ລິ້ງ ສຳຫລັບເຂົ້າຫາ

ເຢຍຣະມັນ ຖືກກົດດັນ ໃຫ້ໂຍະຍານ ມາດຕະການ ປະຢັດມັດທະຍັດ ຕໍ່ກຣີສ (ວີດີໂອ)

  • ທອງປານ ເທບວົງສາ
  • ສິງ ບູຣົມມະວົງ

ນາຍົກລັດຖະມົນຕີອິຕາລີ Mario Monti (ຊ້າຍ) ທ່ານນາງ Angela Merkel ນາຍົກລັດຖະມົນຕີເຢຍຣະມັນ ແລະທ່ານ Francois Hollande
ປະທານາທິບໍດີຄົນໃໝ່ຝຣັ່ງ (ຂວາ) ທີ່ກອງປະຊຸມສຸດຍອດ EU

ນາຍົກລັດຖະມົນຕີອິຕາລີ Mario Monti (ຊ້າຍ) ທ່ານນາງ Angela Merkel ນາຍົກລັດຖະມົນຕີເຢຍຣະມັນ ແລະທ່ານ Francois Hollande ປະທານາທິບໍດີຄົນໃໝ່ຝຣັ່ງ (ຂວາ) ທີ່ກອງປະຊຸມສຸດຍອດ EU

ທ່ານ​ນາງ Angela Merkel ນາຍົກລັດຖະມົນຕີ​ເຢຍຣະມັນ ປະ​ເຊີນກັບ ​ຄວາມ​ກົດ​ດັນ​ເມື່ອ​ວັນ​ພຸດ​ວານ​ນີ້ ທີ່ນະຄອນ Brussels ປະ​ເທດ​ເບ​ລຢ້ຽມ ​ເພື່ອ​ໂຍະຍານ​ມາດ​ຕະການ​ປະຢັດ​ມັດທະຍັດ​ດ້ານ​ເສດຖະກິດ ທີ່ຂົ່ມຂູ່​ຈະ​ຜັກ​ດັນ​ໃຫ້ກຣີສ ອອກ​ຈາກ​ປະ​ເທດ​ທີ່​ໃຊ້​ເງິນ​ຢູ​ໂຣນັ້ນ.

ບັນດາ​ຜູ້​ນໍາ 27 ປະ​ເທດ​ຂອງ​ສະຫະພາບ​ຢູ​ໂຣບ ​ໄດ້​ປຶກສາ​ຫາລື​ກັນ​ກ່ຽວ ກັບ​ແນວທາງ​ທີ່​ຈະເລັ່ງລັດ​ການ​ເຕີບ​ໂຕ​ເສດຖະກິດ​ທົ່ວ​ຂົງ​ເຂດ ​ແລະ​ແກ້ ​ໄຂ​ວິ​ກິດການ​ດ້ານ​ເງິນຕາ ​ໃນ​ລະຫວ່າງ​ການ​ຮັບ​ປະທານ​ອາຫານ​ຄໍ່າ​ສຸດ​ຍອດ​ທີ່​ນະຄອນຫຼວງຂອງ​ເບ​ລຢ້ຽມ​.

ຝຣັ່ງ ​ແລະ ​ເຢຍຣະມັນ ຊຶ່ງ​ຄັ້ງ​ນຶ່ງ​ເຄີຍຮ່ວມ​ກັນໃຫ້​ມີ​ການ​ຮັບ​ເອົາ​ມາດ​ຕະການ​ທີ່​ເຄັ່ງ​ຄັດ​ນັ້ນ ບັດ​ນີ້​ມີ​ທ່າ​ທີ​ທີ່​ຂັດ​ແຍ້​ງ ກັນ ນັບ​ຕັ້ງ​ແຕ່​ທ່ານ Francois Hollande ປະທານາທິບໍດີ​ຄົນ​ໃໝ່​ສັງກັດພັກ​ສັງ​ຄົມນິຍົມ ຂອງຝຣັ່ງ ​ເຂົ້າມາ​ບໍລິຫານ​ປະ​ເທດ​ເມື່ອ​ຕົ້ນ​ເດືອນ​ນີ້.

ທ່ານ Hollande ກໍາລັງ​ຮຽກຮ້ອງ​ໃຫ້​ເອົາ​ການ​ເຕີບ​ໂຕ​ເສດຖະກິດ ​ເປັນວິທີ​ທາງ​ໃຫ້ພົ້ນ​ຈາກ​ວິກິດ​ການ ​ແທນທີ່​ຈະ​ໃຊ້​ມາດ​ຕະການ​ປະຢັດ​ມັດທະຍັດ​ພຽງ​ຢ່າງດຽວ​ເທົ່າ​ນັ້ນ. ນອກ​ນີ້​ແລ້ວ ຜູ້​ນໍາ​ເຢຍຣະມັນ ຍັງ​ກ່າວ​ວ່າ ທ່ານ​ນາງ​ພ້ອມ​ແລ້ວ ທີ່​ຈະ​ຊອກ​ຫາຊ່ອງ​ທາງ​ຕ່າງໆ​ ສຳ​ຫຼັບ​ຊ່ວຍ​ເຫຼືອກຣີສ​ຢູ່ ​ແຕ່​ໄດ້​ປະຕິ​ເສດຕໍ່ການ​ຮຽກຮ້ອ​ງ​ໃຫ້​ມີ​ອອກພັນທະບັດ​ເງິນ​ຢູ​ໂຣ ຊຶ່ງ​ເປັນ ການມີ​ໜີ້​ສິນຮ່ວມ​ກັນ​ຂອງ​ປະ​ເທດ​ທີ່​ໃຊ້​ເງິນ​ຢູ​ໂຣນັ້ນ ​ໂດຍ​ກ່າວ​ວ່າ ວິທີ​ການ​ທີ່​ກ່າວ​ມາ​ນີ້ ​ໜ້າ​ຈະ​ຊ່ວຍ​ກະຕຸກ​ຊຸກຍູ້​ການ​ເຕີ​ບໂຕ​ເສດຖະ​ກິດ​ໃນ​ປະ​ເທດ​ທີ່​ໃຊ້​ເງິນ​ຢູ​ໂຣນັ້ນ.

ລ່ວງ​ໜ້າ​ກອງ​ປະຊຸມນັ້ນ ທ່ານ George Papandreou ອະດີດ​ນາຍົກ ລັດຖະມົນຕີ ກຣີສ ກ່າວ​ວ່າ ນີ້​ເປັນ​ຊ່ວງ​ທີ່​ຈະ​ໃຫ້​ຜົນ ຫຼື​ແຕກ​ຫັກ​ໄດ້ ສໍາ​ລັບ ກຣີສ ​ແລະ​ພາກ​ພື້ນ​ຢູ​ໂຣບ.

ບັນດາ​ຜູ້​ນໍາ​ຢູ​ໂຣບ ບໍ່​ຄາດ​ວ່າ​ຈະ​ສາມາດ​ຮັບ​ເອົາ​ແຜນການ​ປະຕິບັດ​ອັນ​ແນ່ ນອນ​ໃດໆ ກ່ອນ​ການ​ເລືອກ​ຕັ້ງ​ຄັ້ງ​ໃໝ່​ຂອງ​ກຣີສ​ ໃນ​ເດືອນ​ມິຖຸນາ​ນີ້. ຖ້າ ຫາກ​ວ່າ​ ບັນດາ​ນັກ​ການເມືອງ​ທີ່​ຕໍ່ຕ້ານ​ມາດ​ຕະການ​ປະຢັດ​ມັດທະຍັດຊະ ນະ​ແລ້ວ ກຣີສກໍ​ຈະ​ຕ້ອງ​ຖອນ​ອອກ​ຈາກ​ປະ​ເທດ​ໃຊ້​ເງິນ​ຢູ​ໂຣ ທີ່​ມີ​ສະມາ​ຊິກ 17 ປະ​ເທດ​ນັ້ນ.

XS
SM
MD
LG