ຊາວ ອາເມຣິກັນ 3 ຄົນ ແລະ ອັງກິດ ໜຶ່ງຄົນ ໄດ້ຮັບກຽດຕິຍົດໃນປະເທດ ຝຣັ່ງ ສຳລັບຄວາມກ້າຫານໃນການຕໍ່ສູ້ເອົາຊະນະມືປືນຕິດອາວຸດຈຳນວນຫຼາຍ ຢູ່ໃນລົດໄຟຄວາມໄວສູງ ທີ່ເດີນທາງລະຫວ່າງນະຄອນຫຼວງ ອຳສເຕີດຳ ແລະ ປາຣິສ.
ປະທານາທິບໍດີ ຝຣັ່ງ Francois Hollande ໄດ້ສະແດງຄວາມຂອບໃຈຕໍ່ປະທານາທິບໍດີ ບາຣັກ ໂອບາມາ ທາງໂທລະສັບໃນວັນເສົາວານນີ້ສຳລັບການກະທຳທີ່ “ເປັນຕົວຢ່າງ” ຂອງທະຫານ ສະຫະລັດ Alek Skarletos ແລະ Spencer Stone, ໂດຍກ່າວວ່າ ພວກເຂົາໄດ້ສະກັດກັ້ນສິ່ງທີ່ອາດຈະເປັນ “ການໂຈມຕີທີ່ຮ້າຍແຮງທີ່ສຸດ.” ທ່ານວາງແຜນທີ່ຈະພົບປະເປັນການສ່ວນຕົວໃນ “ສອງສາມມື້ທີ່ຈະມາເຖິງນີ້” ກັບຜູ້ທີ່ໄດ້ມີສ່ວນຮ່ວມໃນການປາບພວກໂຈມຕີດັ່ງກ່າວ.
ທ່ານ Skarletos, ທ່ານ Stone ແລະ ນັກຮຽນຊາວ ອາເມຣິກາ ທ້າວ Anthony Sadler ແມ່ນໄດ້ຮັບຄວາມຮ່ວມມືໂດຍຊາວ ອັງກິດຄົນໜຶ່ງຊື່ວ່າ ທ້າວ Chris Norman ໃນການປາບມືປືນຊາວ ໂມຣັອກໂກ, ທີ່ໄດ້ເຮັດໃຫ້ຢ່າງໜ້ອຍຜູ້ໂດຍສານຄົນໜຶ່ງໄດ້ຮັບບາດເຈັບສາຫັດ ກ່ອນທີ່ລາວໄດ້ຖືກປຸ້ມໃສ່. ທະຫານກອງທັບອາກາດ ສະຫະລັດ ທ່ານ Stone ໄດ້ຖືກນຳເຂົ້າໂຮງໝໍດ້ວຍອາການບາດເຈັບໜັກ, ຫຼັງຈາກລາວໄດ້ຖືກປາດທີ່ຄໍ ແລະ ມືໂດຍຄົນຮ້າຍດ້ວຍມີດສຳລັບຕັດຫີບຫໍ່.
ທຳນຽບຂາວກ່າວວ່າ ປະທະນາທິບໍດີ ໂອບາມາ ໄດ້ລົມກັບທ່ານ Stone ທາງໂທລະສັບໃນວັນເສົາວານນີ້ ເພື່ອອວຍພອນໃຫ້ລາວຫາຍດີໄວໆ ແລະ ສະແດງຄວາມຂອບໃຈໂດຍຊາວ ອາເມຣິກາ ທຸກຄົນຕໍ່ “ຄວາມກ້າຫານທີ່ພິເສດ” ຂອງລາວຢູ່ໃນລົດໄຟດັ່ງກ່າວ. ທ່ານ Stone, ເປັນຜູ້ນຳໜ້າຂອງການໂຈມຕີມືປືນຄົນນັ້ນ, ຊຶ່ງຕໍ່ມາໄດ້ພົບເຫັນວ່າເດີນທາງອອກຈາກໂຮງໝໍໃນເມືອງ Lille ແລະ ເຂົ້າໄປໃນລົດຕິດປ້າຍການທູດ.
ເຈົ້າໜ້າທີ່ ສະເປນ ກ່າວວ່າພວກເຂົາໄດ້ລະບຸເຖິງຄົນຮ້າຍວ່າເປັນ ຊາຍຫົວຮຸນແຮງ ອິສລາມ ອາຍຸ 26 ປີ ເຊິ່ງລາວໄດ້ໃຊ້ເວລາຢູ່ໃນປະເທດ ຊີເຣຍ ໃນປີທີ່ຜ່ານມາ. ຜູ້ຕ້ອງສົງໃສ, ໄດ້ຖືກລະບຸໂດຍເຈົ້າໜ້າທີ່ວ່າເປັນທ້າວ Ayoub El-Khazzani, ອາໄສຢູ່ໃນເມືອງທ່າເຮືອ Algeciras ຂອງ ສະເປນ ກ່ອນທີ່ລາວຈະຍ້າຍໄປ ຝຣັ່ງ ໃນປີ 2014 ແລ້ວ ໄປຢູ່ ຊີເຣຍ ຕໍ່.
