ລິ້ງ ສຳຫລັບເຂົ້າຫາ

ກຳລັງອີຣັກ ເລີ້ມບຸກໂຈມຕີ ຄັ້ງໃຫຍ່ ເພື່ອຍຶດ​ ເອົາເມືອງ Fallujah ຈາກລັດອິສລາມ


ກອງກຳລັງຮັກສາຄວາມປອດໄພຂອງອີຣັກ ໜູນຫຼັງໂດຍ ກຳລັງນັກລົບ ນິກາຍ Shi'ite ແລະ ນິກາຍ Sunni ທີ່ສະໜັບສະໜູນລັດຖະບານອີຣັກ ກຽມພ້ອມທີ່ຈະໂຈມຕີ ທີ່ໝັ້ນຂອງກຸ່ມລັດອິສລາມ ໃນເມືອງ Fallujah, ຫ່າງຈາກນະຄອນຫຼວງແບັກແດັດ ກ້ຳຕາເວັນຕົກ 65 ກິໂລແມັດ, ວັນຈັນ ທີ 13 ກໍລະກົດ 2015.

ກອງກຳລັງຂອງອີຣັກ ໄດ້ເປີດສາກການບຸກໂຈມຕີຄັ້ງໃຫຍ່ ເພື່ອຍຶດ​ ເອົາເມືອງ Fallujah ຄືນ ຊຶ່ງ​ເປັນ​ທີ່​ໝັ້ນອັນ​ເຂັ້ມ​ແຂງ​ຂອງກຸ່ມລັດອິສລາມ ​ເຮັດ​ໃຫ້ການປິດລ້ອມເມືອງດັ່ງກ່າວ ເປັນເວລາຫຼາຍເດືອນ ສິ້ນສຸດ​ລົງ.

Fallujah ເປັນເມືອງທຳອິດ ຢູ່ໃນອີຣັກ ທີ່ຕົກເປັນຂອງພວກຫົວຮຸນແຮງຈັດລັດອິສລາມ ໃນເດືອນມັງກອນ ປີ 2014 ແລະ ກຸ່ມດັ່ງກ່າວໄດ້ຕັ້ງຄ້າຍ​ຢ່າງ​ເຂັ້ມ​ແຂງ​ຢູ່​ໃນ​ເມືອງ​ນີ້.

ນາຍົກລັດຖະມົນຕີ ອີຣັກ ທ່ານ Haider al-Abadi ກ່າວຖະແຫລງ ຕໍ່ສື່ມວນຊົນ ໃນລະຫວ່າງ ກອງປະຊຸມຖະແຫລງຂ່າວ.

ນາຍົກລັດຖະມົນຕີ ອີຣັກ ທ່ານ Haider al-Abadi ກ່າວຖະແຫລງ ຕໍ່ສື່ມວນຊົນ ໃນລະຫວ່າງ ກອງປະຊຸມຖະແຫລງຂ່າວ.

ນາຍົກລັດຖະມົນຕີ ອີຣັກ ທ່ານ Haider al-Abadi ໄດ້ກ່າວວ່າ ກອງກຳລັງຂອງອີຣັກ ໄດ້ “ເຂົ້າສູ່ຊ່ວງເວລາ ຂອງການ​ໄດ້​ຮັບໄຊ ຊະນະທີ່ຍິ່ງໃຫຍ່ແລ້ວ.”

ທ່ານ Abadi ໄດ້ປະກາດຜ່ານທາງໂທລະພາບທົ່ວປະເທດ ໃນຕອນຄ່ຳວັນອາທິດວານນີ້ ວ່າ “ທຸງຊາດຂອງອີຣັກ ຈະຖືກຊັກຂຶ້ນ ຢູ່​ທີ່​ເມືອງ Fallujah.”

ນາຍົກລັດຖະມົນຕີ ຜູ້ທີ່ສູ້ຊົນຕໍ່ການຕຳນິ ໂດຍ ບັນດາຜູ້ບັນຊາການ ທະຫານ ທີ່ສຳຄັນໆ ຂອງປະເທດ ແລະ ກອງກຳລັງຕໍ່ຕ້ານພວກກໍ່ການຮ້າຍ ຢືນຢູ່ຄຽງຂ້າງ ໃນຂະນະທີ່ ທ່ານໄດ້ກ່າວຄຳຖະແຫລງຢູ່ນັ້ນ.

ທະຫານຂອງອີຣັກ ໄດ້ຮຽກຮ້ອງ​ໃຫ້ພົນລະເມືອງ ທີ່ຕົກຄ້າງຢູ່ໃນເມືອງດັ່ງກ່າວ ໃຫ້ປັກທຸງ ສີຂາວ ໝາຍສະຖານທີ່ຂອງພວກຕົນ.

ແຜນທີ່ ປະເທດອີຣັກ ສະແດງໃຫ້ເຫັນ ເຂດເມືອງ Fallujah

ແຜນທີ່ ປະເທດອີຣັກ ສະແດງໃຫ້ເຫັນ ເຂດເມືອງ Fallujah

ມີພຽງ​ບໍ່​ເທົ່າ​ໃດ​ຄອບຄົວ ທີ່ສາມາດຫລົບໜີອອກ​ໄປໄດ້ ຈາກເມືອງດັ່ງກ່າວ ໃນ​ໄລຍະ ສອງສາມເດືອນທີ່ຜ່ານມາ ເຖິງແມ່ນວ່າ ລັດຖະ ບານພະຍາຍາມ ເປີດເສັ້ນທາງ ທີ່ ປອດໄພຫຼາຍສາຍກໍ່ຕາມ. ບາງສ່ວນໄດ້ຖືກຢຸດໂດຍພວກຫົວຮຸນແຮງລັດອິສລາມ ສ່ວນພວກຄົນອື່ນໆ ໄດ້ຖືກຂ້າຕາຍໂດຍລະເບີດ ທີ່ໄດ້ຫ້າງໄວ້ຕາມເສັ້ນທາງຕ່າງໆ.

ປະຕິບັດການ ເພື່ອຍຶດ​ເອົາເມືອງ Fallujah ຄືນ ແມ່ນໄດ້ເປັນທີ່ຄາດກັນໄວ້ແລ້ວ ທີ່ ຈະປະກອບດ້ວຍກອງກຳລັງຂອງອີຣັກ ຫຼາຍພາກສ່ວນ ລວມທັງກອງທັບບົກ ໜ່ວຍ ທະຫານຕໍ່ຕ້ານພວກກໍ່ການຮ້າຍ ພວກນັກລົບອາສາສະໝັກນິກາຍ Sunni ແລະ ພວກທະຫານບ້ານທີ່ເກັ່ງກ້າ ນິກາຍ Shi’ite.

ເມືອງ Fallujah ດັ່ງເດີມແມ່ນເປັນທີ່ໝັ້ນຂອງນິກາຍ Sunni.

ການໂຈມຕີທາງອາກາດຂອງສະຫະລັດ ໄດ້ຖະຫລົ່ມ ເປົ້າໝາຍຕ່າງໆຂອງລັດອິສລາມ ທັງຢູ່ໃນ ແລະ ອ້ອມແອ້ມເມືອງດັ່ງກ່າວ ເປັນເລລາຫຼາຍສັບປະດາມາ​ແລ້ວ.

ອ່ານຂ່າວນີ້ຕື່ມ ເປັນພາສາອັງກິດ

XS
SM
MD
LG