ລິ້ງ ສຳຫລັບເຂົ້າຫາ

​ເວົ້າທົ່ວໄປແລ້ວ ຊາວອາເມຣິກັນທຳມະດາສາມັນ ຈະພາກັນກິນຊີ້ນຫຼາຍ​ໂດຍ​ສະ​ເພາະ ​ພວກ​ຊີ້ນ​ແດງ. ຊີ້ນຈະມີ​ໂປຣຕີນຫຼາຍ ​ແຕ່​ດັ່ງທີ່ Carol Pearson ນັກ​ຂ່າວ​ຂອງ VOA ລາຍ​ງານ​ໄປນັ້ນກໍແມ່ນວ່າ ຖ້າ​ຫາກທ່ານ​ຢາກ​ມີ​ຊີວິດ​ຢູ່ຍືນ​ຍາວ ແລະມີ​ສຸຂພາບ​ແຂງ​ແຮງ​ ທ່ານ​ຄວນ​ຫາທາງໄປ​ເອົາ​ທາດ​ໂປຣຕີນ​ ມາຈາກ​ພວກ​ພືດ​ຜັກຫຼາຍກ​ວ່າ. ວັນນະ​ສອນຈະ​ນຳລາຍ ລະອຽດ​ຂອງເລື້ອງນີ້ ມາສະ​ເຫນີ​ທ່ານ​ ໃນ​ອັນ​ດັບ​ຕໍ່​ໄປ.​

ວັນ​ທີ 4 ກໍລະກົດ ເປັນ​ຂອງຊາວອາ​ເມຣິກັນ ບໍ່ຕ່າງຫຽັງກັນກັບhamburger. ບໍ່ຕ້ອງສົງ​ໄສດອກວ່າ ຊາວອາ​ເມຣິກັນ ມັກ​ຮັບ​ປະທານ burgers ​ຫຼາຍ ແຕ່​ ການ​ສຶກສາ​ຄົ້ນ​ຄ້ວາ​ໃໝ່ ​ສະແດງ​ໃຫ້​ເຫັນ​ວ່າ ພວກ​ເຂົາ​ເຈົ້າ​ຄວນ​ຈະ​ມັກ​ຮັກ​ມັນ​ໜ້ອຍ​ລົງກວ່າເກົ່າ.

ທ່ານ ດຣ. Mingyang Song ​ແລະ ທ່ານ​ ດຣ. Andrew Chan ຈາກ​ໂຮງ​ພະ​ຍາ​ບານ​ໃຫຍ່ Massachusetts ​ແລະ​ມະຫາວິທະຍາ​ໄລ Harvard ​ແມ່ນ​ຈຳນວນນຶ່ງ​ທີ່​ທົດ​ສອບ​ຜົນ​ກະທົບຂອງໂປຣຕີນທີ່ໄດ້ມາ​ຈາກ​ພວກ​ສັດ​ແລະ​ພືດ​ຜັກ ທີ່​ມີ​ ​ຕໍ່​ສຸກຂະພາບ​ຂອງ​ຜູ້​ຄົນ. ພວກເພິ່ນພາກັນ​ສຶກສາເບິ່ງຂໍ້ມູນ​ຈາກ​ແຫຼ່ງ​ວິ​ໄຈສຳຄັນ ແລະຍາວນານ ​2 ແຫ່ງ ທີ່​ພົວ​ພັນ​ກັບຜູ້ປະກອບສ່ວນຫຼາຍ​ກວ່າ 130 ພັນ ຄົນ. ພວກ​ນັກ​ຄົ້ນຄວ້າທັງຫຼາຍ ​ໄດ້​ຮວບ​ຮວມ​ເອົາ​ ຂໍ້​ມູນ​ຕ່າງໆ ຈາກການ​ກິນ​ຢູ່ ​ວິຖີ​ຊີວິດແລະ​ດ້ານ​ສຸກຂະພາບຂອງພວກ​ເຂົາ​ເຈົ້າ​ທີ່​ເຂົ້າ​ຮ່ວມ ​ແລະ​ຫຼັງ​ຈາກໄດ້​ວິໄຈສຶກສາ​ແລະ​ວິ​ເຄາະ​ຢ່າງຄົບຖ້ວນລະອຽດແລ້ວ ກໍໄດ້​ສະຫຼຸບ​ດັ່ງ​ນີ້.

ທ່ານ​ໝໍ Andrew Chan ຈາກ​ໂຮງ​ພະ​ຍາ​ບານ​ໃຫຍ່ Massachusetts ກ່າວ​ວ່າ “ພວກ​ໃດ ​ຮັບ​ປະທານໂປຣຕີນ​ຈາກ​ຊີ້ນສັດ ​ເປັນ​ຈຳນວນ​ຫຼວງ​ຫຼາຍ​ ​ແມ່ນ​ມີ​ຄວາມ​ສ່ຽງ​ຕໍ່​ ຄວາມ​ຕາຍສູງກວ່າ ​ໂດຍ​ສະ​ເພາະ ຄວາມ​ຕາຍ​ດ້ວຍ​ໂຣ​ກຫົວ​ໃຈ.”

ສ່ວນ ດຣ. Mingyang Song ຈາກ​ໂຮງ​ພະ​ຍາ​ບານ​ໃຫຍ່ Massachusetts ກ່າວ​ວ່າ “​ແລະ​ວ່າການກິນທີ່ວ່ານີ້ ​ແມ່ນຍິ່ງ​ຮຸນ​ແຮງຫຼາຍ ໃນ​ພວກ​ຜູ້​ຄົນ ທີ່​ມີວິຖີ​ຊີວິດ ທີ່​ບໍ່ມີ ສຸຂະພາບດີ.”

ທາດໂປຣຕີນ​ ​ມີ​ສ່ວນຊ່ອຍ​ໃນ​ການ​ສ້າງ​ແລະ​ປົວແປງກ້າມ​ເນື້ອ​ແລະ​ກະດູກ. ມັນ​ມີ​ຄວາມ​ ຈຳ​ເປັນ ​ແຕ່​ວ່າ​ຊີ້ນ​ແດງ ​ໂດຍ​ສະ​ເພາະແມ່ນມີ cholesterol ຫຼືໄຂມັນຫຼາຍ ຊຶ່ງເປັນສາ​ເຫດ​ຂອງຄວາມ​ສ່ຽງຕໍ່ການເປັນ​ໂຣກຫົວ​ໃຈ. ພວກ​ນັກ​ຄົ້ນ​ຄ້ວາ

​ຄົ້ນ​ພົບ​ວ່າ ​ບັນຫາ​ຂອງໂຣກຫົວ​ໃຈ ​ແມ່ນ​ມີ​ສູງໃນ​ບັນດາຜູ້​ທີ່​ບໍ່​ພຽງ​ແຕ່​ຮັບ​ປະທານ​ຊີ້ນຫຼາຍ ແຕ່​ກັບ​ສູບຢາ​ ແລະ ດື່ມ​ເຫຼົ້າ​ຢ່າງ​ໜັກ ​ແມ່ນ​ພວກ​ທີ່​ມີ​ໂຣກອ້ວນ ຫຼື ພວກນັ່ງ​ດົນໆ.

ນອກນີ້ ພວກ​ເຂົາ​ເຈົ້າ​ຍັງ​ຄົ້ນ​ພົບ​ອີກ​ວ່າ ການປ່ຽນແປງ​ຈາກ​ພວກໂປຣຕີນຈາກ​ສັດ ມາ​ເປັນ ໂປຣຕີນຈາກ​ພວກ​ພືດ​ຜັກ ​ຈະຫຼຸດຜ່ອນ​ຄວາມ​ສ່ຽງຕໍ່​ການ​ເສຍ​ຊີວິດ​ກ່ອນ​ໄວ​ອັນ​ຄວນ.

ທ່ານ​ໝໍ Chan ກ່າວ​ວ່າ “​ເປັນ​ທີ່​ຈະ​ແຈ້ງ​ແລ້ວ ​ໃນ​ຊ່ວງ​ຍາວ​ໄກ​ນັ້ນ ການ​ກິນ​ຢູ່​ທີ່​ປະກອບ​ດ້ວຍທາດໂປຣຕີນທີ່​ມາ​ຈາກ​ພວກພືດ​ຜັກ​ນັ້ນ ​ແມ່ນ​ມີ​ແນວ​ໂນ້ມທີ່​ຈະ​ມີ​ຊີວິດ​ທີ່​ຢືນ​ຍາວ​ກວ່າ ພວກ​ຜູ້​ຄົນ ທີ່​ຮັບ​ປະທານທາດໂປຣຕີນທີ່​ມາ​ຈາກ​ພວກສັດ.”

ເຊີນຫາອ່ານບົດ​ສຶກສາຄົ້ນຄວ້າ​ດັ່ງກ່າວ​ນີ້ ຢູ່ໃນ​ວາລະສານ JAMA International Medicine.

ອ່ານ​ຂ່າວ​ນີ້​ເພີ້​ມຕື່ມ​ເປັນ​ພາສາ​ອັງກິດ

XS
SM
MD
LG