ລິ້ງ ສຳຫລັບເຂົ້າຫາ

ເຮີຣິເຄນ Matthew ມຸ່ງໜ້າສູ່ ບາຮາມັສ ຫຼັງຈາກ ສ້າງຄວາມເສຍຫາຍ ຢູ່ເຮຕີ


ທ້າວ Jahvez Roberts ຂົນຖົງຊາຍໃສ່ລົດລູກຄ້າ ທີ່ບໍລິສັດ Roberts Trucking ທາງພາກຕາເວັນອອກ ຂອງເມືອງ Nassauໃນໝູ່ເກາະບາຮາມັສ. (4 ຕຸລາ 2016)

ເຮີຣິເຄນ Matthew​ ໄດ້​ປະ​ເສັ້ນທາງ​ຂອງ​ການ​ເສຍ​ຊີວິດ​ແລະບ້ານ​ເຮືອນທີ່​ຖືກ​ທຳລາຍ​ໃນ​ຂະນະລົມພາຍຸ​ຫົວນີ້ ພັດ​ຜ່ານ​ປະ​ເທດ​ເຮ​ຕີ​ແລະ​ຄິວ​ບາແລະ​ກຳລັງ​ມຸ່ງ​ໜ້າ​ສູ່​ໝູ່​ເກາະ​ບາ​ຮາ​ມາສ​ໃນຕອນ​ເຊົ້າ​ວັນ​ພຸດ​ມື້ນີ້.

ສູນ​ກາງ​ເຮີ​ຣິ​ເຄນ​ແຫ່ງ​ຊາດ ຂອງສະຫະລັດ ທີ່​ນະຄອນ​ໄມ​ອາ​ມີ ​ເອີ້ນລົມພາຍຸ Matthew ​ເປັນ​ອັນຕະລາຍ​ຮ້າຍ​ແຮງ​ ແລະ​ທຳນາຍ​ວ່າ ຍັງ​ຈະ​ສືບ​ຕໍ່​ເປັນ​ລົມພາຍຸ​ຂະໜາດ​ແຮງ ​ຢູ່ຕໍ່​ໄປຢ່າງ​ໜ້ອຍ​ຈົນ​ຮອດ​ວັນ​ພະຫັດ​ມື້ອື່ນ.

ລົມພາຍຸ​ຫົວນີ້ ​ໄດ້​ອ່ອນ​ກຳລັງ​ລົງ​ເລັກ​ນ້ອຍ ຫລັງ​ຈາກ​ພັດ​ຂຶ້ນຝັ່ງ​ ທີ່​ປະ​ເທດ​ເຮ​ຕີ ຊຶ່ງ​ໄດ້​ຫລຸດ​ລະດັບ​ລົງ​ເປັນ​ລົມພາຍຸ​ທີ່​ມີ​ຄວາມ​ແຮງ​ປະ​ເພດ​ສາມຄື​ມີ​ລົມ​ແຮງ​ເຖິງ 125 ​ໄມ​ຕໍ່​ຊົ່ວ​ໂມງ ​ແຕ່​ກໍ​ຄາດ​ວ່າ ຈະ​ມີ​ຄວາມ​ແຮງ​ຕື່ມ​ຂຶ້ນອີກ​ເວລາ​ລົມພາຍຸ​ຫົວນີ້ມຸ່ງ​ໜ້າ​ສູ່​ແຄມ​ຝັ່ງ​ທະ​ເລ​ຂອງ​ລັດ​ຟລໍຣິດາ ​ໃນ​ພາກ​ຕາ​ເວັນ​ອອກສຽງ​ໃຕ້​ຂອງ​ສະຫະລັດ.

ລົດຄັນນຶ່ງຈອດຢູ່ໃກ້ເຮືອນ ທີ່ຖືກນ້ຳຖ້ວມ ຍ້ອນເຮີຣິເຄນ Matthew ທີ່ເມືອງ Leogane ປະເທດເຮຕີ
ລົດຄັນນຶ່ງຈອດຢູ່ໃກ້ເຮືອນ ທີ່ຖືກນ້ຳຖ້ວມ ຍ້ອນເຮີຣິເຄນ Matthew ທີ່ເມືອງ Leogane ປະເທດເຮຕີ

ມີ​ຜູ້​ເສຍ​ຊີວິດ​ແລ້ວ​ບໍ່​ຕ່ຳ​ກວ່າ 9 ຄົນທີ່​ປະ​ເທດ​ເຮ​ຕີ​ແລະ​ສາທາລະນະ​ລັດ​ໂດ​ມີ​ນິກັນ. ລົມ ພາຍຸ​ຫົວນີ້ ​ເປັນ​ພາຍຸ​ທີ່​ຮ້າຍ​ແຮງ​ສຸດ​ໃນ​ເຂດ​ທະ​ເລ​ຄາ​ຣິບບຽນ​ໃນຮອບ​ ເກືອບນຶ່ງ​ທົດ​ສະ​ວັດ​ແລະ​ກໍ​ຄາດ​ວ່າຈະ​ພັດ​ເຂົ້າຖະຫຼົ່ມ​ແຄມ​ຝັ່ງ​ທະ​ເລ​ຂອງ​ສະຫະ ລັດພາຍ​ໃນ​ທ້າຍ​ອາທິດ​ນີ້.

​ເຮີຣິ​ເຄນ Matthew ​ເປັນ​ລົມພາຍຸ​ທີ່​ມີ​ຄວາມ​ແຮງ​ປະ​ເພດ 4 ​ເວລາ​ພັດ​ເຂົ້າຖະຫຼົ່ມ​ເຮ​ຕີ​ໃນ​ວັນ​ອັງຄານ​ວານ​ນີ້​ໂດຍ​ລົມ​ທີ່​ມີ​ຄວາມ​ແຮງ​ເຖິງ 230 ກິ​ໂລແມັດ​ຕໍ່​ຊົ່ວ​ໂມງ ​ພ້ອມ​ທັງຝົນຕົກ ​ໜັກ. ນີ້​ແມ່ນ​ເທື່ອ​ທຳ​ອິດ​ໃນ​ຮອບ 52 ປີທີ່​ລົມພາຍຸ​ມີ​ຄວາມ​ແຮງ​ປະ​ເພດ​ 4 ພັດເຂົ້າຖະຫຼົ່ມ ປະເທດ​ເຮ​ຕີ.

ຜູ້ປົກຄອງລັດ Nikki Haley ປະກາດວ່າ ທ່ານນາງມີແຜນການ ທີ່ຈະສັ່ງໃຫ້ ຍົກຍ້າຍປະຊາຊົນ ປະມານ 1 ລ້ານຄົນ ຈາກເຂດແຄມຝັ່ງ ລັດ South Carolina
ຜູ້ປົກຄອງລັດ Nikki Haley ປະກາດວ່າ ທ່ານນາງມີແຜນການ ທີ່ຈະສັ່ງໃຫ້ ຍົກຍ້າຍປະຊາຊົນ ປະມານ 1 ລ້ານຄົນ ຈາກເຂດແຄມຝັ່ງ ລັດ South Carolina

ພາກ​ໃຕ້​ຂອງ​ປ​ະ​ເທດ​ເຮ​ຕີ ​ເປັນ​ເຂດ​ທີ່​ປະສົບ​ໄພພິບັດ​ທີ່ໂດດດ່ຽວ ຫລັງ​ຈາກ​ລົມພາຍຸ​ໄດ້​ ທຳລາຍ​ສາຍ​ໄຟ​ແລະ​ສາຍ​ໂທລະສັບ ​ແລະ​ໄດ້​ຊຸ​ເ​ອົາຂົວ ທີ່​ມີ​ຢູ່​ພຽງແຫ່ງດຽວ ​ເພື່ອ​ເຊື່ອມ​ຕໍ່​ແຫຼມດັ່ງກ່າວ​ກັບ​ສ່ວນ​ທີ່​ເຫລືອ​ຂອງ​ປະ​ເທດ​ໄປ.

ການ​ສື່ສານລະຫວ່າງ​ນະຄອນຫລວງ​ແລະ​ສາມ​ແຂວງແມ່ນ​ໄດ້​ຖືກ​ຕັດຂາດ ​ເຮັດໃຫ້​ເປັນ​ການ​ຫຍຸ້ງຍາກທີ່​ພວກ​ເຈົ້າໜ້າ​ທີ່​ແລະ​ພະນັກງານ​ໃຫ້ການ​ຊ່ອຍ​ເຫລືອ​ສຸກ​ເສີນ​ທີ່​ຈະ​ຮູ້ຈັກ​ຈຳນວນ​ຜູ້​ບາດ​ເຈັບ​ລົ້ມຕາຍ ​ແລະ​ລາຍ​ລະອຽດ​ຂອງ​ຄວາມ​ເສຍຫາຍ​ທີ່​ໄດ້​ຮັບ.

​ແຕ່​ຜູ້​ສື່​ຂ່າວ​ວີ​ໂອ​ເອ ພາສາ ​Creole ທ່ານ Jean-Hernst Eliscar ກ່າວວ່າ ມີ​ເຮືອນ​ຈຳ ນວນ​ນຶ່ງທີ່​ເມືອງ Les Cayes ຢູ່​ທາງ​ພາກ​ໃຕ້​ຂອງ​ປະ​ເທດ ​ໄດ້​ຖືກນ້ຳ​ຖ້ວມ​ແລະ​ຫລັງຄາ​ຖືກ​ລົມ​ພັດ​ໄປ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG