ຫຼັງຈາກການເຈລະຈາເປັນເວລາສອງປີ, ອິຣ່ານ ແລະ ບັນດາຫົກ
ປະເທດມະຫາອຳນາດຂອງໂລກ ໄດ້ບັນລຸການຕົກລົງກັນແນໃສ່
ການປ້ອງກັນ ບໍ່ໃຫ້ ອິຣ່ານ ຈາກການພັດທະນາອາວຸດນິວເຄລຍ,
ເພື່ອແລກປ່ຽນກັບການຍົກເລີກມາດຕະການລົງໂທດສາກົນທີ່ໄດ້
ເຮັດໃຫ້ເສດຖະກິດ ອິຣ່ານ ເປັນອຳມະພາດ ແລະ ໃນຫຼາຍທາງ,
ກໍໄດ້ເຮັດໃຫ້ປະເທດດັ່ງກ່າວຢູ່ຢ່າງໂດດດ່ຽວນັ້ນ.
ນັກຂ່າວ ວີໂອເອ Heather Murdock ມີລາຍງານຈາກບ່ອນເຈລະຈາ ໃນນະຄອນວຽນນາ ເຊິ່ງ ພຸດທະສອນ ຈະນຳລາຍລະ ອຽດມາສະເໜີທ່ານ.
ບັນດານັກການທູດຈາກ ອິຣ່ານ, ສະຫະລັດ, ຈີນ, ຣັດເຊຍ, ເຢຍຣະມັນ, ຝຣັ່ງ, ອັງກິດ ແລະ ສະຫະພາບ ຢູໂຣບ ໄດ້ປະກາດໃນວັນອັງຄານທີ່ຜ່ານມາວ່າ ຫຼັງຈາກການເຈລະຈາຫຼາຍປີ ໃນທີ່ສຸດພວກເຂົາກໍໄດ້ບັນລຸຂໍ້ຕົກລົງ.
ບັນດາເຈົ້າໜ້າທີ່ພາກັນຮຽກມັນວ່າ ເປັນ “ຂໍ້ຕົກລົງທີ່ດີ” ຕາມທີ່ທຸກໆຝ່າຍຕ້ອງການ.
ທ່ານ John Kerry ລັດຖະມົນຕີຕ່າງປະເທດ ສະຫະລັດ ໄດ້ກ່າວວ່າ “ການຜິດຂ້ອງຕ້ອງ ຖຽງຂອງພວກເຮົາແມ່ນບໍ່ເຄີຍມີກັບປະຊາຊົນ ອິຣ່ານ ແລະ ພວກເຮົາຮູ້ວ່າມາດຕະ ການລົງໂທດທີ່ກ່ຽວພັນກັບນິວເຄລຍ ໄດ້ສົ່ງຜົນກະທົບຕໍ່ຊີວິດຂອງປະຊາຊົນ ອິຣ່ານ ແມ່ນເລິກເຊິ່ງຊ່ຳໃດ. ຂ້າພະເຈົ້າຂໍສະແດງຄວາມຂອບໃຈສຳລັບການບັນລຸຂໍ້ຕົກລົງໃນມື້ນີ້ ທີ່ຈະເລີ່ມປ່ຽນ, ການຕອບແທນສຳລັບການປ່ຽນແປງທີ່ໜ້າປະທັບໃຈທີ່ ອິຣ່ານ ໄດ້ຍອມຮັບສຳລັບໂຄງການນິວເຄລຍ ຂອງພວກເຂົາ.”
ທ່ານ Kerry ເວົ້າວ່າ ຖ້າບໍ່ມີຂໍ້ຕົກລົງດັ່ງກ່າວ, ອິຣ່ານ ແມ່ນມີເວລາອີກພຽງແຕ່ສອງສາມເດືອນກໍຈະມີວັດຖຸດິບພຽງພໍ ເພື່ອສ້າງລະເບີດນິວເຄລຍ 10 ລູກ. ແຕ່ວ່າພາຍໃຕ້ຂໍ້ຕົກລົງນີ້, ທ່ານກ່າວວ່າ, ມັນຈະເປັນເວລາໜຶ່ງທົດສະວັດກ່ອນທີ່ ອິຣ່ານ ຈະມີວັດຖຸດິບຄົບພໍທີ່ຈະສ້າງລະເບີດລູກໜຶ່ງພາຍໃນເວລາປີດຽວ.
ອິຣ່ານ ໃຫ້ການຢືນຢັນວ່າ ໂຄງການນິວເຄລຍຂອງພວກເຂົາແມ່ນຕະຫຼອດມາ ແລະ ກໍຈະມີ ຈຸດປະສົງໃນທາງສັນຕິສະເໝີ.
ທ່ານ ນາງ Federica Mogherini ຈາກສະຫະພາບ ຢູໂຣບ ໄດ້ກ່າວວ່າ “ອິຣ່ານ ໄດ້ຢືນຢັນວ່າ ບໍວ່າໃນກໍລະນີໃດໆ ອິຣ່ານ ຈະບໍ່ຊອກສະແຫວງຫາ ຫຼືໃຫ້ໄດ້ມາ ອາວຸດນິວເຄລຍ ຢູ່ໃນຄວາມ ຄອບຄອງ.”
ແຕ່ວ່າບັນດາຜູ້ນຳໂລກຍັງຢ້ານວ່າ ຈະເກີດບັນຫາຄວາມເຄັ່ງຕຶງ ໃນ ພາກຕາເວັນອອກກາງ ແລະ ຢ້ານວ່າຄວາມຫວາດລະແວງ ລະຫວ່າງ ອິຣ່ານ ແລະ ຄູ່ແຂ່ງເຊັ່ນ ຊາອູດິ ອາເຣເບຍ ແລະ ອິສຣາແອລ ອາດນຳພາໃຫ້ເກີດຄວາມຂັດແຍ່ງທາງການທະຫານຖ້າ ອິຣ່ານ ສ້າງຄັງ ລະເບີດນິວເຄລຍຂຶ້ນມາ.
ປະທານາທິບໍດີ ສະຫະລັດ ທ່ານ ບາຣັກ ໂອບາມາ ກ່າວວ່າ “ເວົ້າງ່າຍໆ, ການບໍ່ມີຂໍ້ຕົກ ລົງ ໝາຍເຖິງໂອກາດອັນໃຫຍ່ຫຼວງ ຂອງການເກີດສົງຄາມຫຼາຍຍິ່ງຂຶ້ນ ໃນພາກ ຕາເວັນອອກກາງ. ຍິ່ງໄປ ກວ່ານັ້ນ ພວກເຮົາບໍ່ຍອມແພ້ຫຍັງທັງນັ້ນ ໂດຍການ ທົດລອງວ່າ ໂຄງການນີ້ ຈະສາມາດແກ້ໄຂໄດ້ຢ່າງສັນຕິ ຫຼື ບໍ່.”
ພວກຕິຕຽນໃນ ສະຫະລັດ ແລະ ອິຣ່ານ ກ່າວວ່າ ຂໍ້ຕົກລົງນີ້ຈະເຮັດໃຫ້ອີກຝ່າຍໜຶ່ງເປັນຜູ້ ໄດ້ປຽບ. ບັນດານັກການທູດຕອນນີ້ປະເຊີນໜ້າ ກັບການທີ່ຈະຊັກຊວນໃຫ້ຍອມຮັບເອົາ ຂໍ້ຕົກລົງໃນປະເທດຂອງຕົນ.
ລັດຖະມົນຕີ ຕ່າງປະເທດ ທ່ານ John Kerry ເອີ້ນທາງເລືອກ ບາງຢ່າງທີ່ໄດ້ຖືກແນະນຳ ຕໍ່ຂໍ້ຕົກລົງ ເຊັ່ນວ່າ ການເພີ້ມມາດຕະການລົງໂທດຕໍ່ ອິຣ່ານ ຈົນກວ່າ ເທເຮຣ່ານ ຍອມແພ້ຕໍ່ການຮຽກຮ້ອງ ຂອງສາກົນ ກ່ຽວກັບໂຄງການນິວເຄລຍຂອງພວກເຂົາວ່າ ເປັນ “ຈິນຕະນາການ.”