ລິ້ງ ສຳຫລັບເຂົ້າຫາ

HRW ຮຽກຮ້ອງ ໃຫ້ອິນເດຍ ໂຈະການລົງໂທດ ປະຫານຊີວິດ ຄືນອີກ


ບັນດານັກເຄື່ອນໄຫວຊາວ ຮິນດູ ກຸ່ມ Bajarang dal ທີ່ຮ້ອງໂຮ ແລະຈູດເຜົາໝາກກະໂພກ ເພື່ອສະຫຼອງການປະຫານຊີວິດທ້າວ Kasab

ກຸ່ມປົກປ້ອງສິດທິມະນຸດ Human Rights Watch ໄດ້ຮຽກຮ້ອງ
ໃຫ້ອິນເດຍ ນຳເອົາການໂຈະ ໂທດປະຫານຊີວິດ ກັບມາໃຊ້ຄືນ
ອີກໃນທັນທີ ຫຼັງຈາກ New Delhi ໄດ້ປະຫານຊີວິດ ມືປືນຊາວ
ປາກີສຖານຄົນດຽວທີ່ລອດຊີວິດມາໄດ້ ໃນການໂຈມຕີກໍ່ການ
ຮ້າຍທີ່ນະຄອນ Mumbai ໃນປີ 2008 ນັ້ນ.

ໃນຖະແຫຼງການສະບັບນຶ່ງທີ່ນຳອອກເຜີຍແຜ່ໃນວັນພະຫັດມື້ນີ້
ກຸ່ມປົກປ້ອງສິດທິມະນຸດດັ່ງ ກ່າວທີ່ມີສໍານັກງານຢູ່ນະຄອນ New
York ກ່າວວ່າ ການແຂວນຄໍທ້າວ Mohammed Ajmal
Kasab ໃນອາທິດນີ້ ແມ່ນຂີດໝາຍຂອງການສິ້ນສຸດລົງ ດ້ວຍ
ຄວາມກັງວົນໃຈ ຕໍ່ການໂຈະການປະຫານຊີວິດຂອງອິນເດຍ
ແລະເປັນບາດກ້າວຖອຍຫຼັງສຳລັບລະບົບຍຸຕິທໍາຂອງອິນເດຍ.

ກຸ່ມດັ່ງກ່າວຍັງໄດ້ຮຽກຮ້ອງໃຫ້ອິນເດຍເອົາບາດກ້າວທັນທີໄປສູ່ການລົບລ້າງໂທດປະຫານ
ຊີວິດນີ້ເສຍ.

ທ້າວ Kasab ແລະເພື່ອນທີ່ເປັນຊາວໜຸ່ມປາກິສຖານອີກ 9 ຄົນ ທີ່ຕິດອາວຸດເຕັມອັດຕາ
ໄດ້ເຂົ້າໂຈມຕີໂຮງແຮມຫຼູຫຼາຫຼາຍແຫ່ງ ສູນກາງຂອງຊາວ Jew ແລະສະຖານນີລົດໄຟ
ທີ່ແອອັດໄປດ້ວຍຜູ້ຄົນທີ່ນະຄອນ Mumbai ຊຶ່ງເປັນນະຄອນຫຼວງທາງດ້ານການເງິນຂອງ
ອິນເດຍ ທີ່ເຮັດໃຫ້ມີຜູ້ເສຍຊີວິດ 166 ຄົນນັ້ນ.

ລາວຖືກຕັດສິນໂທດໃນປີ 2010 ໃນຂໍ້ຫາເປັນມືສັງຫານ, ເປັນຜູ້ກໍ່ການຮ້າຍ ແລະເຮັດ
ສົງຄາມຕ້ານອິນເດຍ. ທ້າວ Kasab ໃນຂັ້ນຕົ້ນແມ່ນປະຕິເສດບໍ່ຍອມຮັບຜິດ ແຕ່ໃນເວລາ
ຕໍ່ມານັ້ນກໍສາລະພາບວ່າ ລາວໄດ້ມີສ່ວນປະກອບໃນການໂຈມຕີກໍ່ການຮ້າຍ ເປັນເວລາ 3
ວັນນັ້ນ.
XS
SM
MD
LG