ລິ້ງ ສຳຫລັບເຂົ້າຫາ

​ໂຮງ​ໄຟຟ້າ ຫົງ​ສາລິກ​ໄນ​ຕ໌ ຈະ​ກໍ່ສ້າງສຳເລັດ​ ​ແລະ​ຜະລິດ​ກະ​ແສ​ໄຟຟ້າ​ ສົ່ງອອກຂາຍໄດ້ ພາຍໃນປີ 2016


​​ໂຄງການ​ໄຟຟ້າ​ພະລັງງານ​ຄວາມ​ຮ້ອນ ຈາກ​ຖ່ານ​ຫິນ ​ໂຮງ​ໄຟຟ້າຫົງ​ສາລິກ​ໄນ​ຕ໌ ​ຢູ່​ເມືອງ​ຫົງ​ສາ ​ແຂວງ​ໄຊ​ຍະ​ບູລີ ​ໄດ້​ຄືບ​ໜ້າ​ໄປ​ແລ້ວ​ ເຖິງ 92.9 ​ເປີ​ເຊັນ ຂອງ​ແຜນການ​ທັງ​ໝົດ.

​ໂຮງ​ໄຟຟ້າຫົງ​ສາລິກ​ໄນ​ຕ໌ຈະ​ກໍ່ສ້າງ ​ໃຫ້​ແລ້ວ​ສຳ​ເລັດ ​ແລະ​
ຜະລິດ​ກະ​ແສ​ໄຟຟ້າ​ເພື່ອສົ່ງ​ອອກ​ໄປ​ຂາຍ​ໃຫ້​ໄທ ​ແລະ​ຕອບ
​ສະໜອງ​ກະ​ແສ​ໄຟຟ້າ​ບາງ​ສ່ວນ​ໃຫ້​ແກ່ການ​ຊົມ​ໃຊ້​ໃນ​ລາວ
ນັບ​ແຕ່​ປີ 2016 ​ເປັນຕົ້ນ​ໄປ.

ທ່ານ​ຄົມ​ເພັດ ​ແກ້ວ​ພິລາ ຫົວໜ້າ​ວິຊາ​ການ​ຝ່າຍ​ປະຊາສຳ​ພັນ ​ໃນໂຄງການ​ໄຟຟ້າ​
ພະລັງງານ​ຄວາມ​ຮ້ອນ ຈາກ​ຖ່ານ​ຫິນ​ຢູ່​ເມືອງ​ຫົງ​ສາ ​ແຂວງ​ໄຊ​ຍະ​ບູລີ ຫຼື ​ໂຮງ​ໄຟຟ້າ
​ຫົງ​ສາລິກ​ໄນ​ຕ໌ນັ້ນ ຖະ​ແຫລ​ງຢືນຢັນ​ວ່າ ການ​ດຳ​ເນີນ​ງານ​ໂດຍລວມຂອງ​ໂຄງການ
​ໄດ້​ຄືບ​ໜ້າ​ໄປ​ແລ້ວ​ເຖິງ 92.9 ​ເປີ​ເຊັນ ຂອງ​ແຜນການ​ທັງ​ໝົດ ​ໂດຍ​ໃນ​ນີ້ ທີ່​ຖື​ວ່າ​ສຳ​ເລັດ
ແລ້ວ​ທັງ 100 ​ເປີ​ເຊັນ ກໍ​ຄື​ການ​ກໍ່ສ້າງ​ສະຖານີ​ຈ່າຍ​ກະ​ແສ​ໄຟຟ້າ ​ແລະ​ການວາງ​ລະບົບ
ສາຍ​ສົ່ງ​ກະ​ແສ​ໄຟຟ້າ​ໄປ​ຂາຍ​ໃນ​ແດນ​ໄທ ລວມ​ເຖິງ​ການວາງ​ລະບົບ​ສາຍ​ສົ່ງ​ພາຍ​ໃນ​
ປະ​ເທດ​ດ້ວຍ.

ສ່ວນ​ທີ່​ກຳລັງ​ດຳ​ເນີນ​ງານ​ຢ່າງ​ຕັ້ງໜ້າ​ຢູ່​ໃນ​ເວລາ​ນີ້ ກໍ​ປະກອບ​ດ້ວຍ​ການ​ກໍ່ສ້າງ​ໂຮງ
ໄຟຟ້າ​ ທີ່​ຄືບ​ໜ້າ​ແລ້ວ 93.6 ​ເປີ​ເຊັນ ການ​ເປີດ​ໜ້າດິນ ​ແລະ​ຕິດຕັ້ງອຸປະ​ກອນ​ສຳ​ຫລັບ
​ຂຸດ​ຄົ້ນຖ່ານ​ຫິນ​ຄືບ​ໜ້າ​ແລ້ວ 88.5 ​ເປີ​ເຊັນ ການ​ຕິດຕັ້ງລະບົບ​ການ​ຈັດການ​ຂີ້​ເຖົ່າ ​ແລະ
ແຮ່​ຈິບຊຳ ກໍ​ຄືບ​ໜ້າ​ແລ້ວ​ເກື​ອບ 90 ​ເປີ​ເຊັນ ​ແລະ​ການ​ຕິດຕັ້ງ​ເຄື່ອງ​ຜະລິດ​ພະລັງງານ​
ໄຟຟ້າ​ທີ່​ມີ​ທັງ​ໝົດ ​3 ​ເຄື່ອງ​ທີ່​ຈະ​ຜະລິດ​ພະລັງງານ​ໄຟຟ້າ​ໄດ້​ລວມກັນ​ເຖິງ 1,876
​ເມ​ກາວັດ​ນັ້ນ ກໍ​ຄາດວ່າ​ຈະ​ຕິດຕັ້ງ​ເຄື່ອງ​ທຳ​ອິດໃຫ້​ແລ້ວ​ສຳ​ເລັດ​ ໃນເດືອນ​ມິຖຸນາ 2015
​ເຄື່ອງ​ທີສອງ​ໃນ​ເດືອນ​ພະຈິກ 2015 ​ແລະ​ເຄື່ອງ​ທີ​ສາມ​ໃນ​ເດືອນ​ມີນາ 2016 ຕາມລຳດັບ.

​ໂດຍ​ພະລັງງານ​ທີ່​ຜະລິດ​ໄດ້​ຈາກໂຮງໄຟຟ້າ​ຫົງ​ສາລິກ​ໄນ​ຕ໌ ດັ່ງກ່າວ​ນີ້ ຈະ​ຖືກ​ແບ່ງ​ອອກ​
ເປັນ 2 ສ່ວນ​ເພື່ອ​ຂາຍ​ໃຫ້​ກັບ​ລັດ​ວິ​ສາ​ຫະກິດ​ໄຟຟ້າ​ລາວ (EDL) ​ໃນ​ປະລິມານ​ລວມ 100 ​ເມກາວັດ ​ແລະ​ທີ່​ເຫຼືອສ່ວນ​ໃຫຍ່ ກໍ​ຄື​ພະລັງງານ​ໄຟຟ້າ​ໃນ​ປະລິມານ​ລວມ​ເຖິງ 1,778 ​ເມ​ກາ​ວັດນັ້ນ ຈະ​ສົ່ງ​ຂາຍ​ໃຫ້​ກັບ​ການ​ໄຟຟ້າ​ຝ່າຍ​ຜະລິດ​ແຫ່ງ​ປະ​ເທດ​ໄທ (EGAT) ຊຶ່ງ​ເປັນ​ສ່ວນ​ໜຶ່ງ​ໃນ​ສັນ​ຍາທີ່​ລັດຖະບານ​ລາວ​ຕົກລົງຈະ​ຂາຍ​ໄຟຟ້າ​ໃຫ້​ໄທ ​ໃນປະ​ລິ​ມານ 7,000 ​ເມ​ກາ​ວັດ ​ເປັນ​ເວລາ 25 ປີ ນັບ​ແຕ່​ປີ 2016 ​ເປັນຕົ້ນ​ໄປ​ນັ້ນ​ເອງ.

ຕົວແບບຈຳລອງ ຂອງໂຄງການ​ໄຟຟ້າ​ພະລັງງານ​ຄວາມ​ຮ້ອນ ຈາກ​ຖ່ານ​ຫິນ​ ໂຮງໄຟຟ້າຫົງສາລິກໄນຕ໌ ຢູ່​ເມືອງ​ຫົງ​ສາ ​ແຂວງ​ໄຊ​ຍະ​ບູລີ.
ຕົວແບບຈຳລອງ ຂອງໂຄງການ​ໄຟຟ້າ​ພະລັງງານ​ຄວາມ​ຮ້ອນ ຈາກ​ຖ່ານ​ຫິນ​ ໂຮງໄຟຟ້າຫົງສາລິກໄນຕ໌ ຢູ່​ເມືອງ​ຫົງ​ສາ ​ແຂວງ​ໄຊ​ຍະ​ບູລີ.

​ທັງ​ນີ້ ລັດຖະບານ​ລາວ​ໄດ້​ວາງ​ແຜນການ ທີ່​ຈະ​ເພີ້​ມຄວາມ​ອາດ​
ສາມາດ ​ໃນ​ການ​ຜະລິດ​ພະລັງງານ​ໄຟຟ້າ ​ໃຫ້​ໄດ້​ໃນ​ປະລິມານ
​ລວມບໍ່​ນ້ອຍ​ກວ່າ 15,260.5 ລ້ານ​ກິ​ໂລ​ວັດ/​ໂມງ​ ໃນ​ປີ 2015
ຊຶ່ງ​ໃນນີ້ ຈະ​ເປັນ​ໄຟຟ້າ​ເພື່ອ​ສົ່ງ​ອອກ​ໄປ​ຕ່າງປະ​ເທດ 11,793.68
ລ້ານ​ກິ​ໂລ​ວັດ/​ໂມງ ຄິດ​ເປັນ​ມູນ​ຄ່າ 535 ກວ່າລ້ານດອນ​ລາ​ຕໍ່​ປີ.

ແຕ່​ຢ່າງ​ໃດ​ກໍ​ຕາມ ການ​ສົ່ງ​ອອກ​ພະລັງງານ​ໄຟຟ້າ​ ຕາມ​ແຜນ
ການ​ດັ່ງກ່າວ ຈະ​ເຮັດ​ໃຫ້​ຍັງ​ຄົງ​ມີ​ພະລັງງານ​ໄຟຟ້າ​ເຫຼືອຢູ່​ໃນ​
ປະລິ​ມາ​ນລວມບໍ່​ເກີນ 3,466.82 ລ້ານ​ກິ​ໂລ​ວັດ/​ໂມງ ​ໃນ
​ຂະນະ​ດຽວ​ກັນ ກໍ​ຄາດໝາຍ​ວ່າ ຄວາມ​ຕ້ອງການ​ຊົມ​ໃຊ້​ພະລັງ​
ງານ​ໄຟຟ້າ​ໃນ​ລາວ ຈະ​ມີ​ປະລິມານ​ລວມ 5,726.98 ລ້ານກິ​ໂລ
​ວັດ/​ໂມງ ຈຶ່ງ​ເຮັດ​ໃຫ້​ຕ້ອງ​ນຳ​ເຂົ້າພະ​ລັງງານ​ໄຟຟ້າ​ຈາກ​ຕ່າງປະ​ເທດ​ໃນ​ປະລິມານ​ລວມ
2,260.16 ລ້ານ​ກິ​ໂລ​ວັດ/​ໂມງ ເພື່ອ​ຕອບ​ສະໜອງ​ກາ​ນຊົມ​ໃຊ້​ໃນ​ປະ​ເທດ​ໃຫ້​ໄດ້ ຢ່າງ​
ພຽງພໍ ຊຶ່ງ​ຄິດ​ເປັນ​ມູນ​ຄ່າ​ເກີນ​ກວ່າ 121 ລ້ານ​ດອນ​ລາ.

​ໃນ​ປັດຈຸບັນ​ມີ​ເຂື່ອນ​ໄຟຟ້າ ທີ່​ກໍ່ສ້າງແລ້ວ​ສຳ​ເລັດ ​ແລະ​ຜະລິດ​ໄຟຟ້າ ​ແລ້ວ​ຈຳນວນ 24 ​ໂຄງການ ສ່ວນ​ທີ່​ກຳລັງ​ຢູ່​ໃນ​ລະຫວ່າງ​ດຳ​ເນີນ​ການ​ກໍ່ສ້າງ​ກໍ​ມີ​ຈຳນວນ 38 ​ໂຄງການ ແລະ​ ອີກ 100 ​ໂຄງການ ຢູ່​ໃນ​ຂັ້ນຂອງ​ການ​ສຶກສາ ສຳ​ຫລວດ​ອອກ​ແບບ ຫຼື ສະ​ແຫວງຫາ​ເງິນ​ທຶນ ທີ່​ຈະ​ນຳ​ໃຊ້​ໃນ​ການ​ກໍ່ສ້າງ​ຕໍ່​ໄປ.

ທັງ​ນີ້ ​ໂດຍ​ຈາກ​ການ​ສຶກສາ ​ໃນ​ລະຍະ​ທີ່​ຜ່ານ​ມາ ພົບ​ວ່າການ​ກໍ່ສ້າງ​ເຂື່ອນ​ໃນ​ລາວ​ຢ່າງ​ເຕັມ​ກຳລັງ​ນັ້ນ ຈະ​ເຮັດ​ໃຫ້​ສາມາດ​ຜະລິດ​ພະລັງ​ງານ​ໄຟຟ້າໄດ້​ລວມກັນ​ລະຫວ່າງ 28,000 ​ເຖິງ 30,000 ​ເມ​ກາ​ວັດ ທັງ​ກໍ​ຍັງ​ຈະ​ສົ່ງ​ຜົນ​ດີ​ຕໍ່​ການ​ພັດທະນາ​ເພື່ອ​ລົບ​ລ້າງ​ບັນຫາ​ຄວາມ​ຍາກຈົນ ຂອງ​ປະຊາຊົນ​ລາວ​ບັນດາ​ເຜົ່າ​ທີ່ຢູ່​ເຂດ​ຊົນ​ນະ​ບົດ​ອີກ​ດ້ວຍ ດັ່ງ​ທ່ານ​ດາ​ວົງ ພອນ​ແກ້ວ ຫົວໜ້າ​ກົມ​ນະ​ໂຍບາຍ ​ແລະ​ແຜນ​ພະລັງງານ ກະຊວງ​ພະລັງງານ​ແລະ​ບໍ່​ແຮ່ ​ໄດ້​ໃຫ້ການ​
ຊີ້​ແຈງ​ວ່າ:

“​ເວລາ​ເຮົາ​ພັດທະນາ​ເຂື່ອ​ໄຟຟ້າ​ນ້ຳຕົກ ມັນ​ຊ່ວຍ​ໃນ​ການ​ພັດທະນາ​ເຂດ​ຊົນນະບົດ ​ເພາະວ່າ​ໂຄງການ​ໄຟຟ້າ​ນ້ຳຕົກ​ນີ້ ສິ​ໄປ​ຕັ້ງຢູ່​ຊົນນະບົດ​ຫ່າງ​ໄກ​ສອກ​ຫຼີກ ສະນັ້ນ ຄັນ​ມີ​ໂຄງການ​ຢູ່​ຈຸດ​ໃດ ຜົນ​ພອຍ​ໄດ້​ກໍ​ຕາມ​ມາ ​ເພາະວ່າ​ເຮົາ​ບໍ່​ໄດ້​ແຕ່​ໄຟຟ້າ ​ເຮົາ​ສິ​ໄດ້​ຖະໜົນ​ຫົນທາງ ຮັກສາ​ແຫ​ລ່ງນ້ຳ​ໄວ້​ໃຊ້ ​ໃນ​ລະດູ​ແລ້ງ ສາມາດ​ລ້ຽງ​ປາ​ໄດ້ ​ເປັນ​ແຫ​ລ່ງອາຫານ ຫຼືວ່າ​ເປັນ​ເຂດ​ທ່ອງ​ທ່ຽວ.”

ນອກຈາກ​ນີ້ ກະຊວງ​ພະລັງງານ ​ແລະ​ບໍ່​ແຮ່ ລາຍ​ງານ​ວ່າ​ບັນດາ​ໂຄງການ​ທີ່​ຈະ​ກໍ່ສ້າງໃຫ້​ແລ້ວ​ສຳ​ເລັດ ພາຍ​ໃນ​ປີ 2015-2016 ມີ​ຢູ່ 20 ​ໂຄງການ​ດ້ວຍ​ກັນ ​ໂດຍ​ໃນ​ນີ້​ກໍ​ເປັນ​ການ​ກໍ່ສ້າງ​ເຂື່ອນ 19 ​ໂຄງການ ​ແລະ​ໂຮງງານ​ຜະລິດ​ກະ​ແສ​ໄຟຟ້າ ຈາກ​ຖ່ານ​ລິກ​ໄນ​ຕ໌ 1 ​ໂຄງການ ຊຶ່ງ​ຈະ​ເຮັດ​ໃຫ້​ຄວາມ​ອາດ​ສາມາດ ໃນ​ການຜະລິດ​ພະລັງງານ​ໄຟຟ້າ​ ໃນ​ລາວເພີ້​ມຂຶ້ນຈາກ 3,000 ​ເມ​ກາ​ວັດ ​ໃນ​ປັດຈຸບັນ ​ເປັນຫຼາຍກວ່າ 7,000 ​ເມ​ກາ​ວັດ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG