ຜູ້ສະໝັກເປັນປະທານາທິບໍດີຝຣັ່ງ ທ່ານນາງ Marine Le Pen ແລະທ່ານ Emmanuel Macron ປະເຊີນໜ້າກັນ ໃນໂຕ້ວາທີທາງໂທລະພາບ 2 ຊົ່ວໂມງທີ່ຖ່າຍທອດອອກ
ອາກາດ ໃນວັນພຸດວານນີ້ ບໍ່ເທົ່າໃດມື້ ກ່ອນທີ່ຈະປະເຊີນໜ້າກັນໃນການເລືອກຕັ້ງ
ຮອບຕັດສິນຊີ້ຂາດ.
ທ່ານນາງ Le Pen ກ່າວເຖິງຄູ່ຕຳແໜ່ງຂອງທ່ານນາງ ວ່າເປັນນາຍທຶນທີ່ບໍ່ມີຫົວໃຈ
ອ່ອນແອກັບພວກກໍ່ການຮ້າຍ ໃນຂະນະທີ່ ທ່ານ Macron ໄດ້ເອີ້ນຄູ່ແຂ່ງຂອງທ່ານວ່າ ເປັນຄົນຂີ້ຕົວະແລະເປັນບຸກຄົນຫົວຮຸນແຮງຈັດທີ່ເປັນອັນຕະລາຍ.
ທ່ານນາງ Le Pen ໃນການເປີດການໂຕ້ວາທີ ໂດຍເອີ້ນອະດີດລັດຖະມົນຕີເສດຖະກິດ Macron ວ່າ “ເປັນຜູ້ລົງສະໝັກ ທີ່ອຳມະຫິດຂອງໂລກາພິວັດ.” ສ່ວນທ່ານ Macron ໄດ້ເອີ້ນທ່ານນາງ Le Pen ຜູ້ຊຶ່ງຄັ້ງນຶ່ງ ໄດ້ຖືກບັງຄັບໃຫ້ໄລ່ພໍ່ຂອງທ່ານນາງ ທີ່ນິຍົມ
ຂວາຈັດ ອອກຈາກພັກແນວໂຮມແຫ່ງຊາດ ຫຼື National Front ແລະທ່ານນາງ ກໍໄດ້ຮັບ
ມໍລະດົກຕົກທອດ ມາເປັນຝ່າຍຂວາຈັດຂອງຝຣັ່ງນີ້.
ອັດຕາຂອງຄົນຫວ່າງງານສູງຂອງປະເທດ ກໍເປັນຫົວຂໍ້ຂອງການໂຕ້ວາທີກັນ.
ທ່ານ Macron ໄດ້ຮຽກຮ້ອງໃຫ້ເຮັດກົດລະບຽບຂອງລັດຖະບານງ່າຍຂຶ້ນ ສຳລັບບັນດາ
ທຸລະກິດຂະໜາດ ນ້ອຍແລະຂະໜາດກາງ ໃນຂະນະທີ່ທ່ານນາງ Le Pen ໃຫ້ຄຳໝັ້ນ
ສັນຍາວ່າ ຈະເກັບພາສີ ຜະລິດຕະພັນ ທີ່ບໍລິສັດຕ່າງໆ ສົ່ງໄປຜະລິດຢູ່ຕ່າງປະເທດ.
ໃນເລື່ອງການກໍ່ການຮ້າຍ ທີ່ຍັງຜົນໃຫ້ມີຊາວຝຣັ່ງ 240 ຄົນ ເສຍຊີວິດ ໃນຮອບ 2 ປີ
ຜ່ານມານີ້ ທ່ານນາງ Le Pen ໄດ້ຮຽກຮ້ອງໃຫ້ປິດວັດສາສະໜາອິສລາມທີ່ສົງໄສວ່າ
ເປັນບ່ອນໃຫ້ການອຸບປະຖຳແກ່ພວກຫົວຮຸນແຮງລົງ ໃຫ້ຂະຫຍາຍຄຸກ ແລະຄວບຄຸມ
ຊາຍແດນຝຣັ່ງ. ທ່ານ Macron ຮຽກຮ້ອງໃຫ້ມີການສິ້ງຊອມທາງອິນເຕີແນັຕທີ່ດີກວ່າ
ເກົ່າ ໃຫ້ມີພວກຕຳຫຼວດ ຫຼາຍກວ່າເດີມ ແລະການແບ່ງປັນຂໍ້ມູນສືບລັບທີ່ດີກວ່າເກົ່າ.
ການໂຕ້ວາທີລະຫວ່າງ ທ່ານນາງ Le Pen ທີ່ນິຍົມຂວາຈັດ ແລະຝ່າຍກາງ ທ່ານ
Macronອາດຈະກ້າວເຖິງຈຸດສຸດຍອດໃນການໂຄສະນາຫາສຽງທີ່ດຸເດືອດ ໃນຂະນະທີ່
ຜູ້ສະໝັກທັງສອງ ພະຍາຍາມທີ່ຈະຊອກຫາການສະໜັບສະໜູນ ຈາກພວກຜູ້ລົງ
ຄະແນນຝຣັ່ງຊຶ່ງ 18 ເປີເຊັນຂອງປະຊາຊົນ ຄາດວ່າ ຍັງບໍ່ທັນຕັດສິນໃຈທີ່ຈະເລືອກ
ຜູ້ໃດເທື່ອນັ້ນ.
ການຢັ່ງຫາງສຽງ ໂດຍສະເລ່ຍແລ້ວ ສະແດງໃຫ້ເຫັນວ່າ ທ່ານ Macron ມີຄະແນນ
ສຽງນຳໜ້າ 60 ຕໍ່ 40 ເປີເຊັນ ລື່ນທ່ານນາງ Le Pen ເຖິງແມ່ນວ່າ ການນຳໜ້າຂອງ
ຄະແນນສຽງນີ້ ໄດ້ຫຍັບໃກ້ເຂົ້າມາເປັນປະມານ 3 ເປີເຊັນ ນັບຕັ້ງແຕ່ການປ່ອນບັດ
ຮອບທຳອິດ ໃນວັນທີ 23 ເມສາ ຜ່ານມານີ້.
ອ່ານຂ່າວນີ້ເພີ້ມຕື່ມເປັນພາສາອັງກິດ