ນາຍົກລັດຖະມົນຕີຝຣັ່ງ ທ່ານ Manuel Valls ໄດ້ເຂົ້າຮ່ວມກັບປະເທດອື່ນໆ ອອກຄວາມເຫັນສະແດງຄວາມເປັນຫວ່ງເປັນໃຍ ກ່ຽວກັບການບໍ່ລົງຮອຍກັນໃນການເລືອກຕັ້ງປະທານາທິບໍດີເມື່ອໄວໆມານີ້ຂອງ Gabon.
ໃນການໃຫ້ສຳພາດກັບສະຖານີວິທະຍຸຝຣັ່ງ ໃນວັນອັງຄານມື້ນີ້ ທ່ານ Valls ໄດ້ກ່າວວ່າ ປະເທດດັ່ງກ່າວ ຄວນຈະຈັດໃຫ້ມີການນັບບັດເລືອກຕັ້ງຄືນໃໝ່ ຫຼັງຈາກທີ່ຝ່າຍຄ້ານ ໄດ້ກ່າວຫາວ່າ ມີການສໍ້ໂກງຄະແນນສຽງກັນ.
“ມັນມີການໂຕ້ຖຽງກັນແລະມີການສົງໄສ. ພວກສັງເກດການຢູໂຣບຢູ່ໃນປະເທດທີ່ໄດ້ພາກັນຕຳນິຕິຕຽນໃນພື້ນຖານຂອງຈຸດປະສົງທີ່ວ່ານີ້. ມັນຈະເປັນການດີກວ່າ ທີ່ຈະມີການນັບຄະແນນສຽງຄືນໃໝ່, ຊຶ່ງທ່ານ Valls ໄດ້ບອກກັບສະຖານີວິທະຍຸ RTL ຂອງຝຣັ່ງ.”
ຄະນະກຳມະການການເລືອກຕັ້ງໃນ Garbon ໃນສັບປະດາຜ່ານມານີ້ ໄດ້ປະກາດວ່າປະທານາທິບໍດີ Ali Bongo ໄດ້ຊະນະຜູ້ນຳຝ່າຍຄ້ານ ທ່ານ Jean Ping ປະມານ 5 ພັນສຽງເທົ່ານັ້ນ ທີ່ຍັງຜົນໃຫ້ມີການປະທ້ວງເກີດຂຶ້ນ ແລະເກີດຄວາມຮຸນແຮງຕາມ ຖະໜົນຫົນທາງ ທີ່ເຮັດໃຫ້ມີຜູ້ເສຍຊີວິດ ຢ່າງນ້ອຍ 6 ຄົນ.
ທ່ານ Saraphin Moundounga ລັດຖະມົນຕີກະຊວງຍຸຕິທຳ Gabon ໄດ້ລາອອກ
ຍ້ອນ ການຂັດແຍ້ງກັນ ກ່ຽວກັບການເລືອກເອົາທ່ານ Bongo ເຂົ້າຮັບຕຳແໜ່ງຕື່ມອີກ ທີ່ກາຍມາເປັນເຈົ້າໜ້າທີ່ຂັ້ນສູງຂອງລັດຖະບານຜູ້ທຳອິດ ທີ່ໄດ້ລາອອກ ນັບຕັ້ງແຕ່ໄດ້ ມີການລົງຄະແນນສຽງ.
ທ່ານ Moundounga ໄດ້ບອກກັບ ສະຖານີວິທະຍຸຝຣັ່ງນາໆຊາດ ໃນວັນຈັນຜ່ານມານີ້ວ່າ ລັດຖະບານ ບໍ່ໄດ້ສະໜອງຕອບຕໍ່ຄວາມເປັນຫວ່ງ ກ່ຽວກັບຄວາມຈຳເປັນໃນການສັນຕິ ພາບ ທີ່ພາໃຫ້ທ່ານຕັດສິນໃຈ ທີ່ລາອອກຈາກຕຳແໜ່ງນັ້ນ.
