ລິ້ງ ສຳຫລັບເຂົ້າຫາ

ຝຣັ່ງ​ ອະນຸມັດ ​ການແຕ່ງງານ​ ຂອງຄົນ​​ເພດ​ດຽວ​ກັນ (ວີດີໂອ)


ຝຣັ່ງ​ໄດ້​ເປັນ​ປະ​ເທດ​ຫຼ້າ​ສຸດ​ ທີ່​ອະນຸມັດ​ໃຫ້ຄົນເພດ​ດຽວ​ກັນ
​ແຕ່ງງານ​ກັນ​ໄດ້​ຢ່າງ​ຖືກຕ້ອງ​ຕາມ​ກົດໝາຍ ແຕ່​ຝ່າຍ​ທີ່​ຄັດ
ຄ້ານປະຕິ​ຍານ​ວ່າ ​ຈະ​ສືບ​ຕໍ່​ຄັດຄ້ານຢູ່​ຕໍ່​ໄປ.

ໃນ​ວັນ​ອັງຄານ​ວານ​ນີ້ ທາງສະພາ​ຝຣັ່ງໄດ້​ຮັບ​ຜ່ານ​ຮ່າງ
ກົດໝາຍ ອະນຸມັດ​ການ​ສົມລົດ ຂອງຄົນເພດ​ດຽວ​ກັນ
​ແລະປະທານາທິບໍດີ ​ທ່ານ France Hollande ​ໄດ້​ກ່າວ
​ວ່າ​ທ່ານ​ຈະ​ລົງ​ນາມຮັບຮອງ​ເອົາ​.

ລັດຖະມົນຕີ​ກະຊວງ​ຍຸຕິ​ທໍາ ທ່ານນາງ​ Christiane Taibira ​
ກ່າວ​ວ່າ​ ຮ່າງ​ກົດໝາຍ​ນີ້ບໍ່​ໄດ້​ລົບລ້າງ​ສິດທິ​ຂອງ​ບຸກຄົນ​ໃດໆ​
ໃນ​ຂະນະ​ທີ່​ມອບ​ສິດທິນັ້ນໃຫ້ຄົນ​ອື່ນ​. ທ່ານນາງ​ກ່າວ​ ຕື່ມວ່າ ການ​ສະຫຼອງ​ສົມລົດ​ຄັ້ງ​
ທໍາ​ອິດຂອງ​ຄົນ​ເພດ​ດຽວ​ກັນ​ນີ້ ​ຈະເປັນສິ່ງ​ທີ່ງົດ​ງາມ.

ພວກ​ທີ່ສະ​ໜັບສະໜູນຮ່າງ​ກົດໝາຍ​ດັ່ງກ່າວໄດ້ພາກັນເປີດ​ເຫຼົ້າ​ຊໍາ​ປາຍສະຫຼອງ ​ແລະ​
ໂອບ​ກອດ​ກັບ​ຄົນ​ຮັກ ​ເພື່ອນ​ຝູງ​ພີ່​ນ້ອງ ​ຫລັງ​ຈາກ​ມີການ​ປະກາດ​ຜົນການ​ສົງ​ຄະ​ແນນ​
ສຽງ​ໃນ​ສະພາ.

ແຕ່ພວກ​ຄັດ​ຄ້ານ​ໄດ້​ລົງ​ສູ່​ຖະໜົນ​ຫົນທາງ​ໃນ​ນະຄອນຫລວງ Paris ​ເພື່ອ​ທໍາ​ການ​ເດີນ
​ຂະ​ບວນປະ​ທ້ວງ. ການ​ປະ​ທ້ວງ​ໄດ້​ກາຍ​ເປັນ​ຄວາມ​ຮຸນ​ແຮງ ຊຶ່ງ​ພວກ​ປະ​ທ້ວງ​ໄດ້​ແກ່ວ​ງ ​
ແກ້ວ ກະປ໋ອງ ​ແລະ​ທ່ອນ​ເຫຼັກ​ໃສ່​ຕໍາຫຼວດ ທີ່​ຮັບ​ມື​ດ້ວຍ​ເເກ໊ສນໍ້າຕາ.

ຜູ້​ນໍາ​ຂອງ​ພວກທີ່​ຄັດຄ້ານ​ຂອງ​ການ​ສົມລົດ​ແພດ​ດຽວ​ກັນ​ ນາງ Frigide Barjot ກ່າວ​ວ່າ:

“​ມີ​ພວກ​ຊາວ​ໜຸ່ມ​ ​ທີ່​ຄັດຄ້ານ​ຕໍ່​ຮ່າງ​ກົດໝາຍ​ສະບັບນີ້​ ຫຼາຍ​ເທົ່າ​ໆ​ກັບພວກ​ຜູ້​ໃຫຍ່​
ທີ່ກໍ​ໄດ້​ ຮັບ​ຜົນກະທົບຢ່າງ​ໃຫຍ່​ຫຼວງ​ຈາກ​ເລື່ອງນີ້ນໍາ ​ເພາະວ່າ ມັນ​ກ່ຽວ​ກັບວິຖີ
ຊີວິດ​ຂອງ​ພວກ​ເຂົາ​ເຈົ້າ​ ມຸມມອງ​ຂອງ​ພວກ​ເຂົາ​ເຈົ້າ ກໍ​ຄື​ກັນ​ກັບພວກ​ເຮົາ​ນັ້ນ​ລະ.
ພວກ​ເຂົາ​ເຈົ້າ​ໄດ້​ສ້າງ​ຄອບຄົວ​ຕາມ​ຫລັກການ​ຂອງ​ການ​ມີຄອບຄົວ​ ທີ່​ມີ​ສາມີພັນ​
ລະ​ຍາຄົນ​ລະ​ເພດ. ​ແຕ່​ພວກ​ເຮົາ​ກໍ​ຈໍາ​ເປັນ​ຕ້ອງ​ໄດ້​ເປີດໃຈຂອງ​ເຂົາ​ເຈົ້າ​ໃຫ້​ຮັບ​
ເອົາ​ແນວ​ຄິດ​ໃໝ່ ​ໂດຍ​ການ​ບອກ​ເລົ່າ ໃຫ້​ພວກ​ເຂົາ​ເຈົ້າ​ຮູ້ວ່າ ມັນ​ມີຄອບຄົວແບບ
ອື່ນ​ນໍາ ​ແຕ່​ນັ້ນ​ກໍ​ບໍ່​ໄດ້​ໝາຍ​ຄວາມ​ວ່າ ພວກ​ເຮົາ​ຕ້ອງໄດ້​ປ່ຽນ​ແປງຫລັກ​ພື້ນຖານ
ຂອງ​ກົດໝາຍ​ພົນລະ​ເມືອງ​ ກ່ຽວ​ກັບການ​ເປັນ​ພໍ່ແມ່ ​ໃນ​ປະ​ເທດຝຣັ່ງ.”


ຝຣັ່ງ​ເປັນ​ປະ​ເທດ​ທີ 14 ທີ່​ໄດ້ຮັບ​ຜ່ານ​ຮ່າງກົດໝາຍອະນຸຍາດ​ໃຫ້ຄົນ​ແພດ​ດຽວ​ກັນ​ແຕ່ງງານ
​ສ້າງ​ຄອບຄົວ​ນໍາ​ກັນ​ໄດ້. ປະ​ເທດ​ອື່ນໆແມ່ນ​ມີ​ຮວມທັງ Canada, Denmark, Sweden ​
ແລະເມື່ອ​ໄວໆ​ມາ​ນີ້ ປະ​ເທດ Uruguay ​ແລະ New Zealand.

ວີດິໂອ: ສະພາແຫ່ງຊາດ ນິວ ຊີແລນ ຮັບຜ່ານກົດໝາຍ ໃຫ້ຄົນເພດດຽວກັນ ແຕ່ງງານກັນ:



ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG