ຫຼາຍຮ້ອຍຄົນ ພາກັນໂຮມຊຸມນຸມຢູ່ນະຄອນ Melboune ປະເທດ Australia ໃນວັນເສົາມື້ນີ້ ຫລັງຈາກການສະເໜີ ທີ່ຈະຕັ້ງຖິ່ນຖານອົບພະຍົບ ຢູ່ໃນທ້ອງຖິ່ນ ໄດ້ດຶງດູດເອົາປະ ຊາຊົນ ທັງຝ່າຍທີ່ເຫັນດີ ແລະຕໍ່ຕ້ານມາດຕະການດັ່ງກ່າວ ມາໂຮມຊຸມນຸມກັນ.
ພວກປະທ້ວງຈາກກຸ່ມຕ່າງໆທີ່ຕໍ່ຕ້ານອິສລາມ ກ່າວວ່າ ເຂົາເຈົ້າໄດ້ຕໍ່ຕ້ານແຜນທີ່ຈະຕັ້ງຖິ່ນຖານພວກອົບພະຍົບ 120 ຄົນ ທີ່ີມາຈາກຊີເຣຍ ແລະອີຣັກ ຢູ່ທີ່ບ່ອນພັກພາອາໄສຂອງຜູ້ເຖົ້າ ຢູ່ທີ່ຄຸ້ມ Eltham.
ພວກປະທ້ວງຕໍ່ຕ້ານຄົນເຂົ້າເມືອງ ພາກັນຖືທຸງຊາດອອສເຕຣຍເລຍ ແລະເດີນຂະບວນໃກ້ໆກັບສວນສາທາລະນະ Andrew ທີ່ຄຸ້ມ Eltham. ຕຳຫລວດໄດ້ຖືກສົ່ງໄປທີ່ນັ້ນ ເພື່ອແຍກກຸ່ມທັງສອງອອກຈາກກັນ ບໍ່ໃຫ້ເກີດການປະທະ.
ພວກສະໜັບສະໜູນອົບພະຍົບ ຊຶ່ງເປັນສ່ວນນຶ່ງຂອງກຸ່ມ “ຍິນດີຕ້ອນຮັບ ທີ່ຄຸ້ມ Eltham” ໄດ້ພາກັນຖືປ້າຍທີ່ມີສີສັນ ທີ່ຂຽນວ່າ “Eltham ຂໍຮັບເອົາອົບພະ ຍົບ.”
ທ່ານ John Convoy ຢູ່ທີ່ບ່ອນບໍລິການຮັກສາ Saint Vincent ກ່າວວ່າ “ຄົນສ່ວນໃຫຍ່ພາກັນບໍ່ສະແດງຄວາມຮູ້ສຶກ. ເຂົາເຈົ້າຫລາຍຄົນມີອາຍຸໄດ້ແປດສິບປີ ແລະເກົ້າສິບປີ ແລະແມ່ນແລ້ວ ເຂົາເຈົ້າພຽງແຕ່ເກັບຄວາມຮູ້ສຶກເຂົ້າເຈົ້າໄວ້. ເຂົາເຈົ້າມີຄວາມເປັນຫ່ວງຢູ່ໜ້ອຍນຶ່ງກ່ຽວກັບເລື້ອງນີ້ ແຕ່ເຂົາເຈົ້າຈະລໍຖ້າ ແລະເບິ່ງກັນຕໍ່ໄປ.”
ໜັງສືພີມ Sydney Morning Herald ລາຍງານວ່າ ພວກຄົນທ້ອງຖິ່ນພາກັນສົນທະນາ ກ່ຽວກັບແນວຄິດທີ່ຈະຕັ້ງຖິ່ນຖານອົບພະຍົບຢູ່ສະຖານທີ່ບໍລິການຮັກ ສາ St Vincent ແຕ່ສ່ວນໃຫຍ່ເຂົາເຈົ້າບໍ່ດີໃຈທີ່ຄົນມາຈາກເຂດອື່ນໄດ້ລັ່ງໄຫຼ ມາປະທ້ວງຢູ່ຄຸ້ມ Eltham.
ອອສເຕຣເລຍມີນະໂຍບາຍເຄັ່ງຄັດຕໍ່ຄົນເຂົ້າເມືອງ ແລະຜູ້ລີ້ໄພທີ່ພະຍາຍາມ ເດີນທາງໄປເຖິງທະວີບດັ່ງກ່າວ ທີ່ຖືກສົ່ງໄປສູນອົບພະຍົບທີ່ເກາະ Nauru ຫລືທີ່ປາປົວນິວກີນີ ບ່ອນທີ່ຖານະເປັນອົບພະຍົບຂອງພວກເຂົາເຈົ້າ ອາດຈະ ຖືກຮັບເອົາຫລືປະຕິເສດ.
