ລິ້ງ ສຳຫລັບເຂົ້າຫາ

34 ຄົນເສຍຊີວິດ ໃນປາກິສຖານ ຍ້ອນແຜ່ນດິນໄຫວ ຢູ່ຊາຍແດນອິຣ່ານ (ວີດິໂອ/ສະໄລດ໌)


ຊາວປາກີສຖານ ຊ່ອຍຊີວິດແບ້ຂອງຕົນ ຫຼັງຈາກແຜ່ນດິນໄຫວ ໃນເຂດຊາຍແດນ ລະຫວ່າງ ອິຣ່ານກັບປາກີສຖານ, ວັນທີ 16 ເມສາ 2013.
ທາງ​ການ​ທະຫານປາ​ກິ​ສຖານ​ໄດ້​ຍົກຍ້າຍ 16 ຄົນ ທີ່​ໄດ້​ຮັບ​ບາດ​ເຈັບ​ສາຫັດ ​ໃນ​ເຫດ ແຜ່ນດິນ​ໄຫວ​ຮ້າຍ​ແຮງ​ ຢູ່ໃກ້ເຂດຊາຍ​ແດນລະຫວ່າ​ງ ອິຣ່ານກັບປາ​ກີ​ສຖານ​ ​ໃນ​ຂະນະ​ທີ່​ການ​ກູ້​ໄພ​ບັນ​ເທົາ​ທຸກ​ຢູ່​ໃນ​ເຂດ​ນັ້ນ ຍັງ​ດໍາ​ເນີນ​ຢູ່​ຕໍ່​ໄປ.

​ເຮືອບິນ​ເຮ​ລິ​ຄອບ​ເຕີ້​ຫລາຍໆ​ລໍາ ​ໄດ້​ລໍາລຽງ​ພວກ​ຄົນ​ເຈັບ​ອອກ​ຈາກ​ເຂດ Mashkal ​ໃນ​ແຂວງ ບາ​ລູຈິ​ສຖານ ​ໃນ​ວັນ​ພຸດ​ມື້​ນີ້ ​ໄປ​ຍັງ​ Quetta ​ເມືອງ​ຫລວງ​ຂອງ​ເຂດ ​ເພື່ອ​ຮັບ​ການ​ປິ່ນປົວ​ຕື່ມ​ອີກ.

ກອງທັບ​ເວົ້າ​ວ່າ ທະຫານຫລາຍ​ຮ້ອຍ​ຄົນ​ກໍາລັງ​ໃຫ້ການ​ຊ່ວຍ​ເຫລືອ ​ໃນ​ຄວາມ​ພະຍາຍາມ​ບັນ​ເທົາ​ທຸກ​ໂດຍ​ລວມ ຫລັງ​ຈາກ​ທີ່​ແຜ່ນດິນ​ໄຫວ ​ແຮງ​ຂະໜາດ 7.8 ຣິກ​ເຕີ້ ​ໄດ້​ສົ່ງ​ຜົນ​ໃຫ້​ເຮືອນ​ຊານ​ພັງ​ລົງ​ຫລາຍໆ​ຫລັງ ​ແລະ​ເຮັດ​ໃຫ້ 34 ຄົນ​ ​ເສຍ​ຊີວິດ.


ກົມ​ສໍາ​ຫລວດ​ທໍ​ລະ​ນີຂອງສະຫະລັດ ​ກ່າວ​ໃນ​ວັນ​ອັງຄານ​ວານ​ນີ້​ວ່າ ຈຸດ​ໃຈກາງ​ຂອງ ແຜ່ນດິນ​ໄຫວ​ໃນ​ຕອນ​ບ່າຍ​ວັນ​ອັງຄານ​ວານ​ນີ້ ​ແມ່ນ​ຢູ່​ໃກ້ໆ​ເມືອງ Khash ​ແລະ​ເມືອງ Saravan ​ໃນ​ແຂວງ Sistan ກັບ Baluchestan. ຂົງ​ເຂດ​ດັ່ງກ່າວ​ ​ໄດ້ສັ່ນ​ສະ​ເທືອ​ນ ຍ້ອນແຜ່ນດິນ​ໄຫວທີ່​ຕິດຕາມມາ​ຫລາຍໆ​ຄັ້ງ ນັບ​ຕັ້ງ​ແຕ່​ຄັ້ງ​ທໍາ​ອິດ​ໃນ​ມື້ວານ​ນີ້ ​ແລະ​
ໂຮມ​ທັງ​ຄັ້ງ​ນຶ່ງ ທີ່​ແຮງ​ຂະໜາດ 5.7 ​ໃນ​ຕອນເຊົ້າ​ມືດ​ວັນ​ພຸດ​ມື້​ນີ້.

ສື່​ຂອງ​ລັດ​ຖະບານ​ອິຣ່ານ​ເວົ້າ​ວ່າ ມີ​ຄົນ​ນຶ່ງເສຍ​ຊີວິດ ຍ້ອນ​ຖືກ​ກ້ອນຫີນ​ຕົກ​ລົງ​ມາໃສ່
ໃນ​ເຫດ​ແຜ່ນດິນ​ໄຫວ​ ຄັ້ງ​ທໍາ​ອິດ​ນັ້ນ. ເຈົ້າ​ແຂ​ວງໆ​ດັ່ງກ່າວ ​ທ່ານ Hatam Narouyi
ກ່າວ ໃນ​ວັນ​ອັງຄານ​ມີ້​ນີ້​ວ່າ ຈຸດ​ໃຈກາງ​ຂອງ​ແຜ່ນດິນ​ໄຫວ ​ແມ່ນ​ຢູ່​ໃນ​ເຂດ​ທີ່​ບໍ່​ມີ​ຄົນ
​ຢູ່​ອາ​ໄສ​ຫລາຍ.

ການ​ແຜ່ນດິນ​ໄຫວຄັ້ງ​ນີ້ ຍັງ​ໄດ້​ສັ່ນ​ສະ​ເທືອ​ນຫລາຍໆ​ເມືອງ ທີ່ຢູ່​ໄກ​ອອກ​ໄປ​ຫລາຍ​ຮ້ອຍ​ຫລັກ ​ໂຮມ​ທັງ​ນະຄອນ ​ເມືອງ Karachi ຂອງ​ປາ​ກິສຖານ.

XS
SM
MD
LG