ລິ້ງ ສຳຫລັບເຂົ້າຫາ

ອະດີດ ເອກອັກຄະລັດຖະທູດ ສະຫະລັດ ຖືກຫ້າມ ບໍ່ໃຫ້ເດີນທາງ ໄປຣັດເຊຍ


ພາບທ່ານ Michael McFaul ຊຶ່ງໃນເວລານັ້ນ ຍັງເປັນ ເອກອັກຄະລັດຖະທູດ ສະຫະລັດ ທີ່ກຳລັງອອກຈາກ ກະຊວງຕ່າງປະເທດຣັດເຊຍ ທີ່ນະຄອນມົສກູ ວັນທີ 15 ພຶດສະພາ, 2013.

ອະດີດ​ເອກ​ອັກຄະ​ລັດຖະທູດ​ສະຫະລັດ ປະຈຳຣັດ​ເຊຍ ທ່ານ Michael McFaul ກ່າວ​ວ່າ ມົສກູ​ໄດ້​ຫ້າມ​ບໍ່​ໃຫ້​ທ່ານ​ເດີນທາງ​ເຂົ້າປະ​ເທດ.

ທ່ານ McFaul ຜູ້​ທີ່ເຄີຍ​ຮັບ​ຕຳ​ແໜ່​ງ​ເປັນເອກ​ອັກຄະ​ລັດຖະທູດ​ປະຈຳ​ຣັດ​ເຊຍ ​ແຕ່​ປີ 2012 ຫາ 2014 ​ໄດ້​ຂຽນ​ລົງ​ໃນ Facebook ໃນ​ວັນ​ສຸກ​ວານ​ນີ້​ວ່າ ຣັ​ດ​ເຊຍໄດ້​ຫ້າມ​ທ່ານ​ເພາະວ່າທ່ານມີ​ຄວາມ​ໃກ້ຊິດ​ກັບ​ປະທານາທິບໍດີ​ສະຫະລັດ ທ່ານ Barack Obama.

ທ່ານ​ຂຽນຕື່ມ​ວ່າ “ຂ້າພະ​ເຈົ້າ​ໄດ້ຖືກ​ບອກ​ວ່າ ຂ້າພະ​ເຈົ້າ​ຢູ່​ໃນ​ບັນຊີລາຍ​ຊື່​ການລົງ​ໂທດ​ຂອງ​ວັງ Kremlin ​ເພ​າະວ່າມີ​ຄວາມ​ສຳພັນໃກ້ຊິດ​ກັບທ່ານ Obama ຂ້າພະ​ເຈົ້າ​ຈະ​ຖື ເລື້ອງ​ດັ່ງກ່າວ​ນີ້ວ່າ ເປັນ​ການສັນລະ​ເສີນ.”

ທ່ານ McFaul ກ່າວ​ວ່່າ ການເຄື່ອນ​ໄຫວ​ນີ້​ແມ່ນ​ເປັນ​ການ​ຕອບ​ໂຕ້​ຕໍ່ການ​ຫ້າມ ອອກ​ວີ​ຊ່າ​ຂອງ​ສະຫະລັດ ​ແກ່ບັນດາ​ເຈົ້າ​ໜ້າ​ທີ່​ຂັ້ນ​ສູງຣັດ​ເຊຍ ຫລັງ​ຈາກຣັດ​ເຊຍ​ໄດ້ປະກາດ​ຮວມ​ເອົາ​ເຂດ Crimea ​ເປັນສ່ວນ​ນຶ່ງ​ຂອງ​ດິນ​ແດນ​ຂອງ​ຕົນໃນ​ປີ 2014.

ທ່ານ​ກ່າວ​ວ່າ ທ່ານ​ໄດ້​ພົບ​ເຫັນ​ກ່ຽວ​ກັບ​ການ​ຫ້າມນີ້ ​ເວລາ​ທ່ານ​ຍືນ​ຄຳ​ຮ້ອງ​ຂໍ​ວີ​ຊ່າຣັດ​ເຊຍເພື່ອ​ຈະ​ເດີນທາງ​ໄປຍັງ​ປະ​ເທດດັ່ງກ່າວ​ໃນ​ເດືອນ​ທັນ​ວາ​ຈະ​ມາ​ເຖິງ ນີ້ ສຳລັບ​ເຮັດ​ວຽກ​ກ່ຽວ​ກັບການ​ໂອນ​ອຳນາດຂອງປະທານາທິບໍດີ ຖ້າທ່ານ​ນາງ Hillary Clinton ຫາກຊະນະ​ການ​ເລືອກ​ຕັ້ງ.

ທ່ານ McFaul ຊຶ່ງ​ໃນປັດຈຸບັນ​ນີ້​ເປັນ​ອາຈານ​ສອນ ​ຢູ່​ມະຫາວິທະຍາ​ໄລ Stanford ​ໄດ້​ຂຽນ​ຢູ່​ໃນ​ໜ້າ Facebook ວ່າ ທ່ານ​ຫວັງ​ວ່າ​ທ່ານ​ຈະ​ບໍ່​ຢູ່ໃນ​ບັນຊີ​ຫ້າມ​ບໍ່​ໃຫ້ເດີນທາງ ​ເຂົ້າ​ໄປຣັດ​ເຊຍ ​ຕະຫລອດ​ໄປ. “ນັບ​ແຕ່​ປີ 1983 ​ເປັນຕົ້ນມາ ຂ້າພະ​ເຈົ້າ​ເຄີຍ​ໄດ້​ຢູ່ ​ແລະກໍເດີນທາງ​ໄປ​ປະ​ເທດ​ດັ່ງກ່າວ."

​ໃນ​ວັນ​ສຸກ​ວານ​ນີ້ ທ່ານ​ຍັງໄດ້​ສົ່ງ​ຂໍ້ຄວາ​ມຜ່ານ​ທາງ Tweeter ວ່າ “ຂ້າພະ​ເຈົ້າ​ອາດຢູ່​ໃນ​ບັນຊີ​ຫ້າມບໍ່ໃຫ້​ເດີນທາງ ​ມາຕັ້ງ​ແຕ່​ປີ 2014 ເພື່ອ​ເປັນ​ການ​ຕອບ​ໂຕ້​ຕໍ່​ການ​ລົງ​ໂທດ​ຂອງ​ສະຫະລັດ. ຂ້າພະ​ເຈົ້າຫາ​ກໍ່​ຮູ້​ດຽວ​ນີ້​ ​ເພາະວ່າ​ຂ້າພະ​ເຈົ້າ​ໄດ້​ ຍື່ນຂໍ​ວີ​ຊ່າ.”

ອ່ານຂ່າວນີ້ິເພີ້ມເປັນພາສາອັງກິດ

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG