ຊາວຟີຈີ ໄດ້ພາກັນຢືນເຂົ້າແຖວຍາວຢຽດ ເພື່ອລໍຖ້າລົງຄະແນນສຽງ
ໃນວັນພຸດມື້ນີ້ ໃນ ການເລືອກຕັ້ງເທື່ອທຳອິດຂອງປະເທດ ນັບຕັ້ງ
ແຕ່ອະດີດຜູ້ບັນຊາການກອງທັບບົກ ທ່ານ Voreqe Bainima-
ramaຍຶດອຳນາດ ໃນ ປີ 2006 ເປັນຕົ້ນມາ.
ເປັນທີ່ຄາດກັນວ່າ ການເລືອກຕັ້ງໃນຄັ້ງນີ້ ຈະນຳເອົາໄຊຊະນະ
ຢ່າງງ່າຍດາຍ ມາໃຫ້ນາ ຍົກລັດຖະມົນຕີ Bainimarama ຜູ້ທີ່
ກ່າວວ່າ ການປ່ອນບັດເລືອກຕັ້ງນີ້ແມ່ນສະແດງໃຫ້ເຫັນເຖິງການ
ກັບຄືນໄປສູ່ການປົກຄອງຕາມລະບອບປະຊາທິປະໄຕ.
ພວກທີ່ພາກັນໄປປ່ອນບັດເລືອກຕັ້ງ ຫຼາຍຄົນ ໃນໝູ່ເກາະທີ່ຕັ້ງຢູ່
ໃນເຂດປາຊິຟິກໃຕ້ ທີ່ມີປະຊາກອນ 9 ແສນຄົນນັ້ນ ກ່າວວ່າ ພວກເຂົາເຈົ້າດີໃຈ ຊຶ່ງໃນທີ່
ສຸດກໍສາມາດເລືອກຜູ້ນຳຂອງພວກເຂົາເຈົ້າໄດ້.
ຜູ້ລົງຄະແນນສຽງຄົນນຶ່ງ ກ່າວວ່າ: “ພວກເຮົາມີຄວາມຕື່ນເຕັ້ນຫຼາຍ. ແທ້ໆແລ້ວ ມັນ
ເປັນເວລາດົນນານແລ້ວສຳຫລັບພວກເຮົາທີ່ຈະໄດ້ລົງຄະແນນສຽງເລືອກຕັ້ງນີ້ ແລະການໄດ້ ມີຄວາມຄິດຄວາມເຫັນໃນອະນາຄົດຂອງຟີຈີ. ແມ່ນແລ້ວ, ພວກເຮົາ
ແມ່ນຕື່ນເຕັ້ນຫຼາຍ.”
ເຈົ້າໜ້າທີ່ກຳກັບການເລືອກຕັ້ງ ໄດ້ລາຍງານວ່າ ບໍ່ໄດ້ມີບັນຫາຍຸ້ງຍາກແຕ່ຢ່າງໃດ ໃນຂະນະ
ທີ່ການປ່ອນບັດປິດລົງ ແລະໄດ້ກ່າວວ່າ ການນັບຄະແນນສຽງພວມເລີ້ມຂຶ້ນແລ້ວ. ຜົນຂອງ
ການນັບຄະແນນສຽງເບື້ອງຕົ້ນ ອາດຈະຊາບກັນໃນວັນພະຫັດມື້ອື່ນນີ້.
ຫຼັງຈາກທີ່ ນາຍົກລັດຖະມົນຕີ Bainimarama ໄດ້ປ່ອນບັດແລ້ວ ທ່ານໄດ້ກ່າວວ່າ ທ່ານ
ໝັ້ນໃຈວ່າ ພັກ Fiji First ຈະຊະນະເກືອບວ່າທັງໝົດຂອງບ່ອນນັ່ງຈຳນວນ 50 ບ່ອນຢູ່
ໃນສະພາແຫ່ງຊາດ.
ທ່ານ ກ່າວວ່າ “ພວກເຮົາຕ້ອງການໃຫ້ມີຂັ້ນຕອນການເລືອກຕັ້ງທີ່ໂປ່ງໃສ ແລະທ່ຽງທຳ ເພາະວ່າ ພວກເຮົາໄດ້ພົບເຫັນມາຫຼາຍແລ້ວ ໃນຮອບ 8 ປີທີ່ຜ່ານມານັ້ນ. ພວກເຮົາບໍ່ຢາກ
ໃຫ້ມີການເຮັດຜິດລະບຽບ ໂດຍປ່ຽນແປງກະຕິກາໃນມື້ສຸດທ້າຍນີ້.”
ກອງທະຫານ ໄດ້ຮັບຄຳສັ່ງໃຫ້ກຽມພ້ອມໃນເວລາທີ່ມີການປ່ອນບັດ ທ່າມກາງການເຕືອນ ຂອງເຈົ້າໜ້າທີ່ທະຫານ ຕໍ່ພວກທີ່ພະຍາຍາມຈະ“ສ້າງບັນຍາກາດແຫ່ງການນາບຂູ່ຕ່າງໆ ນັ້ນ.”
