ອີຈິບໄດ້ປະກາດໃຫ້ ທ່ານ Mohamed Morsi ຜູ້ສະໝັກເລືອກຕັ້ງຈາກພັກພະລາດອນ
ພາບມຸສລິມ ເປັນຜູ້ຊະນະໃນການເລືອກຕັ້ງປະທານາທິບໍດີຮອບຕັດສິນຊີ້ຂາດ.
ມີສຽງໂຮເຊຍຢ່າງຟົດສະນັ່ນ ດັງອອກມາຈາກຈະຕຸລັດ Tahrir ບ່ອນທີ່ພວກທີ່ສະໜັບ
ສະໜຸນ ທ່ານ Morsi ໄດ້ໄປໂຮມຊຸມນຸມກັນ ໃນວັນອາທິດມື້ນີ້ ຊຶ່ງການສະເຫລີມສະ
ຫລອງໃນມື້ນີ້ ແມ່ນແຕກຕ່າງກັນຢ່າງໃຫຍ່ ຈາກເມື່ອເກືອບນຶ່ງປີເຄິ່ງຜ່ານມາ ເວລາຊາວ
ອີຈິບພາກັນລຸຫລັ່ງໄປປະທ້ວງ ຢູ່ຈະຕຸລັດແຫ່ງນັ້ນ ໃນການລຸກຮືຂຶ້ນ ທີ່ໄດ້ໂຄ່ນລົ້ມລັດ
ຖະບານຂອງປະທານາທິບໍດີ Hosni Mubarak ລົງນັ້ນ.
ຄະນະກໍາມະການເລືອກຕັ້ງຂອງອີຈິບ ປະກາດໃນວັນອາທິດມື້ນີ້ວ່າ ທ່ານ Morsi ໄດ້
ຮັບ 52% ບັດຄະແນນສຽງທັງໝົດ ໂດຍໄດ້ຊະນະອະດີດນາຍົກລັດຖະມົນຕີແລະເຈົ້າ
ໜ້າທີ່ຈາກສະໄໝຂອງທ່ານມູບາຣັກ ຄືທ່ານ Ahmed Shafiq ນັ້ນ. ທ່ານ Morsi ຈະ
ໄດ້ເປັນປະທານາທິບໍດີຄົນທໍາອິດຂອງອີຈິບ ທີ່ປະຊາຊົນອີຈິບໄດ້ຖືກເລືອກຕັ້ງເອົາຢ່າງ
ເສລີ.
ຜົນການເລືອກຕັ້ງຢ່າງເປັນທາງການ ໄດ້ກໍານົດວ່າຈະປະກາດໃຫ້ຮູ້ໃນວັນພະຫັດຜ່ານ
ມາ ແຕ່ຄະນະກໍາມະການກໍາກັບການເລືອກຕັ້ງ ກ່າວວ່າ ຕົນຕ້ອງການເວລາເພີ່ມອີກ
ເພື່ອທໍາການສືບສວນສອບສວນຂໍ້ກ່າວຫາຕ່າງໆທີ່ວ່າ ມີການສໍ້ໂກງບັດເລືອກຕັ້ງໂດຍ
ບັນດາຜູ້ສະໝັກຮັບເລືອກຕັ້ງທັງສອງທ່ານ.
ຊາວອີຈິບຫຼາຍພັນຄົນໄດ້ພາກັນໄປໂຮມຊຸມນຸນ ໃນໃຈກາງກຸງໄຄໂຣ ໃນແລງວັນເສົາວານນີ້
ທ່າມກາງການຮັກສາຄວາມປອດໄພຢ່າງເຄ່ງຕຶງເພື່ອສະແດງການສະໜັບສະໜຸນແກ່ພວກ
ສະໝັກຮັບເລືອກຕັ້ງຂອງ ໃຜລາວ.
ພວກສະໜັບສະໜຸນພັກພະລາດອນພາບມຸສລິມ ພາກັນໂຮມຊຸມນຸມ ຢູ່ທີ່ຈະຕຸລັດ Tahrir
ໃນກຸງໄຄໂຣ ຈຸດໃຈກາງແຫ່ງການລຸກຮືຂຶ້ນປະທ້ວງລັດຖະບານມາເປັນເວລາ 16 ເດືອນ
ໂດຍພາກັນໂຮຮ້ອງໃຫ້ ການສະໜັບສະໜຸນທ່ານ Morsi ໃນຂະນະທີ່ພວກສະໜັບສະໜຸນ
ທ່ານ Shafiq ພາກັນໂຮມຊຸມນຸມ ຢູ່ໃກ້ໆກັບອະນຸສາວະລີທະຫານນິລະນາມ.
ໝາຍເຫດ: ຂ່າວນີ້ແມ່ນຂ່າວອັບເດດ ທີ່ອອກມາຫລັງຈາກການກະຈາຍສຽງ
ຂອງພວກເຮົາ ຈຶ່ງບໍ່ມີສຽງອ່ານ.