ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ຄະນະນັກກວດການີວເຄລຍ ຂອງສະຫະປະຊາຊາດ ເດີນທາງໄປຮອດອີຣ່ານ


ຮູບຈາກທໍານຽບປະທານາທິບໍດີອີຣ່ານ ສະແດງໃຫ້ເຫັນພາບ ປະທານາທິບໍດີ Mahmoud Ahmadinejad (ທີສອງຈາກຊ້າຍ) ທໍາການຢ້ຽມຢາມເຄື່ອງປະຕິກອນນີວເຄລຍແຫ່ງນຶ່ງ ໃນກຸງເຕຫະຣ່ານ,
ເມື່ອວັນທີ 15 ກຸມພາ 2012.
ຮູບຈາກທໍານຽບປະທານາທິບໍດີອີຣ່ານ ສະແດງໃຫ້ເຫັນພາບ ປະທານາທິບໍດີ Mahmoud Ahmadinejad (ທີສອງຈາກຊ້າຍ) ທໍາການຢ້ຽມຢາມເຄື່ອງປະຕິກອນນີວເຄລຍແຫ່ງນຶ່ງ ໃນກຸງເຕຫະຣ່ານ, ເມື່ອວັນທີ 15 ກຸມພາ 2012.

ພວກ​ນັກ​ກວດກາ​ພະລັງ​ນີວ​ເຄລຍສະຫະ​ປະຊາ​ຊາດ​ທີ​ມນຶ່ງ​ກໍາລັງ​ຢູ່​ໃນ​ອິຣ່ານ​ເພື່ອ​ທໍາ​ການ​ຢ້ຽມຢາມ​ທີ່​ມີ​ວັດຖຸ​ປະສົງ​ເພື່ອ​ແກ້​ໄຂ​ບັນຫາ​ຂັດ​ແຍ້​ງກັນ​ເລື້ອງ​ໂຄງການ​ນີວ​ເຄລຍຂອງ​ອີຣ່ານນັ້ນ.

ຄະນະ​ຜູ້ຕາງ​ໜ້າ​ຈາກ​ອົງການຄວບ​ຄຸມ​ພະ​ລັງ​ປະລະມະ​ນູສາກົນ ຫລື IAEA​ ເດີນທາງ​ໄປ​ຮອດ​ກຸງ​ເຕຫະຣ່ານ​ໃນ​ວັນ​ຈັນ​ມື້​ນີ້ ພາຍ​ໃຕ້​ການ​ນໍາພາ​ຂອງ​ທ່ານ Herman Nackaerts ຫົວໜ້າ​ກວດກາ​ນີວ​ເຄລຍ ຂອງ​ອົງການ IAEA ທີ່​ກ່າວ​ວ່າ ​ບູລິ​ມະ​ສິດ​ຂອງ​ທ່ານ​ແມ່ນວິ​ເຄາະ ​ເບິ່ງ​ຂອບເຂດ​ທາງ​ດ້ານ​ທະຫານ​ທີ່​ເປັນ​ໄປ​ໄດ້​ຂອງ​ໂຄງການ​ນີວ​ເຄລຍຂອງ​ອີຣ່ານນັ້ນ.

ທ່ານ Nackaerts ກ່າວ​ຕື່ມ​ວ່າ ທີ​ມຂອງ​ອົງການ IAEA ຢາກ​ເຫັນ ຜົນ​ທີ່​ເປັນ​ຮູບ​ປະ​ທໍາ​ຈາກ​ການ​ໂອ້​ລົມ​ສົນທະນາ​ກັນ​ເປັນ​ເວລາ​ສອງ​ມື້ກັບ​ບັນດາ​ເຈົ້າ​ໜ້າ​ທີ່​ອີຣ່ານ ​ແຕ່​ທ່ານ​ເຕືອນ​ວ່າ ຄວາມ​ຄືບ​ໜ້າ​ຂອງການ​ພົບ​ປະ​ຫາລື​ກັນ​ນັ້ນ ອາດ​ຈະ​ໃຊ້​ເວລາແດ່ໜ້ອຍ​ນຶ່ງ.

ພວກ​ນັກ​ກວດກາ​ຂອງ​ສະຫະ​ປະຊາ​ຊາດ​ຢາກ​ໃຫ້​ອີຣ່ານຊີ້​ແຈງ​ໃຫ້​ຟັງ​ກ່ຽວ​ກັບ​ການ​ຄົ້ນ​ພົບ​ຂອງ​ລາຍ​ງານ​ຂອງ​ອົງການ IAEA ເມື່ອໄວໆ​ມາ​ນີ້ ທີ່​ເວົ້າ​ເຖິງ​ຫລັກ​ຖານ​ກ່ຽວ​ກັບ​ວຽກ​ງານ​ຂອງ​ອີຣ່ານ​ໃນ​ການ​ອອກແບບ​ອາວຸດ​ນີວ​ເຄລຍນັ້ນ ຊຶ່ງ​ທາງ​ອີຣ່ານກ່າວ​ວ່າ ລາຍ​ງານ​ສະບັບ​ນີ້​ແມ່ນ​ອິງ​ໃສ່​ການ​ເສກ​ສັນ​ປັ້ນ​ແຕ່ງ​ເລື້ອງ​ຂຶ້ນ​ມາ.

ການ​ຢ້ຽມຢາມ​ຂອງ​ພວກ​ນັກ​ກວດກາ​ຂອງ​ອົງການ IAEA ມີ​ຂຶ້ນ​ນຶ່ງ​ມື້ ຫລັງ​ຈາກ​ນາຍ​ທະຫານ​ຂັ້ນ​ສູງ​ສຸດ​ຂອງ​ສະຫະລັດ​ຄື ນາຍ​ພົນ Martin Dempsey ກ່າວ​ວ່າ ການ​ໂຈມ​ຕີ​ຂອງ​ອິສຣາ​ແອ​ລ​ໃສ່​ສະຖານ​ທີ່​ນີວ ເຄລຍຂອງ​ອີຣ່ານ ຈະ​ເປັນ​ການ​ໄວ​ໂພດ ​ເພາະຍັງ​ບໍ່​ເປັນ​ທີ່ຈະ​ແຈ້ງເທື່ອ​ວ່າ ອີຣ່ານກໍາລັງ​ປະກອບ​ລະ​ເບີດ​ນີວ​ເຄລຍ​ແທ້​ຫລື​ບໍ່.

ອິສຣາ​ແອ​ລ ກ່າວ​ວ່າ ການ​ເຄື່ອນ​ໄຫວ​ທາງ​ທະຫານ​ອາດ​ຈະ​ຈໍາ​ເປັນ​ເພື່ອ​ປ້ອງ​ກັນ​ບໍ່​ໃຫ້​ອີຣ່ານມີ​ອາວຸດ​ນີວ​ເຄລຍ.

ໃນ​ວັນອາທິດ​ວານ​ນີ້​ເຊ່ນ​ກັນ ອີຣ່ານກ່າວ​ວ່າ ຕົນ​ໄດ້​ຢຸດ​ເຊົາ​ການ​ສົ່ງອອກ​ນໍ້າມັນ​ດິບໃນ​ປະລິມານຈໍາກັດ​ຂອງ​ຕົນ​ໃຫ້​ຝຣັ່ງ​ແລະ​ອັງກິດ ອັນ​ເປັນ​ການ​ຕອບ​ໂຕ້​ຢ່າງ​ຈະ​ແຈ້ງ​ຕໍ່ການ​ຮວມຫົວກັນ​ຂອງ​ສະຫະພາບ​ຢູ​ໂຣບທີ່​ບໍ່​ພາກັນ​ສັ່ງ​ຊື້​ນໍ້າມັນ​ຈາກ​ອີຣ່ານນັ້ນ. ອີຣ່ານກ່າວ​ວ່າ ຕົນໄດ້​ເອົາບາດກ້າວ​ຕ່າງໆ​ເພື່ອ​ຊອກ​ຫາ​ພວກ​ລູກ​ຄ້າ​ໃໝ່ ​ສໍາລັບ​ນໍ້າມັນ​ດິບ​ຂອງ​ຕົນ​ແລ້ວ.

XS
SM
MD
LG