ການສູ້ລົບກັນລະຫວ່າງ ກອງທັບອິສຣາແອລ ກັບກຸ່ມຮາມັສ
ຍັງສືບຕໍ່ມາໃນວັນເສົາມື້ນີ້ ຢູ່ຕາມເຂດກາຊາ ແລະເຈົ້າໜ້າທີ່
ການແພດຂອງປາແລສໄຕນ໌ກ່າວວ່າ ມີຢ່າງນ້ອຍ 3 ຄົນເສຍ
ຊີວິດ.
ການຕໍ່ສູ້ກັນ ທີ່ໄດ້ເລີ້ມຄືນໃໝ່ໃນວັນສຸກວານນີ້ ຫຼັງຈາກທີ່
ມີການຢຸດຍິງກັນເປັນເວລາ 3 ມື້ ໃນສົງຄາມທີ່ມີມາໄດ້ນຶ່ງ
ເດືອນແລ້ວນັ້ນ ໄດ້ເປັນການທັບມ້າງຄວາມພະຍາຍາມທີ່
ນຳພາໂດຍອີຈິບ ເພື່ອຈະໃຫ້ມີການຢຸດຍິງລະຍະຍາວລະ
ຫວ່າງຄູ່ ປໍລະປັກທີ່ຂົມຂື່ນດັ່ງກ່າວ.
ອິສຣາແອລ ໄດ້ຖະຫລົ່ມເຂດກາຊາ ດ້ວຍການໂຈມຕີທາງອາກາດຫຼາຍໆບັ້ນ ໃນວັນສຸກ
ວານນີ້ ບໍ່ດົນຫຼັງຈາກທີ່ພວກຮາມັສເລີ້ມຍິງຈະຫລວດຫຼາຍໆລູກໃສ່ອິສຣາແອລຄືນໃໝ່
ລຸນຫຼັງທີ່ການເຈລະຈາກັນ ຢູ່ນະຄອນຫລວງໄຄໂຣຂອງອີຈິບ ເພື່ອ ຈະຂະຫຍາຍການ
ຢຸດຍິງອອກໄປຕື່ມອີກນັ້ນ ບໍ່ສຳເລັດຜົນ.
ກອງທັບອິສຣາແອລ ກ່າວຫາວ່າພວກຮາມັສຢູ່ໃນກາຊາ ວ່າ
ໄດ້ລະເມີດການຢຸດຍິງລະຍະ 72 ຊົ່ວໂມງນັ້ນ ຫຼາຍຊົ່ວໂມງ
ກ່ອນທີ່ຈະໝົດເວລາລົງ ໃນຕອນເຊົ້າຂອງວັນສຸກວານນີ້.
ໂຄສົກຂອງລັດຖະບານອິສຣາແອລ ກ່າວວ່າ ພວກຮາມັສ
ໄດ້ແນການໂຈມຕີໃສ່ບັນດາພົນລະເຮືອນ ຢ່າງບໍ່ເລືອກໜ້າ.
ທະຫານອິສຣາແອລ ຈຳນວນ 64 ຄົນ ແລະພົນລະເຮືອນ 3
ຄົນໄດ້ຖືກຂ້າຕາຍໃນການຕໍ່ສູ້ກັນນີ້. ການເສຍຊີວິດສ່ວນ
ໃຫຍ່ ແມ່ນເກີດຂຶ້ນ ໃນລະຫວ່າງການບຸກເຂົ້າໄປຂອງກອງ
ທະຫານອິສຣາແອລ ເພື່ອທຳລາຍອຸມມົງຂ້າມຊາຍແດນ ທັງ
ຫຼາຍ ຂອງພວກຮາມັສນັ້ນ.
ຊາວປາແລສໄຕນ໌ເກືອບເຖິງ 1,900 ຄົນ ສ່ວນໃຫຍ່ແມ່ນພົນລະເຮືອນ ໄດ້ເສຍຊີວິດ
ເຊັ່ນກັນ.
ພວກ ຮາມັສກ່າວວ່າ ພວກເຂົາຈະບໍ່ຢຸດເຊົາ ການຕໍ່ສູ້ຈົນກວ່າອິສຣາແອລຈະຍົກເລີກ
ການປິດລ້ອມເຂດກາຊາ ມາເປັນເວລາ 7 ປີແລ້ວນັ້ນ ທີ່ໄດ້ເຮັດໃຫ້ຊາວກາຊາ ອອກ
ຈາກເຂດກາຊາໄປບໍ່ໄດ້. ອິສຣາແອລກ່າວວ່າ ພວກຕົນຈະຢຸດຕິການປິດລ້ອມ ຫຼັງຈາກ
ທີ່ກາຊາບໍ່ມີພວກນັກລົບແລ້ວເທົ່ານັ້ນ ຊຶ່ງເປັນເງື່ອນໄຂ ທີ່ຮາມັສໄດ້ປະຕິເສດ.
