ລິ້ງ ສຳຫລັບເຂົ້າຫາ

ອະດີດ​ປະທານ ບໍລິສັດ​ສ້າງຮູບ​ເງົາ ສຫລ ປະຖິ້ມຊີວິດ ຫລູຫລາ ແລ້ວຫັນໄປ ຊ່ວຍເດັກທຸກຈົນ ໃນກຳປູເຈຍ (ວີດີໂອ ພາສາລາວ/ອັງກິດ)


ຄັ້ງ​ນຶ່ງ Scott Neeson ​ເຄີຍ​ຊ່ວຍນຳ​ເອົາຮູບ​ເງົາ​ຮອລລີ​ວູດ
ເລື້ອງເດ່​ນໆ ອອກ​ສາຍ​ຢູ່​ໂຮງ​ໜັງ​ໃນ​ທົ່ວ​ໂລກ ​ແຕ່​ເມື່ອ 10 ປີ
​ກ່ອນ​ນີ້ ຫລັງ​ຈາກ​ທີ່​ໄດ້​ໄປເຫັນ​ບ່ອນ​ຖິ້ມ​ຂີ້​ເຫຍື່ອທີ່​ເນົ່າ​ເໝັນ
​ແຫ່ງ​ນຶ່ງ ຢູ່ໃນ​ປະ​ເທດກຳປູເຈຍ ລາວ​ໄດ້​ເລີ້ມຫັນ​ໄປ​ຊ່ວຍ​ພວກ
​ເດັກນ້ອຍ​ທີ່​ທຸກ​ຈົນ ​ໃຫ້​ບັນລຸ​ຄວາມ​ຝັນ​ຂອງ​ພວກ​ເຂົາ​ ໃນ​ການ
​ຢາກ​ມີ​ອະນາຄົດ​ທີ່​ດີ​ຂຶ້ນ. Say Mony ນັກ​ຂ່າວວີ​ໂອ​ເອພະ​ແນ​ກ
ພາສາ​ຂະ​ແມ ມີ​ລາຍ​ງານ​ຈາກ​ນະ ຄອນຫລວງ​ພະນົມ​ເປັນ ຊຶ່ງ​
ດາ​ຣາຈະ​ນຳ​ມາສະ​ເໜີ​ທ່ານ.

ເບິ່ງວີດີໂອ ພາສາລາວ ກ່ຽວກັບເລື້ອງນີ້:

ເມື່ອ​ກ່ອນ​ນີ້ ນາງ​ນ້ອຍ Mao Liza ຄົງ​ໄດ້​ໃຊ້​ເວລາ​ສ່ວນ​ໃຫຍ່​ໃນ​ມື້​ນຶ່ງໆ ຊ່ວຍ​ແມ່​ຕູ້​ຂອງ​
ນາງ ​ເລືອກ​ເກັບ​ຂີ້​ເຫຍື້ອ ຢູ່​ບ່ອນ​ຖິ້ມ​ຂີ້​ເຫຍື້ອStung Meanchey ​ໃກ້ໆ​ເຮືອນ​ຂອງ​ນາງ ​
ໃນ​ນະຄອນຫລວງ​ພະນົມ​ເປັນ.

​ແຕ່​ປັດຈຸບັນ ​ເດັກ​ຍິງ​ໄວ 10 ປີ​ຄົນ​ນີ້ ຄິດ​ວ່າ ຕົນ​ມີ​ວຽກ​ເຮັດ​ເຕັມ​ເວລາ​ທີ່ີດີກ່ວາ​ເກົ່າ ນັ້ນ​ກໍ​ຄື
​ໄປ​ໂຮງຮຽນ. ນາງ​ນ້ອຍ Liza ກັບ​ເອື້ອຍ​ໄດ້​ຮັບ​ໂອກາດ ​ໃຫ້​ໄປຮຽນ​ໜັງສື ຈາກ​ອົງການ​
ກອງ​ທຶນ​ເດັກ​ກຳປູ​ເຈ​ຍ ຫລື Cambodian Children's Fund ​ເອິ້ນຫຍໍ້​ວ່າ CCF.

​ເອື້ອຍ​ຂອງ​ນາງ Liza ຊື່​ນາງ Suong Lida ອາຍຸ 15 ປີ ກໍ​ໄ​ດ້ເຊົາຊ່ວຍ​ແມ່ຕູ້​ ເກັບ​ຂີ້​ເຫຍື້ອ
ຄື​ກັນ. ບັດ​ນີ້ ນາງ​ຢູ່​ບ້ານ​ ຊ່ວຍ​ແມ່ຕູ້​ເຮັດ​ວຽກບ້ານ ​ແລະ​ໄປ​ຮຽນ​ພາສາ​ອັງ​ກິດ​ ກັບ​ວິຊາ​ຄອມ​ພິວ​ເຕີ້ ຢູ່​ໂຮງຮຽນ​ຂອງ​ກອງ​ທຶນ CCF.

ນາງ Suong Lida ​ເວົ້າ​ວ່າ: “ຂ້ອຍ​ຢາກ​ໄປ​ຮຽນ​ຢູ່ CCF ກໍ​ເພາະ​ວ່າ ​ເວລາ​ຂ້ອຍ​ມີ​ການ​ສຶກສາ ຂ້ອຍ​ກໍ​ຈະ​ມີ​ວຽກ​ເຮັດ ​ແລະ​ແນ່ນອນ ຍ້ອນ​ວ່າ ຂ້ອຍ​ໄດ້​ຮຽນ​ຟີ ບໍ່​ຕ້ອງ​ເສຍ​ເງິນນຳ.”

ທັງ ​ນາງນ້ອຍ Liza ກັບ​ເອື້ອຍ ນາງ Lida ກໍ​ຄົງ​ຈະ​ບໍ່​ໄດ້​ເຂົ້າ​ໂຮງຮຽນ​ດອກ ຖ້າ Scott Neeson ຜູ້​ກໍ່​ຕັ້ງ​ກອງ​ທຶນ CCF ບໍ່​ໄປ​ເບິ່ງ​ບ່ອນ​ຖິ້ມ​ຂີ້​ເຫຍື້ອ Stung Meanchey ​ເມື່ອ
10 ປີ​ກ່ວາ​ຜ່ານ​ມາ​ແລ້ວ.

Neeson ຊຶ່ງ​ເປັນ​ອະດີດ​ປະທານບໍລິສັດ​ຜະລິດ​ຮູບ​ເງົາ 20th Century Fox International
ທີ່​ຕັ້ງ​ຢູ່​ສະຫະລັດ ກ່າວ​ວ່າ ຊີວິດ​ຂອງ​ລາວ​ປ່ຽນ​ໄປ​ທັນທີ ຫລັງ​ຈາກ​ທີ່​ລາວ​ໄດ້​ເຫັນ​ເດັກນ້ອຍ
​ທີ່​ບໍ່​ສະບາຍ ພາກັນເລືອກເກັບເອົາຂີ້​ເຫຍື້ອ ຢູ່​ເທິງ​ກອງ​ຂີ້​ເຫ​ຍື້​ອສູງໆ​ນັ້ນ.

ທ່ານ Neeson ​ເວັ້າວ່າ “ມັນ​ເປັນ​ພາບທີ່​ປຸກ​ໃຫ້​ຂ້າພະ​ເຈົ້າ​ຕື່ນ​ໂຕ​ຢ່າງ​ແທ້​ຈິງ ​ເພາະ
ວ່າ​ກ່ອນ​ໜ້າ​ນັ້ນ ຂ້າພະ​ເຈົ້າ​ໄດ້​ໃຊ້​ຊີວິດ​ຢ່າງ​ຫລູຫລາ​ຢູ່​ໃນ​ໂລກ​ຕາ​ເວັນຕົກ ຄື​ຂ້າພະ​
ເຈົ້າ​ໃຊ້​ຊີວິດ​ຢູ່​ຮອລລີ​ວູດ ​ເປັນ​ຊາຍໂສດ ທີ່​ຫ້ອມ​ລ້ອມ​ໄປ​ດ້ວຍຜູ້​ສາວ​ງາມຈຳນວນ
​ຫລວງຫລາຍ ​ແລະ​ດາລາ​ຮູບ​ເງົາ ມີ​ເຮືອ​ຫລາຍ​ລຳ ມີ​ລົດຫລາຍ​ຄັນ ​ແລະ​ໃນ​ທັນທີ
​ທັນ​ໃດ ຂ້າພະ​ເຈົ້າກໍ​ມາ​ເຫັນ​ຊີວິດ​ອີກ​ແບບ​ນຶ່ງ ​ແບບທີ່​ວ່າ​ກົງກັນຂ້າມ​ຢ່າງ​ສິ້ນ​ເຊີງ ​
ແລະ​ມັນ​ກໍ​ຍາກ​ທີ່​ຈະ​ຫັນ​ຫລັງ ​ຍ່າງ​ໜີ​ໄປ​ເສີຍໆ ຫລັງ​ຈາກ​ທີ່​ໄດ້​ເຫັນ​ຄວາມທຸກ​ຈົນ​
ນັ້ນ​ແລ້ວ. ຂ້າພະ​ເຈົ້າ​ຫັນ​ຫລັງໃຫ້​ມັນ ບໍ່​ໄດ້​ແທ້ໆ.”

ເດັກຊາຍກຳປູເຈຍຄົນນຶ່ງ ລາກຕີນລົດຖີບ ທີ່ຊອກໄດ້ຢູ່ບ່ອນຖິ້ມຂີ້ເຫຍື້ອ Stung Meanchey ໃນນະຄອນຫລວງພະນົມເປັນ.
ເດັກຊາຍກຳປູເຈຍຄົນນຶ່ງ ລາກຕີນລົດຖີບ ທີ່ຊອກໄດ້ຢູ່ບ່ອນຖິ້ມຂີ້ເຫຍື້ອ Stung Meanchey ໃນນະຄອນຫລວງພະນົມເປັນ.

ນຶ່ງ​ປີ​ຕໍ່​ມາ ທ່ານ Neeson ກໍ​ໄດ້​ຂາຍ​ລົດຂາຍ​ເຮືອ ​ແລ້ວ​ຍ້າຍໄປ​
ຢູ່ກຳ​ປູ​ເຈຍ ​ແລະ​ຕັ້ງ​ກອງ​ທຶນ​ເດັກ​ກຳປູ​ເຈ​ຍ ຫລື CCF ຂຶ້ນ​ມາ.

ນັບ​ແຕ່​ນັ້ນ​ມາ ອົງການ​ຂອງ​ທ່ານ​ກໍ​ໄດ້​ຮັບ​ໃຊ້​ເດັກນ້ອຍ​ຂະ​ເໝນ
ທີ່​ທຸກ​ຍາກ ຈຳນວນຫລາຍ​ພັນ​ຄົນ ທີ່​ພາກັນ​ໄປ​ຮຽນ​ພາສາ​ອັງກິດ
ຄວາມ​ຮູ້​ດ້ານ​ຄອມ​ພິວ​ເຕີ້ ຮຽນ​ຂີດ​ຂຽນ​ຮູບ​ແລະແຕ້ມ​ຮູບ​. ສ່ວນ​
ພວກ​ທີ່​ອາຍຸ​ໃຫຍ່​ກ່ວາ ກໍ​ຮຽນ​ເຝິກ​ແອບ​ເອົາ​ວິຊາ​ຊີບຕ່າງໆ.
ບາງ​ຄົນ​ກໍ​ໄດ້​ໄປ​ຮຽນ ມະຫາວິທະຍາ​ໄລ.

ນອກ​ນັ້ນ ກອງ​ທຶນ CCF ຍັງ​ໄດ້​ໃຫ້ການ​ສະໜັບສະໜຸນທີ່​ຈຳ
​ເປັນ ​ແກ່​ຫລາຍໆ​ຄອບຄົວນັບ​ຕັ້ງ​ແຕ່​ການ​ຮັກສາ​ພະ​ຍາ​ບານ ​ໄປ​ຈົນ​ຮອດ​ການ​ເກື້ອ​ກຸນ​
ດ້ານ​ອາຫານ ​ເພື່ອ​ໃຫ້​ແນ່ໃຈ​ວ່າ ບັນດາ​ພໍ່​ແມ່​ຈະ​ສົ່ງ​ລູກໆ​ຂອງ​ຕົນ ​ໄປ​ຮຽນ​ໜັງສື.

ທ່ານ Neeson ຊຶ່ງ​ຄັ້ງ​ນຶ່ງ​ເຄີຍ​ກຳກັບ​ເບິ່ງ​ນຳ ​ການນຳ​ອອກ​ເຜີຍ​ແຜ່ຮູບ​ເງົາ​ທີ່​ທຳລາຍໄດ້
ມະຫາສານ​ຫລາຍ​ເລື້ອງ ​ເຊັ່ນ​ເລື້ອງ Titanic ກັບ Braveheart ນັ້ນ ກ່າວ​ວ່າ ພໍ່​ແມ່​ຈະ
ບໍ່​ປ່ອຍ​ໃຫ້​ລູກ​ໆ​ມາຮຽນໜັງສື ຖ້າ​ຫາກ​ວ່າ​ເຂົາ​ເຈົ້າ​ບໍ່​ມີ​ເງິນ​ທີ່​ຈະ​ຊື້​ອາຫານ​ລ້ຽງ​ລູກ ຫລື​ວ່າ​ຕ້ອງການ​ໃຫ້​ລູກ​ຜູ້​ໃຫຍ່ຢູ່ບ້ານ ​ເພື່ອດູ​ແລ​ພວກ​ນ້ອງໆ​.

ທ່ານ Neeson ​ເວົ້າ​ວ່າ “ຂ້າພະ​ເຈົ້າ​ເຂົ້າ​ໃຈ​ໄດ້​ຢູ່ ຄື​ເຂົາ​ເຈົ້າ​ຕ້ອງໄດ້ ເລືອກ​ເອົາ ລະຫວ່າງການ​ທີ່ຈະ​ໃຫ້​ລູກ​ໄປ​ໂຮງຮຽນ​ ຫລື​ວ່າ​ຈະໃຫ້ ໄປຊ່ວຍ​ຊອກຫາ​ອາ​ຫານ​
ມາໃສ່​ພາ​ເຂົ້າ ​ຕອນ​ແລງ?”


Sok Phal ອາວຂອງ​ນາງ Liza ກ່າວ​ວ່າ ກອງ​ທຶນ CCF ​ໄດ້​ປ່ຽນ​ແປງ​ຊີວິດ​ຂອງຄອບ
ຄົວ​ຂອງລາວ ທັງ​ໝົດ​ເລີຍ.

Sok Phal ​ເວົ້າ​ວ່າ “​ເຂົາ​ເຈົ້າ​ໄດ້​ຊ່ວຍ​ຫລານ​ສາວ​ຂ້ອຍ​ແລະ​ລູກ​ສາວ​ຂ້ອຍ​ໃຫ້​ໄດ້​
ໄປ​ຮຽນ​ໜັງສື ທັງ​ຢູ່​ໂຮງຮຽນ​ລັດ​ແລະ​ໂຮງຮຽນ​ຂອງ
CCF ​ເອງ ​ເພື່ອ​ຮຽນ​ທັງ​ພາສາ​
ຂະ​ເໝນ​ແລະ​ພາສາ​ອັງກິດ. ​ແຕ່​ກ່ອນ ​ພວກ​ເຂົາ​ແມ່ນ​ບໍ່​ມີ​ໂອກາດ​ໄດ້​ໄປ​ໂຮງຮຽນ​
ເລີຍ ​ເພາະວ່າ​ພວກເຂົາຕ້ອງ​ໄປ ຊ່ວຍ​ເລືອກ​ເກັບ​ອາຫານ​ແລະ​ເຄື່ອງ​ຂອງ ຢູ່​ບ່ອນ​
ຖິ້ມ​ຂີ້​ເຫຍື້ອ ຊ່ວຍ​ຂ້ອຍ ​ເມຍ​ຂ້ອຍ ກັບ​ແມ່​ຂ້ອຍ.”

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG