ກຸ່ມຄົ້ນຄວ້າລະຫວ່າງຊາດຊັ້ນນໍາກຸ່ມນຶ່ງກ່າວວ່າ ການລົງໂທດຂອງຝ່າຍຕາເວັນຕົກມາເປັນເວລາ 2 ທົດສະວັດຕໍ່ລັດຖະບານທະຫານມຽນມາ ບໍ່ໄດ້ບັນລຸເປົ້າໝາຍຂອງຕົນ ແລະມີຜົນກະທົບໃນທາງລົບຕໍ່ປະຊາຊົນ ທີ່ການລົງໂທດມີເປົ້າໝາຍໃຫ້ການປົກປ້ອງນັ້ນ.
ກຸ່ມວິກິດການລະຫວ່າງຊາດ ຫລື ICG ໃນການກ່າວໂດຍສັງເຂບໃນວັນຈັນວານນີ້ ໄດ້ອ້າງວ່າ ການລົງໂທດດັ່ງກ່າວເປັນຄວາມລົ້ມແຫລວແລະເພ່ງເລັງໃສ່ການເລືອກຕັ້ງຄັ້ງທໍາອິດຂອງມຽນມ້າໃນຮອບ 20 ປີທີ່ມີຂຶ້ນໃນເດືອນພະຈິກຜ່ານມານັ້ນ. ໃນຂະນະທີ່ການປ່ອນບັດເລືອກຕັ້ງບໍ່ໄດ້ດໍາເນີນໄປຕາມມາດຕະຖານປະຊາທິປະໄຕນັ້ນ ກຸ່ມ ICG ກ່າວວ່າ ແຕ່ຢ່າງໃດກໍດີ ການເລືອກຕັ້ງທີ່ວ່າກໍໄດ້ເປັນການໄຂການໂອ້ລົມສົນທະນາກັນໃໝ່ແລະການຊອກຫາຊ່ອງທາງສ້າງຄວາມປອງດອງກັນຄືນໃໝ່ໃນຂັ້ນຕໍ່ໄປໃນປະເທດໃນຂົງເຂດເອເຊຍຕາເວັນອອກສຽງໃຕ້ແຫ່ງນີ້.
ກຸ່ມ ICG ທີ່ມີຫ້ອງການຕັ້ງຢູ່ໃນກຸງ Brussels ກ່າວວ່າ ມຽນມາຍັງຄົງຕ້ອງການການປະຕິ
ຮູບທາງດ້ານສັງຄົມ ເສດຖະກິດແລະການເມືອງຢ່າງຫລວງຫລາຍນັ້ນຢູ່. ແຕ່ແທນທີ່ຈະຮຽກ
ຮ້ອງໃຫ້ເພີ່ມການລົງໂທດຕື່ມອີກຕໍ່ລັດຖະ ບານຜະເດັດການນີ້ ທາງກຸ່ມ ICG ກັບຮຽກຮ້ອງ
ໃຫ້ເພີ່ມການຊ່ອຍເຫລືອຂອງຕ່າງປະເທດຕື່ມອີກ ແລະໃຫ້ຍຸດຕິການທີ່ສະຫະລັດຫ້າມສັ່ງຊື້
ສິນຄ້າຂອງມຽນມາ ແລະໃຫ້ຍົກເລີກການຈໍາກັດຮັດແຄບຂອງພວກປະເທດຝ່າຍຕາເວັນຕົກ
ໃນການຊ່ອຍເຫລືອດ້ານການພັດທະນາຂອງຕົນແກ່ມຽນມານັ້ນ.