ບັນດາຜູ້ນຳຂອງເຈັດປະເທດ ທີ່ເສດຖະກິດຮັ່ງມີທີ່ສຸດນັ້ນ ຮ້ອງການເຕີບໂຕຂອງເສດຖະ ກິດໂລກວ່າ “ເປັນບູລິມະສິດທີ່ຮີບດ່ວນ” ສຳລັບເຂົາເຈົາແລະໄດ້ສະແດງຄວາມເປັນຫ່ວງກ່ຽວກັບ ເກົາຫລີເໜືອ ຣັດເຊຍ ແລະການໂຕ້ແຍ້ງ ທາງທະເລ ໃນຂະນະທີ່ກອງປະຊຸມ ສຸດຍອດຢູ່ຍີ່ປຸ່ນໃກ້ຈະສິ້ນສຸດລົງໃນວັນສຸກ ມື້ນີ້.
ຖະແຫລງການຮ່ວມມ້ວນທ້າຍກອງປະຊຸມ ໄດ້ກ່າວເຖິງບັນຫາຕ່າງໆໃນຂອບເຂດທີ່ກວ້າງຂວາງ ທີ່ກຳລັງປະເຊີນໜ້າກັບເສດຖະກິດໂລກ ໃນຂະນະທີ່ອະທິບາຍເຖິງຄວາມ ແຕກຕ່າງໃນດ້ານແນວຄິດ ລະຫວ່າງພວກຜູ້ນຳຂອງກຸ່ມ G-7 ກ່ຽວກັບການກະຕຸກຊຸກຍູ້ ເສດຖະກິດປະຈຳປີ.
ຖະແຫລງການທີ່ຍາວ 32 ໜ້າປະກາດວ່າ “ຄວາມຮຽກຮ້ອງຕ້ອງການທີ່ອ່ອນແອ ແລະ ບັນຫາໂຄງລ່າງທີ່ບໍ່ໄດ້ຮັບການແກ້ໄຂ ເປັນພາກສ່ວນອັນສຳຄັນໃນການຊັ່ງຊາທີ່ແທ້ຈິງ ແລະໂອກາດໃນການເຕີບໂຕທີ່ອາດມີຂຶ້ນນັ້ນ. ພວກເຮົາຍັງສືບຕໍ່ມີໝາຍໝັ້ນ ເພື່ອຄໍ້າ ປະກັນວ່າ ການເຕີບໂຕນີ້ ແມ່ນປະກອບດ້ວຍທຸກ ພາກສ່ວນ ແລະການເພີ້ິ້ມຂຶ້ນຂອງ ວຽກການ ໃຫ້ຜົນປະໂຫຍດຕໍ່ທຸກພາກສ່ວນຂອງສັງຄົມພວກເຮົາ.
ປະເທດຕ່າງໆໄດ້ເຫັນດີນຳກັນ ຕໍ່ “ການແຂ່ງຂັນໃນການລົດຄ່າ” ເງິນຕາຂອງເຂົາເຈົ້າ ໂດຍມີການຜ່ອນຜັນເພື່ອໃຫ້ບັນລຸນະໂຍບາຍ ທີ່ມີການປະສົມປະສານ ແລະມີຄວາມກ້ຳ ເກິ່ງຫລາຍຂຶ້ນ ເພື່ອໃຫ້ບັນລຸເສັ້ນທາງການເຕີບໂຕທີ່ເຂັ້ມແຂງ ຍືນຍົງແລະສະເໝີຕົ້ນສະ ເໝີປາຍ ໂດຍພິຈາລະນາເຖິງຄວາມຕ້ອງການຂອງ ແຕ່ລະປະເທດໆໄປ.
ໃນຂະນະທີ່ປະທານາທິບໍດີສະຫະລັດ ທ່ານບາຣັກ ໂອບາມາກ່າວເຖິງຄວາມຫວັງໄປໃນ ທາງດີກ່ຽວກັບແຮງກະຕຸ້ນ ໃນການຟື້ນໂຕຄືນແບບຍືນຍົງທີ່ມີຂຶ້ນຢູ່ໃນສະຫະລັດນັ້ນ ນາ
ຍົກລັດຖະມົນຕີຢີ່ປຸ່ນ ທ່ານ Shinzo Abe ໄດ້ສະເໜີແນວຄິດທີ່ບໍ່ຄ່ອຍແຈ່ມໃສປານໃດ ກ່ຽວກັບເສດຖະກິດໂລກ ໂດຍປຽບທຽບສະ ພາບການດ້ານເສດຖະກິດໃນປັດຈຸບັນ ໃສ່ປີ 2008 ເວລາທະນາຄານລົງທຶນ Lehman Brothers ຂອງສະຫະລັດລົ້ມລະລາຍຊຶ່ງ ເຮັດໃຫ້ເສດຖະກິດໂລກຕົກຕ່ຳນັ້ນ.
ບັນດາຜູ້ສັງເກດການຫລາຍທ່ານເຊື່ອວ່າ ທ່ານ Abe ໄດ້ເຮັດການປຽບທຽບນີ້ ເພື່ອປົກ ປ້ອງທ່ານເອງ ທີ່ໄດ້ຊັກຊ້າໃນການຈັດຕັ້ງປະຕິບັດແຜນການເພີ້ມການເກັບພາສີຜູ້ບໍລິໂພກຊາວຍີ່ປຸ່ນ ຊຶ່ງເປັນການເຄື່ອນໄຫວທີ່ບໍ່ໄດ້ຮັບການສະໜັບສະໜູນຈາກບັນດາຜູ້ນຳເຊັນວ່າທ່ານນາງ Angela Merkel ຂອງເຢຍຣະມັນ ທີ່ມີຄວາມລະມັດລະວັງກ່ຽວກັບການໃຊ້ຈ່າຍເງິນຫລວງເພື່ອກະຕຸກຊຸກຍູ້ຕໍ່ການເຕີບໂຕ.
ບັນດາຜູ້ນຳຂອງກຸ່ມ G-7 ຍັງຮຽກຮ້ອງໃຫ້ເກົາຫລີເໜືອ ປະຕິບັດຕາມກົດລະບຽບຂອງ ສະຫະປະຊາຊາດ ແລະຢຸດເຊົາການທົດລອງອາວຸດນິວເຄລຍທັງໝົດ ການຍິງລູກສອນ ໄຟ ແລະ “ການທ້າທາຍເກາະຜິດ” ອື່ນໆນັ້ນ.
