ລິ້ງ ສຳຫລັບເຂົ້າຫາ

ວັນພະຫັດ, ໒໘ ມີນາ ໒໐໒໔

ຟີມຮູບເງົາກ່ຽວກັບໂອບາມາ


ຮູບເງົາເລື້ອງ Little Obama ແມ່ນກ່ຽວກັບຊີວິດຂອງ ປະທານາທິບໍດີ ໂອບາມາ ຕອນທ່ານຍັງນ້ອຍ ແລະດຳລົງຊີວິດຢູ່ໃນປະເທດອິນໂດເນເຊຍ
ຮູບເງົາເລື້ອງ Little Obama ແມ່ນກ່ຽວກັບຊີວິດຂອງ ປະທານາທິບໍດີ ໂອບາມາ ຕອນທ່ານຍັງນ້ອຍ ແລະດຳລົງຊີວິດຢູ່ໃນປະເທດອິນໂດເນເຊຍ

ຟີມຮູບ​ເງົາ​ເລື້ອງ​ໃໝ່​ທ່ີ​ມີ​ຊື່ວ່າ Little Obama ຫລື ​ໂອ​ບາ​ມາ​ ​ນ້ອຍ ທ່ີ​ເລົ່າ​ເຖິງ​ເລື້ອງ​ຊີວະ​ປະວັດ​ຂອງ​ປະທານາທິບໍດີ​ບາຣັກ​ໂອ​ບາ​ມາ​ ເວລາ​ຍັງ​ເປັນ​ເດັກ​ທ່ີ​ອາ​ໄສ​ຢູ່​ໃນ​ປະ​ເທດ​ອິນ​ໂດ​ເນ​ເຊຍ​ນັ້ນ ​ໄດ້​ເລີ້ມອອກ ສາຍ​ແລ້ວ​ທ່ີ​ນະຄອນຫລວງ​ຢາ​ກາ​ຕາ. ຜູ້​ກຳກັບ​ການສະ​ແດງກ່າວ​ວ່າ ຮູບ​ເງົາ​ເລື້ອງ​ນີ້​ ສະ​ແດງ​​ໃຫ້​ເຫັນ​ເຖິງ​ທ່ານ​ບາຣັກ​ໂອ​ບາ​ມາ ເວລາ​ຍັງນ້ອຍ ທ່ີ​ກາຍ​ມາ​ເປັນ​ຜູ້ນຳ​ປະ​ເທດ​ສະຫະລັດ​ໃນ​ທຸກ​ມື້ນີ້.

ໃນ​ມື້​ນຳ​ເອົາ​ຮູບ​ເງົາ​ເລື້ອງ​ Little Obama ອອກ​ສາຍ​ຮອບ​ປະຖົມມະ​ເລີກ​ທີ່​ນະຄອນ​ຫລວງ​ຢາ​ກາ​ຕານັ້ນ ພວກເດັກນ້ອຍນັກຮຽນຈາກ​ໂຮງຮຽນ​ທ່ີ​ທ່ານ​ໂອ​ບາ​ມາ​ໄດ້ເຂົ້າ​ຮຽນ​ເວລາຍັງ​ເປັນ​ເດັກ​ແລະ​ອາ​ໄສ​ຢູ່​ໃນ​ອິນ​ໂດ​ເນ​ເຊຍນັ້ນ ​ໄດ້​ມາສະ​ແດງ​ການຮ້ອງ​ເພງ​ແລະ​ຟ້ອນ​ລຳ​ໃຫ້ແຂກຊົມ. ​ແລະພວກ​ແຂກ​ທີ່​ຖືກເຊີນໄປ​ເບິ່ງ​ຮູບ​ເງົາ ກໍ​ໄດ້​ພາກັນ​ຖ່າຍຮູບ​ກັບຜູ້​ຊາຍ​ຄົນ​ນຶ່ງ ທີ່​ມີ​ຮູບ​ລັກສະນະ​ຄື​ກັນ​ກັບ​ທ່ານ​ໂອ​ບາ​ມາຜູ້​ໃຫຍ່ ​ເວລາ​ເປັນປະທານາທິບໍດີຢູ່​ນີ້​.

ແຕ່​ເຫດການ​ສຳຄັນ​ກໍ​ແມ່ນ​ການ​ຊົມ​ຮູບ​ເງົາ​ກ່ຽວ​ກັບ​ບົດຮຽນຕ່າງໆ​ທີ່​ໜຸ່ມ​ນ້ອຍ Barry Obama ອັນ​ເປັນ​ຊື່​ທີ່​ຄົນ​ທັງຫລາຍ​ພາກັນ​ເອີ້ນ​ທ່ານ​ໂອ​ບາ​ມາ ໃນເວລາ​ນັ້ນ ​ໄດ້ຮຽນ​ຮູ້​ແລະ​ຖອດ​ຖອນ​ໃນ​ຂະນະ​ທ່ີ​ອາ​ໄສ​ຢູ່​ໃນ​ກຸງ​ຢາ​ກາ​ຕາ​ໃນ​ຕົ້ນ​ຊຸມ​ປີ 1970 ນັ້ນ. ຈາກຜູ້​ເປັນ​ພໍ່​ນ້າ​ທ່ີ​ເປັນ​ຄົນ​ອິນ​ໂດ​ເນ​ເຊຍ ທ້າວ Barry Obama ​ໄດ້​ຮຽນ​ຮູ້ການ​ຕໍ່ສູ້​ເມື່ອ​ເວລາ​ທີ່ຈຳ​ເປັນຕ້ອງ​ຕໍ່ສູ້. ຈາກ​ຜູ້​ເປັນ​ແມ່​ນັ້ນ ລາວ​ໄດ້​ຮຽນ​ຮູ້​ການໃຫ້​ອະ​ໄພ​. ​ໃນ​ ຮູບ​ເງົາ​ເລື້ອງ​ນີ້ ​ມີ​ທັງ​ເລື້ອງການຕໍ່ສູ້​ເຕະ​ຕ່ອຍ​ແລະເລື້ອງຄວາມ​ຮັກ​ນ້ອຍ​ນຶ່ງ.

ທ່ານ Damien Dematra ຜູ້ກຳກັບ​ການສະ​ແດງ​ຮູບ​ເງົາ​ເລື້​ອງນີ້​ ກ່າວ​ວ່າ ຮູບ​ເງົາ​ເລື້ອງ Little Obama ນີ້​ແມ່ນ​ອີງ​ໃສ່​ເຫດການ​ໂຕ​ຈິງ​ແຕ່ນອກ​ນັ້ນ​ແລ້ວ ກໍ​ຍັງ​ເປັນ​ຮູບ​ເງົາ​ທ່ີໃຫ້​ຄຳ​ສັ່ງສອນ​ເຊັ່ນ​ກັນ ຊຶ່ງ​ທ່ານ Dematra ກ່າວ​ຊີ້​ແຈງ​ວ່າ :

“ສານ​ຫລື​ວ່າເນື້ອ​ໃນ​ໃຈຄວາມຂອງ​ຮູບ​ເງົາ​ເລື່ອງ​ນີ້ ກໍ​ຄືນຶ່ງ ຄວາມ​ສຳ ຄັນ​ຂອງ​ຄວາມ​ແຕກ​ຕ່າງ​ກັນ ຂອງຄົນ​ຫລາຍເຊື້ອ​ຊາດ​ຫລາຍ​ຊົນ​ເຜົ່າ​ ຫລາຍ​ແນວ​ຄິດ. ໝາຍ​ຄວາມ​ວ່າບໍ່​ມີ​ບັນຫາ​ຫຍັງ​ທີ່ເຮົາຈະແຕກ​ຕ່າງໄປ​ຈາກ​ຄົນ​ອື່ນ. ຖ້າ​ເຮົາ​ແຕກ​ຕ່າງ​ໄປ​ຈາກ​ຜູ້​ອື່ນ ມັນກໍ​ບໍ່​ໄດ້​ໝາຍ​ຄວາມ​ວ່າ​ເຮົາ​ຈະ ຕ້ອງຕໍ່ສູ້​ຕ້າ​ນຢັນກັນ. ​ອັນ​ທີ່​ສອງ​ ກໍ​ຄືຢ່າໃຊ້​ຄວາມ​ຮຸນ​ແຮງ ​ເພາະ​ຄວາມ​ຮຸນ​ແຮງ​ຈະ​ບໍ່​ຊ່ວຍ​ແກ້​ໄຂ​ບັນຫາຫຍັງໄດ້​ເລີຍ.”

ຜູ້​ສະ​ແດງ​ເປັນ​ທ້າວ​ນ້ອຍ Barry Obama ນັ້ນ​ ແມ່ນທ້າວ Hasan Faruq Ali ​ເດັກ​ອະ​ເມຣິກັນ ວັຍ 12 ປີ ​ທ່ີ​ບໍ່​ເຄີຍ​ສະ​ແດງຮູບ​ເງົາ​ມາ​ກ່ອນ​ເລີຍ. ຄື​ກັນ​ກັບ​ປະທານາທິບໍດີໂອ​ບາ​ມາ ທ້າວ​ອາລີ​ເປັນ​ຄົນ​ຜິວ​ປະສົມ ຄືລູກຊາຍຂອງ​ຄູ່​ຜົວ​ເມຍ​ຕ່າງ​ຊາດ​ຜິວ​ພັນ​ກັນ ​ແລະ​ໄດ້​ຍົກຍ້າຍ​ຈາກ​ສະຫະລັດ​ໄປ​ຢູ່​ອິນ​ໂດ​ເນ​ເຊຍ ​ໃນ​ຂະນະ​ທ່ີ​ຍັງ​ເປັນ​ເດັກ​ຢູ່. ທ່າວ ອາລີ ກ່າວວ່າ :

" ຂະ​ນ້ອຍ​ຮູ້ສຶກວ່າ​ໂຊກ​ດີ​ຫລາຍ ​ເພາະວ່າ​ໜັງ​ເລື່ອ​ງ​ແລກ​ທີ່​ຂະ​ນ້ອຍ​ໄດ້ສະ​ແດງ ກໍ​ແມ່ນສ​ະ​ແດງເປັນບຸກຄົນ​ທີ່​ຂະ​ນ້ອຍ​ຊື່ນ​ຊົມ ຫລາຍ ຊຶ່ງເປັນ​ບຸກຄົນ​ໝາຍ​ເລກ​ນຶ່ງ​ຂອງ​ໂລກ​ ​ເປັນ​ຜູ້ຊາຍ​ທີ່​ມີ​ອຳ ນາດ​ທີ່​ສຸດ​ໃນໂລກ​ໃນ​ປັດຈຸບັນ​ນີ້."

ລາຍ​ຊື່ແຂກທ່ີ​ມາ​ຮ່ວມ​ຊົມ​ຮູບ​ເງົາ​ເລື້ອງ​ນີ້ ມີ​ຮວມທັງ​ພວກ​ສະໜັບ ສະໜູນ​ທ່ານ​ໂອ​ບາ​ມາ​ຫລາຍ​ຄົນ ຮວມທັງ​ທ່ານ Wimar Witoelar ນັກວິ​ເຄາະ​ດ້ານ​ການ​ເມືອງ ຊຶ່ງ​ທ່ານ​ຫວັງ​ວ່າ ຮູບເງົາ​ເລື້ອງ​ນີ້ ຈະ​ເສີມ​ສ້າງ​ການ​ຕິດ​ຕໍ່​ພົວພັນ​ດ້ານ​ວັດທະນະທຳ​ ລະຫວ່າງ​ສະຫະລັດ​ແລະ​ອິນ​ໂດ​ເນ​ເຊຍ ໃຫ້​ແຂງ​ແຮງ​ຂຶ້ນ ຊຶ່ງ​ທ່ານ Witoelar ກ່າວ​ດັ່ງ​ນີ້:

“ເວລາ​ຮູບ​ເງົາເລຶ່ອງນີ້​ໄດ້​ເຂົ້າ​ໄປ​ສາຍ​ຢູ່​ໃນ​ອາ​ເມ​ຣິ​ກາ ຊາວ​ອາ​ເມຣິກັນ​ກໍ​ຈະ​ໄດ້​ຮູ້​ວ່າ​ທ່ານໂອ​ບາມາ​ເຄີຍຢູ່​ໃນ​ປະ​ເທດ​ອິນ​ໂດ​ເນ​ເຊຍ ວ່າ​ອິນ​ໂດ​ເນ​ເຊຍ​ເປັນ​ປະ​ເທດ​ທີ່​ໜ້າ​ຢູ່​ອາ​ໃສ​ໄດ້. ສຳ​ຫລັບ​ຊາວ​ອິນ​ໂດ​ເນ​ເຊຍ​ແລ້ວ ມັນສະ​ແດງ​ໃຫ້​ເຫັນ​ວ່າ​ ປະທານາທິບໍດີສະຫະລັດ​ຄົນ​ນີ້​ກໍ​ເປັນ​ຜູ້​ນຶ່ງ​ຂອງ​ພວກ​ເຮົາ. ດັ່ງ​ນັ້ນ ​ຮູບ​ເງົາເລື່ອງ​ນີ້​ ​ຈຶ່ງ​ຖື​ວ່າເປັນປະ​ໂຍດ​ຫລາຍ.”

ເຖິງ​ຢ່າງ​ໃດ​ກໍ​ດີ ຮູ​ບ​ເງົາເລື້ອງນີ້ກໍໄດ້​ກໍ່​ໃຫ້​ເກີດຄວາມ​ເປັນ​ຫ່ວງ​ບາງ​ຢ່າງຂຶ້ນ​ມາ. ຄື​ກ່ອນ​ການ​ສາຍຮູບ​ເງົາ​ທ່ີ​ວ່າ​ນີ້ ມີ​ສາກນຶ່ງ​ທ່ີໄດ້​ຖືກ​ຕັດ​ອອກ ຊຶ່ງ​ເປັນ​ສາກ​ທີ່ສະ​ແດງ​ໃຫ້​ເຫັນໜຸ່ມ​ນ້ອຍ Barry Obama ຊຶ່ງ​ເປັນ​ຄົນ​ນັບຖື​ສາສະໜາ​ຄຣີສນັ້ນ ກຳລັງ​ສວດ​ມົນ​ໄຫວ້​ພະ​ຄື​ກັນຊາວ ມຸສລິ​ມ. ສາກ​ນີ້ໄດ້​ຖືກ​ຕັດ​ອອກ​ ກໍເພາະວ່າພວກ​ຜູ້​ສ້າງ​ຮູບ​ເງົາເຫັນວ່າ ມັນ​ເປັນ​ສາກທ່ີ​ພົວພັນ​ກັບ​ການ​ເມືອງ​ຫລາຍ​ໂພດ.

XS
SM
MD
LG