ການໃຫ້ສິນບົນແລະການສໍ້ລາດບັງຫຼວງ ໄດ້ສ້າງຄວາມເສຍຫາຍໃຫ້ແກ່ເສດຖະກິດໂລກ ຫຼາຍເຖິງ 2 ພັນຕື້ໂດລາ ໃນແຕ່ລະປີ ຊຶ່ງເຫລົ່ານີ້ແທນທີ່ຈະສາມາດຖືກນຳໄປໃຊ້ໃນການຕໍ່ສູ້ກັບຄວາມຍາກຈົນ ການສ້າງວຽກເຮັດງານທຳ ແລະໂຄງການສະພາບແວດລ້ອມອື່ນໆນັ້ນ.
ລາຍງານໃໝ່ສະບັບນຶ່ງໂດຍອົງການກອງທຶນສາກົນຫຼື IMF ກ່າວວ່າ ເງິນທີ່ສູນເສຍໃນ ການສໍ້ລາດບັງຫຼວງ ໃນແຕ່ລະປີ ແມ່ນ 2 ເປີເຊັນ ຂອງຜົນຜະລິດຮວມຂອງໂລກ.
ທ່ານນາງ Christine Lagarde ຫົວໜ້າກອງທຶນສາກົນ IMF ກ່າວວ່າ ຜົນກະທົບໂດຍກົງຕໍ່ເສດຖະກິດຂອງການສໍ້ລາດບັງຫຼວງນັ້ນແມ່ນແຈ້ງຂາວ ແຕ່ວ່າ ຜົນກະທົບທາງອ້ອມນັ້ນ ອາດຈະຮ້າຍແຮງໄປກວ່ານີ້ ທີ່ນຳໄປສູ່ “ການຈະເລີນເຕີບໂຕຫລຸດນ້ອຍລົງ ແລະຊ່ອງຫວ່າງລະຫວ່າງລາຍໄດ້ທີ່ບໍ່ເທົ່າທຽມກັນເພີ້ມຂຶ້ນ.”
ທ່ານນາງ Lagarde ກ່າວໃນວັນພຸດວານນີ້ວ່າ “ມັນໄດ້ບ່ອນທຳລາຍຄວາມໄວ້ເນື້ອເຊື່ອໃຈແລະເຮັດໃຫ້ລະດັບມາດຕະຖານຂອງຈັນຍາບັນປະຊາຊົນພົນລະເຮືອນທົ່ວໄປເຊື່ອມໂຊມລົງ.”
ທ່ານນາງ Lagarde ກ່າວວ່າ ບັນດານັກລົງທຶນຊອກຫາບັນດາປະເທດຕ່າງໆ ທີ່ເຈົ້າໜ້າທີ່ລັດຖະບານ ເປັນທີ່ໄວ້ເນື້ອເຊື່ອໃຈໃນລະດັບສູງ ຍ້ອນພວກເຂົາຕ້ອງການທີ່ຈະຄ້ຳປະກັນ ວ່າ ພວກເຂົາເຈົ້າບໍ່ຕ້ອງຈ່າຍເງິນສິນບົນ.
ອົງການກອງທຶນສາກົນ IMF ລະບຸການສໍ້ລາດບັງຫຼວງນີ້ວ່າ “ເປັນການປະຕິບັດໃນທາງຜິດຂອງເຈົ້າໜ້າທີ່ສາທາລະນະ ເພື່ອເຫັນແກ່ຜົນປະໂຫຍດສ່ວນຕົວ.” ແຕ່ວ່າ ມັນຍັງຮວມເຖິງການຫລົບຫລີກບໍ່ເສຍພາສີ ແລະການຍົກເວັ້ນພາສີໂດຍລຳພັງ ທີ່ເຮັດໃຫ້ປະຊາຊົນບໍ່ມີກຳລັງໃຈທີ່ຈະຈ່າຍພາສີ.
ການໃຫ້ສິນບົນແລະການສໍ້ລາດບັງຫຼວງ ພາໃຫ້ລະບົບທະນາຄານອ່ອນແອລົງ ແລະກີດ ກັນພວກຜູ້ຄົນອອກຈາກຕະຫຼາດທາງການເງິນ.
ນອກນັ້ນ ອົງການກອງທຶນສາກົນ IMF ຍັງໄດ້ກ່າວອີກວ່າ ການສໍ້ລາດບັງຫຼວງ ມີຜົນເສຍຫາຍຢ່າງມະຫາສານຕໍ່ທາງສັງຄົມແລະສະພາບແວດລ້ອມ ທີ່ພາໃຫ້ມີການຈັດຕັ້ງປະຕິບັດລະບຽບການທີ່ບໍ່ເຄັ່ງຂັດ ສ້າງມົນລະພີີດເພີ້ມຂຶ້ນ ແລະທຳລາຍຕໍ່ຊັບພະຍາກອນທຳມະຊາດ.
ລາຍງານຍັງໄດ້ລະບຸວ່າ ຫຼາຍໆປະເທດ ໄດ້ຮັບເອົາລະບຽບການມາດຕະຖານສາກົນ ໃນເລື້ອງງົບປະມານແລະການເງິນທີ່ໂປ່ງໃສ ເພື່ອຕໍ່ສູ້ກັບການສໍ້ລາດບັງຫຼວງ ແລະເຮັດໃຫ້ ການຂົ່ມຂູ່ທີ່ຈະລົງໂທດພວກກະທຳຜິດເປັນທີ່ໜ້າເຊື່ອຖື.
ມັນຍັງໄດ້ຮຽກຮ້ອງໃຫ້ມີອົງການຂ່າວທີ່ເສລີ ຊຶ່ງຈະເປັນກຸນແຈສຳຄັນໃນການເປີດເຜີຍບັນ ຫາຕ່າງໆນີ້.