ລິ້ງ ສຳຫລັບເຂົ້າຫາ

53 ຄົນເສຍຊີວິດ ໃນເຫດລົດໄຟຕົກລາງ ຢູ່ອິນເດຍ

  • ທອງປານ ເທບວົງສາ

ອຸບັດເຫດລົດໄຟຕົກລາງ ຢູ່ແຄວ້ນ Uttar Pradesh ຂອງອິນເດຍ ເມື່ອວັນທີ່ 10 ເດືອນນີ້

ລົດໄຟໂດຍສານສອງຂະບວນໃນອິນເດຍ ຕົກລາງຢູ່ໃນ​ສອງ​ແຄ​ວ້ນເມື່ອວັນອາທິດວານນີ້ ຍັງຜົນໃຫ້ມີຜູ້ເສຍຊີວິດ 53 ຄົນ ແລະບາດເຈັບອີກ ປະມານ 200 ຄົນ.

ພວກເຈົ້າໜ້າທີ່ກູ້ໄພໃນລັດ Uttar Pradesh ຢູ່ທາງພາກເໜືອຂອງປະເທດ ບ່ອນ​ລົດໄຟ ຄັນທໍາອິດຕົກລາງນັ້ນ ຍັງ​ກໍາລັງ​ພາກັນຊອກຫາຜູ້ລອດຊີວິດຢູ່ໃນຊາກ​ຫັກ​ພັງ​ຂອງຂະບວນ ລົດໄຟ Kalka Mail ທີ່ຕົກ​ລາງ​ໃນ ຂະນະທີ່ກໍາລັງ​ແລ່ນ​ມຸ່ງ​ໜ້າໄປຍັງນະຄອນຫລວງນີວ ເດລລີ ໃນຕອນບ່າຍຂອງວັນທິດວານນີ້ ມີຜູ້ເສຍຊີວິດຢ່າງໜ້ອຍ 53 ຄົນ ແລະບາດເຈັບ ອີກ 100 ຄົນ. ສາເຫດຂອງອຸບັດເຫດນີ້ ຍັງບໍ່ແຈ້ງຂາວໃນທັນທີນີ້ເທື່ອ.

ໃນບໍ່ເທົ່າໃດຊົ່ວໂມງຕໍ່ມາ ລົດໄຟໂດຍສານຂະບວນທີ່ສອງກໍ​ໄດ້ຕົກລາງ ຢູ່ໃນລັດ Assam ທາງພາກຕາເວັນອອກສຽງເໜືອຂອງປະເທດ ທີ່ຍັງຜົນ ໃຫ້ມີຜູ້ໄດ້ຮັບບາດເຈັບ 100 ຄົນ. ບໍ່ມີລາຍງານວ່າ​ໄດ້ມີຜູ້​ໃດເສຍຊີວິດ.

ຕໍາຫລວດ​ທ້ອງ​ຖິ່ນ​ສົງ​ໃສ​ວ່າ ລະ​ເບີດ​ທີ່​ກົດ​ຂະ​ນວນ​ຢູ່​ໄກໆ ​ເປັນສາ​ເຫດ​ເຮັດ​ໃຫ້ 4 ຕູ້​ຂອງ​ຂະ​ບວນລົດ​ດ່ວນ Guwahat-Puri ຕົກ​ລາງ.

ເມື່ອວັນພະຫັດຜ່ານມາ ຢ່າງໜ້ອຍມີຜູ້ເສຍຊີວິດ 35 ຄົນ ຢູ່ບ່ອນຂ້າມທາງລົດໄຟ​ແຫ່ງ​ນຶ່ງ ທີ່ລັດ Uttar Pradesh ເວລາລົດໄຟແລ່ນຕໍາລົດບັສຄັນນຶ່ງ ທີ່ບັນທຸກຜູ້ໂດຍສານກັບມາ ຈາກງານແຕ່ງງານ.

ຕາ​ນ່າງລົດໄຟຂອງອິນເດຍ ນັບວ່າເປັນຕາ​ນ່າງນຶ່ງທີ່ໃຫຍ່ທີ່ສຸດຂອງໂລກ ທີ່ບັນທຸກຜູ້ໂດຍ ສານປະມານ 14 ລ້ານຄົນໃນແຕ່ລະມື້. ອຸບັດເຫດລົດໄຟ ​ແມ່ນ​ເກີດ​ຂຶ້ນ​ຢູ່​ເປັນ​ປະ​ຈໍາ ຊຶ່ງ ສ່ວນໃຫຍ່​ໄດ້​ຖືກຖິ້ມໂທດໃສ່ການບໍາລຸງ​ຮັກສາ​ແລະສ້ອມແປງທີ່ຂີ້ຮ້າຍຫລາຍ ແລະຄວາມ ຜິດພາດຂອງມະນຸດນັ້ນນໍາ.

XS
SM
MD
LG