ລິ້ງ ສຳຫລັບເຂົ້າຫາ

ຢູໂຣບ ປະກາດແຜນການ ຫຼຸດໜີ້ສິນ ໃຫ້ແກ່ກຣິສ (ເບິ່ງວີດີໂອ)

  • ໄພສານ ວໍຣະຈັກ

ປະທານາທິບໍດີຝຣັ່ງ ທ່ານ Nicolas Sarkozy ຖະແຫຼງຂ່າວໃນຕອນທ້າຍຂອງກອງປະຊຸມສຸດຍອດບັນດາປະ ເທດທີ່ໃຊ້ເງິນຢູໂຣ ທີ່ນະຄອນ Brussels (27 ຕຸລາ 2011)

ພວກຜູ້ນຳຂອງສະຫະພາບຢູໂຣບ ໄດ້ປະກາດກ່ຽວກັບແຜນການສະບັບນຶ່ງໃນວັນພະຫັດມື້ນີ້ ເພື່ອຫຼຸດຜ່ອນລົງຢ່າງສຳຄັນ ພາລະໜີ້ສິນຂອງກຣີສ ແລະເສີມຂະຫຍາຍກອງທຶນໃຫ້ຄວາມ
ຊ່ອຍເຫຼືອແກ່ບັນດາປະເທດທີ່ໃຊ້ເງິນຢູໂຣອັນເປັນພາກສ່ວນນຶ່ງໃນການດຳເນີນຄວາມພະຍາ
ຍາມໃນຂອບເຂດທີ່ກວ້າງຂວາງເພື່ອຈຳກັດຂອບເຂດວິກິດການໜີ້ສິນຂອງ​ເຂດຢູໂຣ.

ລຸນຫຼັງການເຈລະຈາກັນຢ່າງຂຸ້ນຂ້ຽວເປັນເວລາ 10 ຊົ່ວໂມງທີ່ນະຄອນ Brussels ພວກຜູ້
ນຳຂອງສະຫະພາບ​ຢູ​ໂຣບກ່າວວ່າ ພວກຕົນ​ໄດ້​ເກ້​ຍກ່ອມ​ໃຫ້ພວກນັກລົງທຶນຈາກພາກເອກ
ກະຊົນຮັບເອົາການສູນເສຍ 50% ຈາກພັນທະບັດຂອງລັດຖະບານກຣີສ ຊຶ່ງຈະຍັງຜົນໃຫ້ມີ ການຫຼຸດໜີ້ສິນຂອງກຣີສລົງເຖິງ 140 ຕື້ໂດລາ.

ການຕົກລົງທີ່ວ່ານີ້ຈະເຮັດໃຫ້ພັນທະໜີ້ສິນຂອງກຣີສຫຼຸດລົງມາ​ເຫລືອ​ຢູ່ 120% ຂອງຍອດ
ຜະລິດຮວມພາຍໃນ ຫຼື GDP ຂອງກຣີສພາຍໃນປີ 2020 ຈາກລະດັບ 160% ໃນເວລາ
ນີ້.

ເພື່ອໃຫ້ສາມາດຮັບມືໄດ້ກັບການສູນເສຍຈາກພັນທະບັດກຣີສນັ້ນທະນາຄານທີ່ສຳຄັນໆຂອງ
ຢູໂຣບຈະຕ້ອງໄດ້ຊອກຫາເງິນມາເພີ່ມຕື່ມ 148 ຕື້ໂດລາພາຍໃນເດືອນມິຖຸນາປີໜ້າ.

ນອກນັ້ນ ພວກຜູ້ນຳຂອງສະຫະພາບຢູໂຣບຍັງໄດ້ຕົກລົງກັນທີ່ຈະ​ເສີມກຳລັງໃຫ້ແກ່ກອງທຶນ
ຊ່ອຍເຫຼືອປະເທດໃຊ້ເງິນຢູໂຣທີ່ໄດ້ຫຼ່ອຍຫຼໍລົງໄປແລ້ວນັ້ນ ໂດຍຈະເພີ່ມ​ຊັບພະຍາກອນ​ຂອງ
ກອງທຶນນີ້ຂຶ້ນ​ເປັນ 1 ພັນ 400 ຕື້ໂດລາ.

ຕະຫຼາດຄ້າຮຸ້ນຂອງຢູໂຣບໄດ້ມີປະຕິກິລິຍາຕອບໄປໃນທາງບວກ ໂດຍທີ່ເງິນຢູໂຣບໄດ້ມີຄ່າ
ສູງຂຶ້ນ ລຸນຫຼັງທີ່ໄດ້ມີການປະກາດ ກ່ຽວກັບແຜນການດັ່ງກ່າວ. ຕະຫຼາດຮຸ້ນທີ່ກຸງລອນດອນ
ປາຣີ ແລະນະຄອນ Frankfurt ຕ່າງກໍມີລາຄາສູງຂຶ້ນເວລາເປີດຕະຫຼາດໃນຕອນເຊົ້າມື້ນີ້.

ລັດຖະມົນຕີກະຊວງການເງິນຝຣັ່ງທ່ານ Francois Baroin ກ່າວວ່າການຕົກລົງທີ່ວ່ານີ້ໄດ້
ຍັງຜົນໃຫ້ມີການຊ່ອຍກອບກູ້ ການໃຊ້ເງິນສະກຸນດຽວກັນຂອງຢູໂຣ ໂດຍກ່າວຕໍ່ວິທະຍຸຝຣັ່ງ
ວ່າ ມັນຈະສ້າງຄວາມທຸ່ນທ່ຽງໃຫ້ແກ່ບັນດາປະເທດທີ່ໃຊ້ເງິນຢູໂຣແລະການເຕີບໂຕຂອງເສດ
ຖະກິດໂລກ. ປະທານທະນາຄານໂລກ ທ່ານ Robert Zoellick ໄດ້ກ່າວຊົມເຊີຍການຕົກ
ລົງດັ່ງກ່າວດັ່ງດຽວກັນກັບພວກເຈົ້າໜ້າທີ່ຢູ່ຈີນແລະຍີ່ປຸ່ນ.

XS
SM
MD
LG