ລິ້ງ ສຳຫລັບເຂົ້າຫາ

ຍານສຳຫຼວດ Philae ລົງຈອດ ເປັນປະຫວັດການ ເທິງດາວຫາງ


ຮູບແຕ້ມຍານສຳຫຼວດ Philae ຂອງອົງການອະວະກາດຢູໂຣບ

ຍານສຳຫຼວດ​ຂອງອົງການ​ອາ​ວະ​ກາດ​ຢູ​ໂຣບ ​ຫຼື ESA ໄດ້​ລົງ​
ຈອດ​ເປັນປະຫວັດການ ຢູ່ເທິງດາວຫາງ ​ແຕ່​ກໍຍັງ​ບໍ່ຮູ້ຈັກສະພາບ
ຢ່າງ​ແນ່ນອນ​ເທື່ອ ຫລັງຈາກ​ເຄື່ອງມື​ ບໍ່ສາມາດແທງລົງໄປ ໃນ​ພື້ນ
​ຜິວຂອງດາວຫາງ ເພື່ອໃຫ້ເກາະຕິດຢູ່ນັ້ນ.

ບັນດາ​ເຈົ້າໜ້າ​ທີ່ຂອງອົງການ ESA ກ່າວ​ວ່າ ​ຍານນ້ອຍ ທີ່​ມີ​ຊື່ວ່າ
Philae ​ໄດ້​ລົງ​ຈອດ​ຕາມ​ໝາຍ​ກຳນົດ​ ​ໃນ​ວັນ​ພຸດວານນີ້ ຫຼັງຈາກ
ໄດ້​ເວີ່ນລົງ 7 ຊົ່ວ​ໂມງ ຈາກຍານແມ່ Rosetta ທີ່ໂຄຈອນຢູ່ນັ້ນ.
​ແຕ່ ໃນ​ລະຫວ່າງການ​ເວີ່ນລົງຈອດ ສູ່ພື້ນຜິວ​ຂອງດາວຫາງນັ້ນ
ເຄື່ອງມືທີ່ອອກແບບ ​ເພື່ອ​ໃຫ້ຍານ​ຢຶດຕິດຢູ່ກັບພື້ນດາວຫາງ​ ບໍ່
​ທຳ​ງານ​.

ຮູບພາບຂອງດາວຫາງ 67P/Churyumov-Gerasimenko ທີ່ຖ່າຍຈາກ ມຸມກ້ອງແຄບໆ ຊື່ວ່າ OSIRIS ຂອງຍານແມ່ Rosetta, ວັນທີ 3 ສິງຫາ 2014.
ຮູບພາບຂອງດາວຫາງ 67P/Churyumov-Gerasimenko ທີ່ຖ່າຍຈາກ ມຸມກ້ອງແຄບໆ ຊື່ວ່າ OSIRIS ຂອງຍານແມ່ Rosetta, ວັນທີ 3 ສິງຫາ 2014.

ບັນດາ​ເຈົ້າໜ້າ​ທີ່​ກ່າວ​ວ່າ ຍານ​ສຳຫຼວດລຳນີ້ ອາດໄດ້ຟົ້ງຂຶ້ນເປັນ
ເວລາ ສັ້ນໆ ຫລັງຈາກ ລົງຈອດໃນຕອນທຳອິດ ຢູ່ເທິງພື້ນຜິວ
ດາວຫາງ ທີ່ມີຊື່ ວ່າ 67P/Churyumov-Gerasimenko ກ່ອນ
ທີ່​ຈະຕົກລົງສູ່​ພື້ນ​ດາວ ຫາງຄືນອີກ.

ການ​ລົງ​ຈອດດັ່ງກ່າວນີ້ ​ແມ່ນເປັນ​ຈຸດ​ສຸດຍອດ ຂອງ​ການ​ເດີນ
ທາງ​ຈາກ​ໂລກ ເປັນ​ເວລາ 10 ປີ ທີ່​ໄລຍະໄກເຖິງ 6 ຕື້ ກິ​ໂລ​ແມັດ.
ຍານແມ່ Rosetta ​ໄດ້​ໃຊ້ແຮງຖ່ວງໂຄຈອນອ້ອມ​ໂລກເຖິງ 3 ຮອບ
​ແລະ ​ອ້ອມດາວ​ພະອັງຄານຄັ້ງນຶ່ງ ກ່ອນ​ມັນ​ຈະ​ສາມາດ​ລວບ​ລວມ
ຄວາມ​ໄວໃຫ້ສູງຂຶ້ນ ​ເພື່ອໃຫ້ໄປ​ເຖິງ​ດາວຫາງ​ດັ່ງກ່າວ​ ຊຶ່ງ​ມັນ​ກໍໄດ້
ມີຂຶ້ນ ໃນ​ເດືອນສິງຫາ​ປີ​ນີ້.

ວີດີໂອ ອະທິບາຍ ການລົງຈອດຂອງຍານ Philae:

XS
SM
MD
LG