ປາກົດວ່າ ພັກຂອງນາຍົກລັດຖະມົນຕີ Xanana Gusmao ໄດ້ຮັບໄຊຊະນະໃນການ
ປ່ອນບັດເລືອກຕັ້ງສະພາແຫ່ງຊາດຂອງຕີມໍຕາເວັນອອກ ຫຼືຕີມໍເລັສເຕ ໃນວັນເສົາ
ວານນີ້. ແຕ່ຜົນການເລືອກຕັ້ງຂັ້ນຕົ້ນທີ່ອອກມາໃນວັນອາທິດມື້ນີ້ ສະແດງໃຫ້ເຫັນວ່າ
ພັກ ດັ່ງກ່າວບໍ່ໄດ້ຮັບຄະແນນສຽງພຽງພໍທີ່ຈະໄດ້ເປັນພັກທີ່ມີສຽງສ່ວນຫລາຍ ເພື່ອ
ຈະຫລີກລ່ຽງການສ້າງຕັ້ງລັດຖະບານປະສົມນັ້ນ.
ຄະນະກໍາມະການເລືອກຕັ້ງເວົ້າວ່າ ການນັບບັດຄະແນນສຽງທັງໝົດສະແດງໃຫ້ເຫັນ
ວ່າ ພັກສະພາແຫ່ງຊາດເພື່ອບູລະນະສ້າງສາຕີມໍຂອງທ່ານ Gusmao ຫລື CNRT ໄດ້
ຮັບຄະແນນສຽງບໍ່ຮອດ 37% ຊຶ່ງຕາມມາດ້ວຍພັກ Fretilin ທີ່ໄດ້ຮັບຄະແນນສຽງ
30%. ພັກປະຊາທິປັດແມ່ນລາກທ້າຍໝູ່ ຊຶ່ງໄດ້ຮັບພຽງແຕ່ 10% ເທົ່ານັ້ນ.
ມີ 21 ພັກການເມືອງ ສົ່ງຜູ້ສະມັກເຂົ້າແຂ່ງຂັນເອົາບ່ອນນັ່ງ ຢູ່ໃນສະພາແຫ່ງຊາດ ທີ່
ມີທັງໝົດ 65 ບ່ອນ.
ຜົນການເລືອກຕັ້ງຢ່າງເປັນທາງການ ຄາດວ່າຈະປະກາດໃຫ້ຮູ້ໃນຫລາຍມື້ຕໍ່ ໜ້ານີ້.
ຕີມໍຕາເວັນອອກ ຊຶ່ງເປັນອະດີດອານານິຄົມຂອງປອກຕຸຍກາລ ໄດ້ຮັບເອກກະລາດ
ໃນປີ 1975 ແຕ່ໄດ້ຖືກອິນໂດເນເຊຍເຂົ້າຍຶດຄອງ ມາຈົນຮອດເວລາບັນດາຜູ້ມີສິດ
ປ່ອນບັດ ໄດ້ເລືອກເອົາເອກກະລາດ ໃນການລົງປະຊາມະຕິນາໆຊາດໃນປີ 1999.