ເຮືອບິນກອງທັບອາກາດອິນເດຍລຳນຶ່ງ ທີ່ບັນທຸກຜູ້ໂດຍສານ 29 ຄົນ ໄດ້ຫາຍສາບສູນ ໄປເປັນເວລາ 24 ຊົ່ວໂມງ ຫລັງຈາກໄດ້ຄາດໝາຍ ທີ່ຈະລົງຈອດຢູ່ເກາະດອນນຶ່ງ ໃນອ່າວ Bengal.
ຜູ້ໂດຍສານຢູ່ໃນເຮືອບິນ 8 ຄົນເປັນພົນລະເຮືອນ.
ຢ່າງໜ້ອຍມີກຳປັ່ນ 12 ລຳ ແລະເຮືອອື່ນໆອີກ ໄດ້ຖືກສົ່ງໄປຊອກຄົ້ນຫາເຮືອ ບິນທີ່ຫາຍສາບສູນ ຢູ່ໃນບໍລິເວນອ່າວ Bengal.
ເຮືອບິນ AN-32 ລຳນີ້ ໄດ້ບິນຂຶ້ນຈາກເມືອງ Channai ໃນພາກໃຕ້ຂອງປະເທດປະມານ
8 ໂມງເຊົ້າ ຕາມເວລາທ້ອງຖິ່ນ ໃນວັນສຸກວານນີ້ ແລະຄາດ ວ່າ ຈະລົງຈອດ ທີ່ເກາະ Port Blair ໃນເວລາສາມຊົ່ວໂມງຕໍ່ມາ. ບັນດາເຈົ້າໜ້າທີ່ກ່າວວ່າ ການຕິດຕໍ່ຄັ້ງສຸດທ້າຍ
ກັບນັກບິນ ແມ່ນປະມານ 15 ນາທີຫລັງຈາກເຮືອບິນໄດ້ບິນຂຶ້ນ.
ເຮືອບິນ AN-32 ສ້າງໂດຍຣັດເຊຍ ແມ່ນຂ້ອນຂ້າງເກົ່າ ແລະໂດຍສະເພາະແລ້ວເຮືອບິນ
ລຳດັ່ງກ່າວນີ້ ໄດ້ເກີດບັນຫາດ້ານເທັກນິກສາມເທື່ອ ພຽງແຕ່ໃນເດືອນນີ້ ກ່ອນທີ່ໄດ້ສ້ອມແປງ ແລະອະນຸຍາດໃຫ້ບິນໄດ້ ໃນວັນສຸກວານນີ້ ອີງ ຕາມລາຍງານໜັງສືພິມ the Times of India.
ເຮືອບິນ AN-32 ສາມາດບິນໄດ້ສີ່ຊົ່ວໂມງ ໂດຍບໍ່ຕ້ອງໃສ່ນໍ້າມັນເພີ້ມ.
ດິນຟ້າອາກາດໃນເວລາທີ່ເຮືອບິນຫາຍສາບສູນໄປນັ້ນ ຍັງບໍ່ເປັນທີ່ຊາບກັນເທື່ອ ເຖິງແມ່ນວ່າປັດຈຸບັນ ເປັນລະດູລົມມໍລະສຸມຢູ່ໃນຂົງເຂດ ທີ່ພາໃຫ້ມີຝົນຕົກໜັກ ແລະນຳເອົາລົມແຮງ ມາສູ່ເຂດເອເຊຍອາຄະເນ.
