ພວກຖະໜົນຫົນທາງສາຍຕ່າງໆໃນເມືອງ Ferguson ລັດ Mis
souri ໃນພາກກາງຂອງສະຫະລັດ ມິດງຽບລົງຫຼາຍໃນຄືນຜ່ານ
ມານີ້ ລຸນຫຼັງທີ່ໄດ້ເກີດຄວາມວຸ້ນວາຍມາເປັນເວລາ 11 ມື້ຫຼັງ
ຈາກຕຳຫຼວດໃນທ້ອງຖິ່ນ ຍິງໄວລຸ່ນຜີວດຳຄົນນຶ່ງທີ່ບໍ່ຖືອາວຸດ
ຕາຍ.
ຕຳຫຼວດແຈ້ງໃຫ້ຊາບວ່າ ມີການຈັບກຸມຜູ້ຄົນພຽງແຕ່ 6 ຄົນ ຊຶ່ງ
ເປັນຈຳນວນ 40 ຄົນ ໜ້ອຍກວ່າຄືນກ່ອນນັ້ນ.
ຮ້ອຍຕຳຫຼວດເອກ Ron Johnson ກ່າວວ່າ ພວກເຈົ້າໜ້າທີ່ໄດ້ຮັບມືກັບເຫດການ
ຕ່າງໆນ້ອຍລົງ ໂດຍໃຫ້ຂໍ້ສັງເກດວ່າ ບໍ່ມີການຍິງກັນ ບໍ່ມີການແກວ່ງລະເບີດໄຟໃສ່
ແລະກ່າວຕື່ມວ່າ ພວກເຈົ້າໜ້າທີ່ ບໍ່ໄດ້ຍຶດເອົາປືນສັ້ນໃດໆ.
ພວກປະທ້ວງໄດ້ພາກັນອອກມາເດີນຂະບວນໄປຕາມຖະໜົນຫົນທາງສາຍຕ່າງໆ ເພື່ອ
ສະແດງຄວາມໂມໂຫໂກດແຄ້ນນຳການຍິງທ້າວ Michael Brown ໄວ 18 ປີຕາຍ ໃນ
ວັນທີ 9 ສິງຫາຜ່ານມານີ້. ພວກຕໍ່ຕ້ານການເດີນຂະບວນປະທ້ວງ 2 ຄົນ ໄດ້ອອກມາມີ
ໜ້າໃນຄືນວັນພຸດວານນີ້ ໂດຍຖືປ້າຍໃຫ້ການສະໜັບສະໜຸນນາຍ Darren Wilson
ເຈົ້າໜ້າທີ່ຕຳຫຼວດທີ່ຍິງທ້າວ Michael Brown ຕາຍນັ້ນ.
ຫຼາຍຄົນໃນກຸ່ມພວກປະທ້ວງ ພາກັນຮ້ອງໃສ່ຄົນສອງຄົນທີ່ສະແດງການສະໜັບສະໜຸນເຈົ້າໜ້າທີ່ ຕຳຫຼວດນັ້ນ ໂດຍບອກເຂົາເຈົ້າ “ ໃຫ້ພາກັນກັບບ້ານຊະ”. ລາຍງານຂ່າວໂທລະພາບ ສະແດງໃຫ້ເຫັນວ່າ ນຶ່ງໃນຈຳນວນສອງຄົນນັ້ນ ຖືກຕຳຫຼວດພາໜີໄປ.
ໃນວັນພຸດວານນີ້ ທ່ານ Eric Holder ລັດຖະມົນຕີຍຸຕິທຳສະຫະລັດ ໄດ້ພົບປະກັບພວກຫົວປະຊາຄົມ ແລະພວກຊາວເມືອງ Ferguson ໂດຍກ່າວວ່າ ທ່ານໄດ້ແຕ່ງຕັ້ງພວກນັກສືບແລະໄອຍະການ “ທີ່ມີປະສົບການຫຼາຍທີ່ສຸດ” ຂອງລັດຖະບານກາງ ມາດຳເນີນການກ່ຽວກັບຄະ ດີນີ້. ທ່ານ Holder ໄດ້ໃຊ້ເວລາໂອ້ລົມກັນກັບພວກພໍ່ແມ່ຂອງທ້າວ Michael Brown ເຊັ່ນກັນ ແລະໃຫ້ຄຳໝັ້ນສັນຍາຕໍ່ພວກເຂົາເຈົ້າວ່າ “ຈະມີການສືບສວນຢ່າງຍຸຕິທຳ ແລະເປັນອິດສະລະ” ກ່ຽວກັບການເສຍຊີວິດຂອງລູກຊາຍເຂົາເຈົ້າ.
ໃນອີກດ້ານນຶ່ງນັ້ນ ກະຊວງຮັກສາຄວາມປອດໄພພາຍໃນຂອງສະຫະລັດ ໄດ້ອອກໃບ ແຈ້ງການສະບັບນຶ່ງໃນວັນພຸດວານນີ້ ໂດຍໃຫ້ຄວາມສົນໃຈ ຕໍ່ແຜນການຂອງພວກນັກເຄື່ອນໄຫວກຸ່ມນຶ່ງ ທີ່ຈະຈັດການປະທ້ວງຂຶ້ນໃນທົ່ວປະເທດ ຕໍ່ຕ້ານການເສຍຊີວິດຂອງທ້າວ Michael Brown. ກຸ່ມດັ່ງກ່າວໄດ້ຮຽກຮ້ອງໃຫ້ຈັດ “ Day of Rage” ຫຼືມື້ແຫ່ງຄວາມໂກດແຄ້ນທີ່ເຮັ່ງຮ້ອນແຫ່ງຊາດຂຶ້ນ ໃນວັນພະຫັດມື້ນີ້.