ​ແຕ່​ການ​ປະຕິບັດ​ງານ​ເລີ້ມ​ຂຶ້ນ. ການ​ໂຈມ​ຕີ​ດັ່ງກ່າວ​ແມ່ນ​ຮວມທັງອຸ​ໂມງ​ຂອງ​ພວກ​ຫົວ​ຮຸນ​ແຮງ​ຫຼາຍ​ກວ່າ 20 ​ແຫ່ງ ທີ່​ພວກ​ເຂົາ​ໃຊ້​ເພື່ອ​ລັກລອບ​ຂົນ​ອາວຸດ​ແລະ​ວັດຖຸ​ລະ​ເບີດ​ຕ່າງໆ​ເຂົ້າ​ມາ​ນັ້ນ.

XS
SM
MD
LG