ລິ້ງ ສຳຫລັບເຂົ້າຫາ

ທ່ານ Fidel Castro ອອກມາປາກົດໂຕ ຕໍ່ສາທາລະນະ ເປັນຄັ້ງທຳອິດ ໃນລະຍະນຶ່ງປີ


ພາບຖ່າຍຈາກຈໍຄອມພິວເຕີ ຂອງເວັບໄຊ້ຄິວບາ Cubadebate ສະແດງໃຫ້ເຫັນທ່ານ Fidel Castro ກຳລັງທັກທາຍ ກັບບັນດາຜູ້ສະໜັບສະໜຸນ ໃນນະຄອນຫລວງ Havana ເມື່ອວັນທີ 30 ມີນາ 2015.

ອະ​ດີດ​ປະທານ​ປະ​ເທດຄິວ​ບາ ທ່ານ Fidel Castro ​ໄດ້​ອອກ​ມາ​
ປາກົດ​ໂຕ ​ໃນ​ທີ່​ສາທາລະນະ ​ເປັນຄັ້ງທຳ​ອິດ ​ໃນ​ລະຍະ​ນຶ່ງ​ປີກວ່າ
ຜ່ານ​ມາ ອີງ​ຕາມ​ສື່​ຂ່າວ​ຂອງ​ທາງ​ການ.

ພາບ​ຖ່າຍ 4 ຮູບ ​ໄດ້​ຖືກ​ນຳລົງເຜີຍ​ແຜ່ ທາ​ງອິນ​ເຕີ​ເນັດ ຫຼື online
ສະ​ແດງ​ໃຫ້​ເຫັນ ທ່ານ Castro ອາຍຸ 88 ປີ ນັ່ງ​ຢູ່​ໃນ​ລົດ​ຄັນ​ນຶ່ງ
ກຳລັງຈັບ​ມື​ກັບຜູ້​ຄົນ​ ທີ່​ປາກົດ​ວ່າ ​ເປັນ​ຊາວ Venezuela ຜູ້​
ສະໜັບສະໜຸນທ່ານ ຜ່ານ​ທາງ​ປ່ອງຢ້ຽມ​ລົດ. ພາບ​ເຫຼົ່າ​ນັ້ນ
ສະ​ແດງ​ໃຫ້ເຫັນແຕ່ໃບ​ໜ້າດ້ານ​ຂ້າງຂອງ​ທ່ານ ສ່ວນ​ທີ່​ເຫຼືອ
​ແມ່ນຖືກ​ປົກ​ປິດ ໃຕ້​ມວກ​ແກັບກີລາ baseball ​ແລະ ໜວດເຄົາ
​ທີ່​ເປັນ​ສັນຍາລັກ​ຂອງ​ທ່ານ​.

ລາຍ​ງານ​ຂອງ​ສື່​ຂ່າວ​ຄິວ​ບາ ກ່າວ​ວ່າ ການ​ພົບ​ປະດັ່ງກ່າວ​ ​ໄດ້ເກີ​ດຂຶ້ນເມື່ອ​ວັນ​ຈັນ​ຜ່ານ​ມາ
ແຕ່ ບໍ່​ໄດ້​ອະທິບາຍ ວ່າ​ເປັນ​ຍ້ອນ​ຫຍັງ ​ຮູບ​ພາບ​ດັ່ງກ່າວ ຈຶ່ງ​ໄດ້​ຖືກ​ນຳ​ອອກ​ມາ​ເປີດ​ເຜີຍ
ຫຼາຍມື້​ຕໍ່ມາ​.

ກ່າວ​ກັນ​ວ່າ ​ທ່ານ Castro ​ໄດ້​ພົບ​ປະ​ກັບ​ຄະນະຜູ້​ແທນ Venezuela ທີ່​ໄປ​ຢ້ຽມຢາມ
ຄິວ​ບາ ​ເພື່ອສະ​ແດງຄວາມ​ເປັນ​ເອກະ​ພາບ​ກັນ. ລາຍ​ງານ​ກ່າວ​ອີກ​ວ່າ ທ່ານໄດ້​ເຮັດ​ໃຫ້
ຄະນະຜູ້ຕາງໜ້າ​ Venezuela ປະ​ທັບ​ໃຈ ດ້ວຍ​ການ​ຈັບ​ມື​ທີ່​ໜັກ​ແໜ້ນຂອງ​ທ່ານ ​ແລະ
ຄວາມ​ຄິດ ທີ່​ຊັດ​ແຈ້ງຂອງ​ທ່ານ.

ປະ​ເທດ Venezuela ທີ່​ອຸດົມສົມ​ບຸນດ້ວຍ​ນ້ຳມັນ ​ໄດ້​ເປັນ​ພັນທະ​ມິດ ທີ່​ໃກ້​ຊິດ​ກັບ​ຄິວບາ ​
ເປັນ​ເວລາ​ດົນ​ນານ​ມາ​ແລ້ວ.

ຄັ້ງນີ້ ​ເປັນ​ເທື່ອ​ທຳ​ອິດ ທີ່ ທ່ານ Fidel Castro ​ໄດ້ປາກົດຕົວ​ໃຫ້​ເຫັນ ​ໃນ​ທີ່ສາທາລະນະ
ນັບ​ຕັ້ງ​ແຕ່ ຄິວ​ບາ ​ແລະ ສະຫະລັດ ​ໄດ້​ປະກາດ ການ​ເຄື່ອນ​ໄຫວ​ທີ່​ເປັນ​ປະຫວັດສາດ ​
ເພື່ອຮື້ຟື້ນສາຍສຳພັນ​ທາງ​ການ​ທູດ ​ເປັນ​ຕົ້ນ​ມາ.

XS
SM
MD
LG