ລິ້ງ ສຳຫລັບເຂົ້າຫາ

ເຢຍຣະມັນ ປະຕິເສດ ຕໍ່ຂໍ້ສະເໜີ ຂໍເລື່ອນການໃຊ້ໜີ້ ຂອງກຣີສ


ນາຍົກລັດຖະມົນຕີກຣີສ ທ່ານ Alexis Tsipras (ຂວາ) ໂອ້ລົມກັບ ລັດຖະມົນຕີການເງິນຂອງກຣີສ ທ່ານ Yanis Varoufakis ໃນລະຫວ່າງການອອກສຽງເລືອກຕັ້ງ ປະທານາທິບໍດີ ໃນ Athens, ວັນທີ 18 ກຸມພາ 2015.

ເຢຍຣະມັນ ​ໄດ້​ປະຕິ​ເສດ ຕໍ່ຂໍ້​ສະ​ເໜີ ​ຂໍ​ເລື່ອນ​ເວລາ​ອອກ​ໄປອີກ
6 ​ເດືອນ ໃນການ​ໃຊ້​ໜີ້ເພື່ອກອບ​ກູ້​ເສດຖະກິດຂອງ​ກຣີສ ທີ່​ມີ​
ໜີ້​ສິນ​ຖ້ວມ​ລົ້ນ​ນັ້ນ. ​ແຕ່ຕໍ່​ມາ Athens ​ໄດ້​ກ່າວ​ວ່າ​ນາຍົກ
ລັດ​ຖະມົນຕີ​ຄົນ​ໃໝ່​ທີ່​ນິຍົມ​ຊ້າຍ​ຈັດ ທ່ານ Alexis Tsipras ​
ໄດ້​ໂອ້​ລົມ​ກັບ​ນາຍົກລັດຖະມົນຕີເຢຍຣະມັນ ທ່ານ​ນາງ Angela
Merkel ທາງ​ໂທລະສັບ​ທີ່ດຳ ເນີນໄປແບບ “​ສ້າງສັນ” ກ່ຽວ​ກັບ
​ວິ​ກິດ​ການ​ທາງ​ການ​ເງິນນັ້ນ.

ຜູ້ນຳ​ຂອງກຣິສ ​ແລະ ​ເຢຍຣະມັນ ​ໄດ້​ໂອລົມ​ກັນ​ເປັນ​ເວລາ 50
ນາທີ. ​ໃນ​ຂະນະ​ດຽວ​ກັນ Athens ກ່າວ​ວ່າ ​ໄດ້ມີ “​ບັນຍາ​ກາດ
ໃນ​ທາງ​ບວກ”
​ໃນ​ລະຫວ່າງ​ການ​ສົນທະນາ​ກັນນັ້ນ ​Berlin
ພຽງ​ແຕ່​ຢັ້ງຢືນ​ວ່າ ​ໄດ້​ມີ​ການໂທລະສັບ​ຫາ​ທ່ານ​ນາງ Merkel ​ເກີດ​ຂຶ້ນ​ເທົ່າ​ນັ້ນ.

Athens ຂໍ​ຮ້ອງ​ ​ບັນດາເຈົ້າໜີ້​ໃນ​ເຂດ​ຢູ​ໂຣບ ໃຫ້​ເລື່ອນ​ການ​ໃຊ້​ໜີ້ ສຳ​ຫລັບ ​ໂຄງການ​
ກູ້​ຢືມ​ມູນ​ຄ່າ 300 ພັນ​ລ້ານ​ດອນ​ລາ ທີ່​ມີ​ກຳນົດ​ໝົດ​ອາຍຸ​ລົງ​ໃນ​ທ້າຍ​ເດືອນ​ກຸມພາ​ນີ້ ​
ແຕ່ປາສະຈາກ​ການ​ໃຫ້​ສັນຍາ​ວ່າ ຈະ​ສືບ​ຕໍ່​ປະຕິບັດຕາມ​ມາດຕາ​ການ​ປະ​ຢັດ​ມັດທະຍັດ
ທີ່​ໄດ້​ວາງ​ໄວ້ຕໍ່ກຣີສ ​ເພື່ອເປັນ​ການແລກປ່ຽນ ສຳ​ຫລັບການ​ກອບ​ກູ້​ເສດຖະກິດນັ້ນ.

ກຣິສ ​ໄດ້​ພະຍາຍາມ​ເຈລະຈາ​ກັນໃໝ່ ເພື່ອປັບປ່ຽນໂຄງການ​ກອບ​ກູ້​ເສດຖະກິດ ນັບ​ຕັ້ງ​
ແຕ່ ທ່ານ Tsipra ​ໄດ້​ຄວບ​ຄຸມ​ລັດຖະບານ​ໃນ​ເດືອນ​ແລ້ວ​ນີ້ ​ໃນ​ການ​ໂຄສະນາ​ຫາ​ສຽງ
ທ່ານ​ໃຫ້​ຄຳ​ໝັ້ນສັນຍາ​ວ່າ ຈະ​ຍຸດຕິ​ເງື່ອນ​ໄຂການ​ກອບ​ກູ້​ເສດຖະກິດ​ທີ່​ເຂັ້ມງວດ​ນັ້ນ.
​ແຕ່​ເຢຍຣະມັນ ​ແລະ ປະ​ເທດ​ໃນ​ຢູ​ໂຣບອື່ນໆ ຕ້ອງການ​ໃຫ້ Athens ປະຕິ​ບັດ​ຕາມ
​ຄຳ​ໝັ້ນສັນຍາ​ໃນ​ເບື້ອງ​ຕົ້ນ.

​ກະຊວງ​ການ​ເງິນ​ຂອງ​ເຢຍຣະມັນ​ກ່າວ​ວ່າ ​ແຜນການ​ເລື່ອນ​ເວລາ​ຈ່າຍ​ໜີ້​ການ​ກອບ​ກູ້​ເສດຖະກິດກຣີສ ຫຼ້າສຸດນີ້ “​ບໍ່ແມ່ນຂໍ້​ສະ​ເໜີ​ທີ່​ເຂັ້ມແຂງ​ເພື່ອແກ້​ໄຂ​ບັນຫານີ້.”

ການ​ເຈລະຈາ​ຮອບ​ໃໝ່​ອາດ​ມີ​ຂຶ້ນ​ໃນ​ວັນ​ສຸກ​ມື້​ນີ້ ຢູ່​ທີ່​ກອງ​ປະຊຸມ​ຂອງ 19 ລັດຖະມົນຕີ​
ການ​ເງິ​ນ ​ໃນ​ເຂດໃຊ້ເງິນ​ຢູ​ໂຣ.

​ເຢຍຣະມັນ ຊຶ່ງ​ເປັນ​ເຈົ້າໜີ້​ໃຫຍ່​ສຸດຂ​ອງຢູ​ໂຣບ​ໄດ້​ກ່າວ​ຊ້ຳ​ແລ້ວ​ຊ້ຳອີກ​ວ່າ ການ​ເລື່ອນ​
ອອກ​ໄປ​ຂອງ​ທຶນ​ກູ້​ຢືມ​ໃດໆ​ນັ້ນ ແມ່ນກ່ຽວ​ພັນ​ກັບ​ການ​ປະຕິ​ຮູບ​ຕ່າງໆ ​ທີ່​ໄດ້​ຕົກລົງ​ໂດຍ
​ລັດຖະບານ​ກຣີສ ທີ່ ​“​ແຍກ​ອອກ​ບໍ່​ໄດ້​.”

​ໂດຍ​ທົ່ວ​ໄປ​ແລ້ວ ​ເຢຍຣະມັນ ​ໄດ້​ມີ​ຈຸດ​ຢືນ​ຢ່າງ​ໜຽວ​ແໜ້ນ​ວ່າ ການ​ຊ່ວຍ​ເຫຼືອສຳ​ຫລັບ​
ບັນດາປະ​ເທດ​ທີ່​ຫຍຸ້ງຍາກ ຕ້ອງ​ມີ​ເງື່ອນ​ໄຂ​ຕິດ​ພັນ​ມາ​ດ້ວຍ.

XS
SM
MD
LG