ລິ້ງ ສຳຫລັບເຂົ້າຫາ

ຕຳຫຼວດຢີ່ປຸ່ນ ພົບເຫັນ ຍົນນ້ອຍບໍ່ມີຄົນຂັບ ຢູ່ເທິງຫຼັງຄາ ສຳນັກງານນາຍົກ


ຕຳຫຼວດຄົນນຶ່ງ ກຳລັງກວດສອບ ຍົນນ້ອຍບໍ່ມີຄົນຂັບ ຢູ່ເທິງຫລັງຄາ ຫ້ອງການຂອງນາຍົກລັດຖະມົນຕີ Shinzo Abe ໃນນະຄອນຫລວງ ໂຕກຽວ, ວັນທີ 22 ເມສາ 2015.

ຕຳຫຼວດຄົນນຶ່ງ ກຳລັງກວດສອບ ຍົນນ້ອຍບໍ່ມີຄົນຂັບ ຢູ່ເທິງຫລັງຄາ ຫ້ອງການຂອງນາຍົກລັດຖະມົນຕີ Shinzo Abe ໃນນະຄອນຫລວງ ໂຕກຽວ, ວັນທີ 22 ເມສາ 2015.

ບັນດາ​ເຈົ້າໜ້າ​ທີ່​ຍີ່ປຸ່ນ ໄດ້ເລີ້ມການ​ສືບສວນ​ສອບ​ສວນ ຫຼັງຈາກ
​ທີ່​ໄດ້​ພົບ​ເຫັນ ​ຍົນ​ນ້ອຍບໍ່​ມີ​ຄົນ​ຂັບ ຫຼື​ drone ລຳນຶ່ງຢູ່​ເທິງ​ຫຼັງຄາ
​ ສຳນັກງານ ນາຍົກ​ລັດຖະມົນຕີ Shinzo Abe.

ອົງການວິທະຍຸ ແລະ ໂທລະພາບ​ແຫ່ງຊາດ NHK ລາຍງານວ່າ
ຍົນ​ສີ່ໃບ​ພັດລຳ​ດັ່ງກ່າວ ທີ່ມີເສັ້ນຜ່າສູນກາງປະ​ມານ 50 ຊັງ​ຕີ
​ແມັດ ໄດ້ບັນຈຸ​ກ້ອງຖ່າຍ​ຮູບ ພ້ອມ​ດ້ວຍ​ຂວດ​ຢາງອັນ​ນຶ່ງ ​ແລະ
ອຸປະກອນ ທີ່ມີລັກສະນະຄ້າຍຄື ເຄື່ອງຈູດແປວ​ໄຟ ເພື່ອໃຫ້
ສັນຍານ.

ສື່ມວນຊົນຈຳນວນນຶ່ງ ​ຍັງລາຍ​ງານ​ວ່າ ​ໂດຣນລຳດັ່ງກ່າວ ​ແມ່ນມີຮູບ ທີ່ເປັນ​ສັນຍາ​ລັກ​ຂອງກຳມັນຕະພາບ​ລັງສີ ​ແລະອົງການ​ຂ່າວ Kyodo ລາຍ​ງານວ່າ ມີການກວດພົບກຳ​ມັນ​ຕະພາບ​ລັງສີ​ ປະລິມານ​ນ້ອຍໆຢູ່ ໃນ​ຍົນ​ລຳ​ດັ່ງກ່າວດ້ວຍ.

ລາຍງານຂ່າວ​ໂທລະພາບ ສະ​ແດງ​ໃຫ້​ເຫັນວ່າ ​ເຈົ້າໜ້າ​ທີ່​ຕຳຫຼວດ ຫຼາຍສິບຄົນ ຫ້ອມລ້ອມ ​ຍົນລຳນັ້ນ ຊຶ່ງ​ປົກ​ຄຸມ​ດ້ວຍ​ຜ້າສີຟ້າ.

ຍັງບໍ່ເປັນທີ່ຈະ​ແຈ້ງ​ເທື່ອ​ວ່າ ຜູ້​ໃດສົ່ງ​ໂດຣນລຳ​ດັ່ງ​ກ່າວມາ ຫຼື ວ່າ​ພວກ​ເຂົາ​ມີ​ຈຸດປະສົງ
​ອັນ​ໃດ. ລາຍ​ງານກ່າວ​ວ່າ ບໍ່​ມີຜູ້​ໃດໄດ້​ຮັບ​ບາດ​ເຈັບ​ເລີຍ. ນາຍົກ​ລັດຖະມົນຕີ Shinzo
Abe ບໍ່​ໄດ້​ຢູ່​ໃນ​ຫ້ອງການ​ຂອງ​ທ່ານ​ໃນ​ເວລາ​ນັ້ນ ທ່ານ​ໄດ້​ເດີນທາງ​ໄປ​ຮ່ວມກອງ​ປະຊຸມ​
ຢູ່​ທີ່ອິນ​ໂດ​ເນ​ເຊຍ.

XS
SM
MD
LG