ສະພາຕ່ຳສະຫະລັດ ຄາດໝາຍວ່າ ຈະລົງຄະແນນສຽງໃນວັນອັງຄານມື້ນີ້ ຕໍ່ການເອົາມາດຕະການລົງໂທດ ທີ່ສາມາດສະກັດກັ້ນບໍ່ໃຫ້ເກົາຫຼີເໜືອເຂົ້າເຖິງເງິນຕາທີ່ເປັນຫຼັກຊັບສຳຄັນ ໃນຄວາມຈຳເປັນຂອງໂຄງການສ້າງອາວຸດນິວເຄລຍ ນັ້ນ.
ທ່ານ Ed Royce ປະທານຄະນະກຳມະການກິດຈະການຕ່າງປະເທດຂອງສະພາຕ່ຳ ສະ ຫະລັດ ທີ່ສັງກັດພັກ Republican ເປັນຜູ້ນຳສະເໜີຮ່າງກົດໝາຍການລົງໂທດດັ່ງກ່າວນີ້ ຊຶ່ງເບິ່ງຄືວ່າ ເປັນການຕອບໂຕ້ຕໍ່ການປະກາດຂອງເກົາຫຼີເໜືອ ໃນສັບປະດາແລ້ວນີ້ ທີ່ວ່າຕົນໄດ້ທຳການທົດລອງນິວເຄລຍເປັນຄັ້ງທີ 4 ຊຶ່ງໃນຄັ້ງນີ້ແມ່ນການທົດອາວຸດນິວເຄລຍທີ່ ມີຄວາມສາມາດໃນການທຳລາຍສູງນັ້ນ. ການກ່າວອ້າງທີ່ວ່ານີ້ ໄດ້ພາໃຫ້ມີຜູ້ຄົນສົງໄສຢ່າງ ແຜ່ຫຼາຍ.
ທ່ານ Royce ໄດ້ກ່າວວ່າ ການຂົ່ມຂູ່ຈາກຄວາມກ້າວລ້ຳໜ້າຂອງໂຄງກການນິວເຄລຍເກົາ ຫຼີເໜືອນັ້ນ ແມ່ນຮັບເອົາບໍ່ໄດ້ ແລະວ່າ ລັດຖະສະພາຄວນຈະເປັນຜູ້ນຳພາເອງ.
ທ່ານ Royce ໄດ້ກ່າວວ່າ “ສຳຄັນໄປກວ່ານີ້ ສິ່ງທີ່ຮ່າງກົດໝາຍສະບັບນີ້ເຮັດ ກໍແມ່ນທຳ ການກົດດັນໂດດດ່ຽວທາງການເງິນແລະການເສດຖະກິດ ຕໍ່ຜູ້ນຳເກົາຫຼີເໜືອ ທ່ານ Kim Jong Un ແລະບັນດາເຈົ້າໜ້າທີ່ຂັ້ນສູງຂອງທ່ານ ບໍ່ໃຫ້ເຂົ້າເຖິງຊັບສິນ ຊຶ່ງພວກເຂົາເຈົ້າໄດ້ຝາກໄວ້ກັບທະນາຄານຕ່າງປະເທດ ແລະເງິນທີ່ໄປຄ້ຳຈຸນການປົກຄອງຂອງພວກເຂົາເຈົ້ານັ້ນ.”
ຮ່າງກົດໝາຍການລົງໂທດຕໍ່ເກົາຫຼີນີ້ ຈະອະນຸມັດໃຫ້ຍຶດເອົາຊັບສິນໃດໆກໍຕາມ ທີ່ພົວພັນ ກັບການແຜ່ຜາຍອາວຸດຂອງເກົາຫຼີເໜືອ ການກະທຳທີ່ຜິດກົດໝາຍຕ່າງໆ ແລະການລະເມີດສິດທິມະນຸດ. ມັນຈະປະຕິເສດບັນດາຜູ້ນຳເກົາຫຼີເໜືອ ບໍ່ໃຫ້ເຂົ້າເຖິງລະບົບການເງິນຂອງສະຫະລັດ ແລະມັນຍັງຈະກົດດັນໃຫ້ປະທານາທິບໍດີ ລົງໂທດຕໍ່ສ່ວນບຸກຄົນ ຜູ້ຊຶ່ງໃຫ້ການສົ່ງເສີມຕໍ່ການໂຈມຕີທາງອິນເຕີແນັດ ຕໍ່ສະຫະລັດນັ້ນນຳ.
ສະພາຄວາມໝັ້ນຄົງອົງການສະຫະປະຊາຊາດ ຊຶ່ງໄດ້ນັດປະຊຸມສຸກເສີນ ຫຼາຍຊົ່ວໂມງ
ຫຼັງຈາກການທົດລອງນິວເຄລຍໃນວັນທີ 6 ມັງກອນ ກໍກຳລັງພິຈາລະນາ ການລົງໂທດ
ຄັ້ງໃໝ່ ຕໍ່ເກົາຫຼີເໜືອ ໃນອັນທີ່ສະແດງໃຫ້ເຫັນວ່າ ເປັນ “ການລະເມີດຢ່າງຈະແຈ້ງ” ຕໍ່ຂໍ້ຕົກລົງສະບັບກ່ອນຂອງອົງການສະຫະປະຊາຊາດ.