ລິ້ງ ສຳຫລັບເຂົ້າຫາ

​ລັດຖະສະພາ ສຫລ ໄດ້ຮັບອະນຸຍາດ ໃຫ້ຈະພິຈາລະນາ ຂໍ້​ຕົກລົງ​ນິວ​ເຄລຍ ກັບອີ​ຣ່ານ


ປະທານສະພາຕ່ຳ ທ່ານ John Boehner ຈາກລັດໂອຮາຍໂອ ຢູ່ທີ່ຫໍລັດຖະສະພາ ຫຼື Capitol Hill ໃນນະຄອນຫຼວງວໍຊິງຕັນ, ວັນທີ 13 ພຶດສະພາ 2015.

ປະທານສະພາຕ່ຳ ທ່ານ John Boehner ຈາກລັດໂອຮາຍໂອ ຢູ່ທີ່ຫໍລັດຖະສະພາ ຫຼື Capitol Hill ໃນນະຄອນຫຼວງວໍຊິງຕັນ, ວັນທີ 13 ພຶດສະພາ 2015.

ສະພາ​ຕ່ຳ​ສະຫະລັດ​ໄດ້​ຮັບ​ຜ່ານ​ຮ່າງ​ກົດໝາຍສະບັບ​ໜຶ່ງ
ດ້ວຍຄະແນນ ສຽງອັນ​ຖ້ວມ​ລົ້ນ ທີ່​ມອບ​ສິດ​ໃຫ້​ລັດຖະສະພາ
ພິຈາລະນາ ອະນຸມັດ ຫຼື ປະຕິ​ເສດ ຕໍ່ຂໍ້​ຕົກລົງ​ນິວ​ເຄລຍກັບ​ອີ​ຣ່ານ.

​ການ​ລົງ​ຄະ​ແນນ​ສຽງ​ໃນ​ວັນ​ພະຫັດ​ວານ​ນີ້ ​ແມ່ນ​ 400 ຕໍ່ 25.
ສະພາ​ສູງ ໄດ້​ຮັບ​ຜ່ານ​ມາດ​ຕະການດັ່ງກ່າວ ​ເມື່ອ​ອາທິດ​ແລ້ວ​ນີ້
ດ້ວຍ​ຄະ​ແນນ ​ສຽງ 98 ຕໍ່ 1 ສຽງ. ທຳນຽບຂາວ ກ່າວ​ວ່າ
ປະທານາທິບໍດີ ບາ​ຣັກ ​ໂອ​ບາ​ມາ ​ທີ່​ຂົ່ມ​ຂູ່​ວ່າ ຈະ​ໃຊ້​ສິດ​ຍັບຍັ້ງ
ຫຼື ວີ​ໂຕ້ ​ຮ່າງ​ກົດໝາຍ​ດັ່ງກ່າວ ບັດ​ນີ້ ມີ​ແຜນ​ທີ່​ຈະ​ເຊັນໃຫ້​ເປັນ
​ກົດໝາຍ.

ຮ່າງ​ກົດໝາຍ​ນັ້ນ ຈະໃຫ້ເວລາແກ່​ລັດຖະສະພາ ​30 ມື້ ​ເພື່ອ​ທົບ​ທວນ ຄືນ ຂໍ້​ຕົກລົງ​ດ້ານ​ນິວ​ເຄລຍ ລະຫວ່າງ​ ອີ​ຣ່ານ ກັບ ສະຫະລັດ ​ແລະ ບັນດາ​ປະ​ເທດ​ມະຫາ​ອຳນາດ​ອື່ນໆ​.

​ໃນ​ລະຫວ່າງ 30 ມື້ດັ່ງກ່າວນັ້ນ ທ່ານໂອ​ບາ​ມາ ຈະ​ຖືກ​ຫ້າມ​ ບໍ່​ໃຫ້​ຍົກ​ເລີກ​ມາດ​ຕະກາ​ນລົງ​ໂທດໃດໆ ຂອງ​ສະຫະລັດຕໍ່​ອີ​ຣ່ານ.

ລັດຖະບານທ່ານໂອ​ບາ​ມາ ​ໄດ້ຄັດຄ້ານຢ່າງແຂງ​ຂັນ​ ຕໍ່​ການ​ທີ່​ໃຫ້​ລັດຖະສະພາ ມີຄຳ​ເຫັນ​ໃດໆ ​ໃນ​ຂໍ້​ຕົກລົງ​ດັ່ງກ່າວ​ ​ເພາະ​ຢ້ານ​ວ່າ ມັນ​ອາດ​ເຮັດ​ໃຫ້ການ​ເຈລະຈາ​ ທີ່​ລະອຽດ​ອ່ອນ​ກັບ​ອີ​ຣ່ານນັ້ນ ລົ້ມ​ແຫລວ.

​ແຕ່​ທ່ານ​ໂອ​ບາ​ມາ ​ໄດ້​ຍົກ​ເລີກ​ການຂົ່ມຂູ່ທີ່ຈະ​ໃຊ້​ສິດ​ຍັບ​ຍັ້ງຂອງ​ທ່ານ ​ໃນຂະນະ​ທີ່ ​ບັນດາ​ຜູ້​ແທນ​ສັງກັດ​ພັກ​ເດໂມ​ແຄ​ຣັດຫຼາຍ​ໆຄົນ ​ໄດ້​ສະໜັບສະໜຸນ​ມາດຕາ​ການດັ່ງກ່າວ​ນັ້ນ ​ແລະ​ບາງ​ຂໍ້​ກຳນົດ​ທີ່​ເຂັ້ມແຂງ​ ຢູ່​ໃນ​ຮ່າງ​ກົດໝາຍນັ້ນ ​ໄດ້​ມີການຜ່ອນເບົາ​ລົງ.

ສະຫະລັດ ​ແລະບັນດາ​ຄູ່​ເຈລະຈາ ​ເຊັ່ນ ອັງກິດ ຈີນ ຝຣັ່ງ ​ເຢຍຣະມັນ ​ແລະ​ຣັດ​ເຊຍ ​ແມ່ນ​ມີ​ກຳນົດວັນ​ເສັ້ນຕາຍໃສ່ ວັນ​ທີ 30 ມີ​ຖຸນາ ເພື່ອໃຫ້​ມີ​ຂໍ້​ຕົກລົງ​ຂັ້ນສຸດ​ທ້າຍ​ກັບ​ອີ​ຣ່ານ.

ອີ​ຣ່ານ ຕົກລົງທີ່​ຈະ​ຕັດ​ໂຄງການກັ່ນ​ທາດ​ຢູ​ເຣນຽມ​ລົງ ​ເພື່ອ​ປ້ອງກັນບໍ່​ໃ​ຫ້ສາມາດ​ນຳໄປສ້າງ ອາວຸດ​ນິວ​ເຄລຍ​ໄດ້.

ມາດຕະການ​ລົງ​ໂທດຕ່າງໆ​ຂອງ​ປະ​ເທດ​ຕາ​ເວັນ​ຕົກ ​ທີ່ໄດ້​ທຳລາຍ​ເສດຖະກິດ ​ຂອງ​
ອີ​ຣ່ານນັ້ນ ກໍຈະ​ໄດ້​ຮັບການຜ່ອນຜັນ​ລົງ​ເຊັ່ນ​ກັນ.

​ເວລາໃດ ມາດຕະ​ການ​ລົງ​ໂທດ​ຕ່າງໆ​ເຫຼົ່ານັ້ນ ຍຸດຕິ​ລົງ ພ້ອມ​ກັນ​ກັບ ວິທີກວດພິສູດວ່າ
ອີ​ຣ່ານປະຕິບັດ​ໄປ​ຕາມ​ຂໍ້​ຕົກລົງຫຼື​ບໍ່​ນັ້ນ ​ແມ່ນ​ລວມຢູ່​ໃນ​ບັນຫາ​ຕ່າງໆ ທີ່​ຍັງຈະ​ຕ້ອງ​ໄດ້​ຮັບ​ການ​ແກ້​ໄຂ.

ອີ​ຣ່ານ ​ໄດ້​ຢືນ​ຢັດ​ຕະຫລອດ​ມາວ່າ ​ໂຄງການ​ນິວ​ເຄລຍຂອງ​ຕົນ ​ແມ່ນ ມີຈຸດປະສົງນຳ​ໃຊ້
ຢ່າງສັນຕິໃນດ້ານ​ພົນລະ​ເຮືອນເທົ່າ​ນັ້ນ.

XS
SM
MD
LG