ລິ້ງ ສຳຫລັບເຂົ້າຫາ

ກອງກຳລັງ ອີຈິບ ສັງຫານ ນັກທ່ອງທ່ຽວ ຊາວເມັກຊິໂກ ຍ້ອນຄວາມເຂົ້າໃຈຜິດ


ລົດຂັບເຄື່ອນດ້ວຍ 4 ຕີນ ແລ່ນຜ່ານທະເລຊາຍ ທາງພາກຕາເວັນຕົກຂອງອີຈິບ ແລະ ເຂດ Bahariya Oasis ຢູ່ທາງພາກຕາເວັນຕົກສຽງໃຕ້ຂອງນະຄອນ ໄຄໂຣ ໃນຮູບພາບນີ້ ທີ່ຖ່າຍເມື່ອວັນທີ 15 ພຶດສະພາ 2015.

ລົດຂັບເຄື່ອນດ້ວຍ 4 ຕີນ ແລ່ນຜ່ານທະເລຊາຍ ທາງພາກຕາເວັນຕົກຂອງອີຈິບ ແລະ ເຂດ Bahariya Oasis ຢູ່ທາງພາກຕາເວັນຕົກສຽງໃຕ້ຂອງນະຄອນ ໄຄໂຣ ໃນຮູບພາບນີ້ ທີ່ຖ່າຍເມື່ອວັນທີ 15 ພຶດສະພາ 2015.

ກອງກຳລັງ​ຮັກສາ​ຄວາມ​ປອດ​ໄພ ຂອງອີ​ຈິບ ​ໄດ້ສັງຫານ 12 ຄົນ
ລວມທັງ ນັກ​ທ່ອງ​ທ່ຽວຊາວ​ເມັກ​ຊິ​ໂກ​ຈຳນວນ​ນຶ່ງ ຫຼັງຈາກ​ທີ່​ເຂົ້າ
​ໃຈ​ຜິດ ​ໂດຍເປີດ​ສາກ​ຍິງ​ເຂົ້າ​ໃສ່​ ພວກນັກ​ທ່ອງ​ທ່ຽວ ​ໃນ​ຂະນະ​ທີ່
​ກຳລັງ​ໄຫລ່​ຕິດຕາມ​ພວກກໍ່​ການ​ຮ້າຍ ຢູ່​ໃນທະ​ເລ​ຊາຍ​ ທາງພາກ
​ຕາ​ເວັນ​ຕົກ​ຂອງປະ​ເທດ.

ກະຊວງການ​ຕ່າງປະ​ເທດ ​ເມັກ​ຊິ​ໂກ ກ່າວ​ວ່າ ຢ່າງ​ນ້ອຍ 2 ຄົນ
ຜູ້​ຖືກ​ຂ້າ​ຕາຍ ​ແມ່ນເປັນ​ພົນລະ​ເມືອງ​ເມັກ​ຊິ​ໂກ.

ອີ​ຈິບ ກ່າວ​ໃນ​ຖະ​ແຫລ​ງການ​ສະບັບ​ນຶ່ງວ່າ ຜູ້​ທີ່​ເສຍ​ຊີ​ວິດ​ ແມ່ນ​
ຊາວ​ເມັກ​ຊິ​ໂກ ​ແລະ ຊາວ​ອີ​ຈິບ ​ແຕ່​ບໍ່​ໄດ້​ໃຫ້​ລາຍ​ລະອຽດ​ ກ່ຽວ​
ກັບ​ວ່າ​ ​ຄົນສັນຊາດ​ໃດ ມີຈຳນວນທໍ່​ໃດ.​

ຖະ​ແຫລ​ງການນັ້ນ ຍັງກ່າວອີກ​ວ່າ ບໍລິ​ເວນ​ບ່ອນທີ່​ບັນດາ​ນັກ​ທ່ອງ​ທ່ຽວ ​ໄປນັ້ນ “​ເປັນເຂດ​ ຕ້ອງຫ້າມ​ບໍ່​ໃຫ້​ນັກ​ທ່ອງ​ທ່ຽວ​ເຂົ້າ​ໄປ.”

ທ່ານ Rasha Azazi ​ໂຄສົກ​ກະຊວງ​ທ່ອງ​ທ່ຽວ​ຂອງ​ອີ​ຈິບ ກ່າວ​ວ່າ ບໍລິສັດ​ທ່ອງ​ທ່ຽວ​ທີ່ກ່ຽວຂ້ອງ ບໍ່​ມີ​ໃບ​ອະນຸຍາດຖືກຕ້ອງ ​ແລະ ບໍ່​ໄດ້​ແຈ້ງ​ໃຫ້​ບັນດາ​ເຈົ້າໜ້າ​ທີ່ ຊາບ​ວ່າ ບັນດາ​ນັກ​ທ່ອງ​ທ່ຽວ ຈະເຂົ້າ​ໄປ​ໃນ​ບໍລິ​ເວນ Farafra. ທ່ານ Azazi ກ່າວ​ຕໍ່​ອົງການ​ຂ່າວ AP ວ່າ ການ​ເດີນທາງ​ໄປ​ຍັງ ບໍລິ​ເວນ Farafra ທັງ​ໝົດ ຈະ​ຕ້ອງ​ໄດ້​ຮັບອະນຸມັດ​ຈາກ​ບັນດາເຈົ້າໜ້າທີ່​ກ່ອນ​.

​ ເອກ​ອັກຄະ​ລັດຖະທູດ ​ເມັກ​ຊິ​ໂກ ປະຈຳ​ອີ​ຈິບ ທ່ານ Jorge Alvarez Feuntes ​ໄດ້​ເດີນທາງ​ໄປ​ຢ້ຽມຢາມ ຊາວ​ເມັກ​ຊິ​ໂກ 5 ຄົນ ​ທີ່​ລອດ​ຊີວິດຈາກ​ເຫດການ​ດັ່ງກ່າວ ຢູ່​ທີ່​ໂຮງໝໍ Dar el-Fouad ​ໃນ​ເຂດ​ຊານ​ເມືອງ​ຂອງນະຄອນ​ໄຄ​ໂຣ.

ປະທາ​ນາ​ທິບໍດີ ​ເມັກ​ຊິ​ໂກ ທ່ານ Enrique Pena Nieto ຮຽກຮ້ອງ​ໃຫ້​ດຳ​ເນີນ​ການ​ສືບສວນ​ສອບ​ສວນ ກ່ຽວ​ກັບ​ເຫດການ​ຮ້າຍ​ແຮງ​ເຖິງ​ແກ່ຊີວິດດັ່ງກ່າວ.

XS
SM
MD
LG