ລິ້ງ ສຳຫລັບເຂົ້າຫາ

ກຣິສ ຈະຈັດຕັ້ງ ລັດຖະບານ ຮັກສາການ ຊົ່ວຄາວຂຶ້ນ

  • ສິງ ບູຣົມມະວົງ

ປະທານາທິບໍດີ Karolos Papoulias ແຫ່ງກຣິສ. ວັນທີ 16 ພຶດສະພາ 2012.

ປະທານ​າທິບໍດີ Karolos Papoulias ​ແຫ່ງ​ກຣິສທໍ​າການ​ພົບ​ປະ​ກັບ​ບັນດາ​ຜູ້​ນໍາ​ພັກ​ການ​ເມືອງ​ຕ່າງໆ​ໃນ​ວັນ​ພຸດ​ມື້​ນີ້ ​ເພື່ອ​ຈັດ​ຕັ້ງ​ລັດຖະບານ​ຮັກສາ​ການ​ຊົ່ວ​ຄາວ​ຂຶ້ນ ຊຶ່ງຈະ​ນໍາພາ​ປະ​ເທດ ທີ່​ປະສົບ​ກັບ​ໜີ້​ສິນຢ່າງ​ໜັກໄປ​ຮອດ​ເວລາ​ມີການ​ເລືອກ​ຕັ້ງ​ໃໝ່ ​ຊຶ່ງ​ກໍານົດ​ຈະຈັດ​ຂຶ້ນ​ໃນເດືອນ​ໜ້າ​ນີ້.

​ພັກ​ການ​ເມືອງ​ສໍາຄັນ​ຕ່າງໆ​ໄດ້​ປະສົບ​ກັບ​ຄວາມ​ລົ້ມ​ແຫຼວ​ອີກ​ຄັ້ງ​ໃໝ່​ເພື່ອ​ປະກອບ​ຄະນະ​ລັດຖະບານ​ປະສົມ​ຂຶ້ນ​ໃນ​ວັນ​ອັງຄານ​ວານ​ນີ້ ຫຼັງ​ຈາກ​ທໍາ​ຄວາມ​ພະຍາຍາມ​ມາ​ຫຼາຍ​ຄັ້ງ​ເພື່ອ​ໃຫ້​ບັນລຸ​ຂໍ້​ຕົກລົງ​ກັນ. ການ​ເລືອກ​ຕັ້ງ​ໃນ​ຕົ້ນ​ເດືອນ​ນີ້ ບໍ່​ມີ​ພັກ​ໃດ​ໄດ້​ຮັບໄຊຊະນະ​ຢ່າງ​ຈະ​ແຈ້ງ.

​ເບິ່ງ​ຄື​ວ່າ ການ​ເລືອກ​ຕັ້ງ​ໃໝ່​ນີ້​ ກໍຈະເຮັດ​ໃຫ້​ສະພາ​ແຫ່ງ​ຊາດ​ຢູ່​ໃນສະ ພາບ​ທີ່​ຄ້າງ​ຄາ​ກັນ ຊຶ່ງ​ຈະ​ບໍ່​ມີ​ພັກ​ການ​ເມືອງ​ພັກ​ໃດ​ໄດ້​ຮັບຄະ​ແນນ​ສຽງ​ພຽງພໍ​ເພື່ອ​ຈັດ​ຕັ້ງ​ຄະນະ​ລັດຖະບານ​ໃໝ່​ຂຶ້ນ​ນັ້ນ. ແຕ່​ພັກ​ປະສົມ​ນິ ຍົມ​ແນວທາງ​ຊ້າຍ​ຈັດພາຍ​ໃຕ້​ການ​ນໍາພາ​ຂອງທ່ານ Alexis Tsipras ຜູ້​ນໍາ​ພັກ Syriza ທີ່​ຄັດຄ້ານ​ຢ່າງແຂງຂັນ​ຕໍ່​ການ​ເອົາ​ມາດ​ຕະການ​ປະ ຢັດ​ມັດທະຍັດ​ຕ່າງໆ​ນັ້ນ ​ໄດ້​ຮັບການ​ສະໜັບສະໜຸນ​ພຽງພໍ​ທີ່​ຈະ​ມີ​ອິດ​ທິ ພົນ​ສໍາຄັນ​ນັ້ນ.

ການ​ກະທໍາ​ເຊ່ນ​ນີ້ ສາມາດ​ນໍາພາ​ກຣິສປະ​ເຊີນ​ໜ້າ​ກັນ​ກັບ​ສະຫະພາບ​ຢູ​ໂຣບ​ໄດ້ ຊຶ່ງ​ພວກ​ຜູ້​ນໍາ​ຂອງ​ປະ​ເທດ​ເຫຼົ່າ​ນັ້ນ​ເຄີຍ​ກ່າວ​ມາວ່າ ກຣິສຈະ​ບໍ່​ໄດ້​ຮັບ​ເງິນ​ກູ້​ຢືມ​ໃດໆ​ຕື່ມ​ອີກນອກຈາກ​ກຣິສຈະ​ປະຕິ​ບັດ​ຕາມແຜນການ ​ລົດ​ໜີ້​ສິນ​ທີ່ຫຍຸ້ງຍາກ​ນັ້ນ​ເສຍ​ກ່ອນ.

ສະພາບ​ການ​ບໍ່​ໄປ​ບໍ່​ມາ​ດ້ານ​ການ​ເມືອງຂອງ​ກຣິສ​ໄດ້​ສົ່ງ​ຜົນ​ກະທົບກະ​ເທືອ​ນຕໍ່​ພວກ​ຕະຫຼາດ​ຮຸ້ນໃນ​ຢູ​ໂຣບ ​ແລະ​ເປັນ​ໄພ​ຂົ່ມຂູ່​ບ່ອນ​ທໍາລາຍ​ຕໍ່​ເຂດ​ທີ່​ໃຊ້​ເງິນ​ຢູ​ໂຣນັ້ນ. ​ເລື້ອງ​ນີ້​ເປັນ​ເລື້ອງ​ສໍາຄັນ​ໃນ​ການ​ພົບ​ປະ​ຫາລື​ກັນ​ຢ່າງ​ເປັນ​ທາງ​ການ​ຄັ້ງ​ທໍາ​ອິດ​ລະຫວ່າງ​ປະທານາ​ທິບໍດີ​ໃໝ່​ຂອງ​ຝຣັ່ງ ທ່ານ Francois Hollande ​ແລະ​ທ່ານນາງ Angela Merkel ນາ ຍົກລັດຖະມົນຕີຂອງ​ເຢຍຣະມັນ. ໃນ​ລະຫວ່າງ​ການ​ພົບ​ປະ​ຫາລື​ກັນ​ໃນ​ວັນ​ອັງຄານ​ວານ​ນີ້​ທີ່​ກຸງ Berlin ຜູ້​ນໍາ​ທັງ​ສອງ​ກ່າວ​ວ່າ ພວກ​ທ່ານ​ສະ ໜັບສະໜຸນກຣິສ​ໃຫ້​ເປັນ​ສະມາຊິກຂອງກຸ່ມ 17 ປະ​ເທດສະຫະພາບ​ຢູ​ໂຣບທີ່​ໃຊ້​ເງິນ​ຢູ​ໂຣຕໍ່​ໄປ.

XS
SM
MD
LG