ລະເບີດໄດ້ແຕກຂຶ້ນຢູ່ໃນຫຼາຍໆຫົວເມືອງທົ່ວອີຣັກ ໃນຂະນະຊາວມຸສລິມ ນິກາຍ Shi’ites ໄດ້ເຕົ້າໂຮມກັນ ເພື່ອງານແຫ່ທາງສາສະໜາປະຈໍາປີ ຊຶ່ງບັນດາເຈົ້າໜ້າທີ່ອີຣັກກ່າວວ່າ ຢ່າງໜ້ອຍ 46 ຄົນເສຍຊີວິດ ໃນເຫດ ການທີ່ຮ້າຍແຮງສຸດ ເຫດການນຶ່ງຂອງຄື້ນຟອງຄວາມຮຸນແຮງໃນປະເທດໃນປີນີ້.
ເຈົ້າໜ້າທີ່ກ່າວອີກວ່າ ລະເບີດສີ່ລູກທີ່ໄດ້ແນເປົ້າໃສ່ພວກສະແຫວງບຸນຊາວ Shi’ite ທີ່ຢູ່ໃນແລະອ້ອມແອ້ມນະຄອນຫຼວງ Baghdad ໄດ້ສັງ ຫານຢ່າງໜ້ອຍ 19 ຄົນ ໃນຂະນະທີ່ລົດລະເບີດສອງຄັນ ເຮັດໃຫ້ມີຜູ້ເສຍຊີວິດຢ່າງໜ້ອຍຫ້າຄົນ ຢູ່ທີ່ເມືອງ Balad ທີ່ມີຊາວມຸສລິມນິກາຍ Shi’ite ອາໄສຢູ່ເປັນສ່ວນໃຫຍ່ທາງກໍ້າເໜືອຂອງນະຄອນຫຼວງອີຣັກນັ້ນ.
ເຈົ້າໜ້າທີ່ກ່າວວ່າ ລະເບີດໄດ້ແຕກຂຶ້ນຢູ່ໃນເມືອງ Hilla ທາງພາກກາງ ຂອງປະເທດ ທີ່ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 21 ຄົນ. ແລະທີ່ ເມືອງ Kirkuk ທາງພາກເໜືອຂອງປະເທດໄດ້ສັງຫານຢ່າງໜ້ອຍນຶ່ງຄົນ.
ເຫດການລະເບີດອື່ນໆອີກທີ່ລາຍງານວ່າເກີດຂຶ້ນຢູ່ຫົວເມືອງຕ່າງໆ ເຊັ່ນເມືອງ Taji, Baquba, Azizyah ແລະເມືອງ Karbala
ພວກສະແຫວງບຸນຊາວ Shi’ite ໄດ້ເຕົ້າໂຮມກັນ ເພື່ອເຂົ້າຮ່ວມຂະບວນແຫ່ລະນຶກເຖິງການເສຍຊີວິດຂອງອີໝຳໃນສັດຕະວັດທີ່ 8 ຊຶ່ງເປັນທີ່ສັກກາລະບູຊານັ້ນ. ພວກກະບົດທີ່ນັບຖືສາສະໜາອິສລາມ ນິກາຍຊຸນນີ ໄດ້ເປັນວາງລະເບີດຊໍ້າແລ້ວຊໍ້າອີກ ຕໍ່ຂະບວນແຫ່ດັ່ງກ່າວໃນອະດີດຜ່ານມາ.
ເຫດການລະເບີດບັ້ນລ່າສຸດ ຍັງບັງເອີນເກີດຂຶ້ນພ້ອມກັບວິກິດການການ ເມືອງຂອງອີຣັກ ຊຶ່ງສະມາຊິກສະພາຊາວຊຸນນີແລະຊາວເຄີຣ໌ດກຸ່ມນ້ອຍ ໄດ້ພະຍາຍາມຫາທາງປົດນາຍົກລັດຖະ ມົນຕີ Nour al-Maliki ທີ່ນັບຖື
ນິກາຍ Shi’ite ນັ້ນ ອອກຈາກຕໍາແໜ່ງ ໂດຍກ່າວຫາທ່ານມາລິກີວ່າ ເປັນຜູ້ ຜູກຂາດອໍານາດໃຫ້ຢູ່ໃນກໍາມືຂອງ Shi’ite ຕະຫລອດໄປ.
ຄວາມຮຸນແຮງໃນອີຣັກໄດ້ຫຼຸດລົງຢ່າງຫຼວງຫຼາຍ ນັບຕັ້ງແຕ່ກ້າວຂຶ້ນເຖິງ ຈຸດສຸດຂີດໃນປີ 2006 ຫາ ປີ 2007 ແຕ່ການໂຈມຕີຕ່າງໆແມ່ນຖືເປັນເລຶ່ອງທໍາມະດາ ໂດຍສະເພາະໃນນະຄອນຫຼວງ Baghdad.