ລິ້ງ ສຳຫລັບເຂົ້າຫາ

ສົງຄາມອັຟການິສຖານ ຄົບຮອບ 11 ປີ ໃນວັນອາທິດມື້ນີ້


ວັນທີ 7 ເດືອນຕຸລາ ມື້ນີ້ ເປັນວັນຄົບຮອບ 11 ປີຂອງການນໍາພາ ສະຫະລັດ ທໍາສົງຄາມໃນ ອັຟການິສຖານ
ວັນ​ທີ 7 ​ເດືອນ​ຕຸລາມື້​ນີ້ ​ແມ່ນ​ວັນ​ຄົບ​ຮອບ 11 ປີ​ຂອງ​ການ​ເລີ້ມ
ຕົ້ນ​ຂອງ ສົງຄາມໃນອັຟກາ​ນິສຖານ ທີ່​ສະຫະລັດ​ເປັນ​ຜູ້​ນໍາພາ​ນັ້ນ.

ມັນ​ເປັນສົງຄາມ​ທີ່​ຍາວ​ນານ​ກວ່າ ສົງ​ຄາມ​ໃດໆໃນ​ປະຫວັດສາດ​ຂອງສະຫະລັດ. ມີ​ທະຫານ​ນາໆ​ຊາດ ​ຫລາຍກວ່າ 3000 ເສຍ​ຊີວິດ​ຢູ່ໃນ​ສົງຄາມອັຟກາ​ນິສຖານ ຮວມທັງ ທະຫານອາ​ເມຣິກັນ 2000 ຄົນ. ​ແລະ​ມີ​ພົນລະ​ເຮືອນອັ​ຟກາ​ນິສຖານ ​ ​ເສຍ​ຊີວິດ ໃນຈໍານວນ​ຫລາຍ​ກ່ວາ​ນັ້ນ​ອີກ.

ສົງ​ຄາມ​ນີ້ໄດ້​ຖືກກະ​ຕຸ້ນ​ໃຫ້​ເກີດ​ຂຶ້ນ ຍ້ອນ​ການ​ໂຈມ​ຕີ​ຂອງພວກ​ກໍ່​ການ​ຮ້າ​ຍ​ ຕໍ່ ສະຫະລັດ ​ໃນ​ວັນ​ທີ 11 ເດືອນ​ກັນຍາ ປີ 2001. ບໍ່​ຮອດ​ນຶ່ງເດືອນຕໍ່​ມາ ທະຫານ​ສະຫະລັດ ​ໄດ້​ເຂົ້າໄປໃນອັຟກາ​ນິສຖານ ​ແລະ​ທໍາ​ການໂຈມ​ຕີ ພວກ​ກໍ່​ການ​ຮ້າຍ al-Qaida ​ແລະພວກທາ​ລິ​ບານ ທີ່​ປົກ​ຄອງອັຟກາ​ນິສຖານ​ຢູ່​ໃນ​ເວລາ​ນັ້ນ ​ແລະ​ໃຫ້ທີ່​ພັກ​ພາ​ອາ​ໄສ​ແກ່​ການຈັດ​ຕັ້ງ​ຂອງ​ພວກ​ກໍ່​ການ​ຮ້າຍ al-Qaida.

ພວກ​ທາ​ລິ​ບານ ​ໄດ້​ຖືກ​ໂຄ່ນ​ລົ້ມ​ແລະຂັບ​ໄລ່​ໜີ​ຢ່າງວອງ​ໄວ ​ແຕ່​ວ່າການ​ກະບົດ​ຕ້ານຢັນ
ຂອງ​ພວກ​ຫົວ​ຮຸນ​ແຮງ​ດັ່ງກ່າວ ​ໄດ້​ເລີ້​ມ​ເພີ້​ມທະວີ​ຄວາມ​ແຂງ​ແຮງ​ຂຶ້ນ ຕະຫລອດ​ເວລາ​ຫລາຍໆ​ປີ​ຕໍ່ມາ.

​ໃນ​ໄລຍະ​ຫລາຍໆ​ເດືອນ​ຜ່ານ​ມາ​ບໍ່​ດົນ​ນີ້ ທະຫານສະຫະລັດແລະ​ນາໆ​ຊາດ ​ໄດ້​ປະສົບ​ກັບ​ການ​ໂຈມ​ຕີ​ຢ່າງ​ຕໍ່​ເນື່ອງ ​ໃນອັນ​ທີ່​ເອີ້ນ​ວ່າ ການ​ໂຈມ​ຕີ​ຈາກ​ພາຍ​ໃນ ​ຄື​ການໂຈມຕີ​ທະຫາ​ນຕາ​ເວັນ​ຕົກ ໂດຍ​ທະຫານ​ແລະ​ຕໍາຫລວດ​ອັຟກາ​ນິສຖານ.

ກໍາລັງທະ​ຫານ​ປ​ະສົມນາໆ​ຊາດໄດ້​ເລີ້​ມຖອນອອກ​ຈາກອັຟກາ​ນິສຖານ​ໄປແລ້ວ. ກໍາລັງ​ລົບ​ຕ່າງປະ​ເທດ​ທັງ​ໝົດ ​ແມ່ນ​ມີ​ກໍານົດ​ທີ່​ຈະຖອນ​ອອກ​ໄປ​ໃຫ້​ໝົດ ​ພາຍ ໃນ​ທ້າຍປີ 2014.
XS
SM
MD
LG