ລິ້ງ ສຳຫລັບເຂົ້າຫາ

ດອກ​ເຕີ້ ບໍຣິວົງ ຕາ​ໂນ​ວັນ ອະດີດ​ວິ​ສະວະ​ກອນ​ເຂື່ອນ
ໄຟ​ຟ້າ ເປັນ​ຄົນ​ລາວ​ອາ​ເມຣິກັນ​ຄົນ​ນຶ່ງ ທີ່​ໄດ້​ສ້າງ​ຊື່ສຽງ​
ໃຫ້​ແກ່ປະຊາ​ຄົມ​ລາວ ຢູ່​ໃນສະຫະລັດ ອາ​ເມຣິກາ ​ໃນ​
ຖານະ​ທີ່​ໄດ້​ເປັນ​ເຈົ້າ​ໜ້າ​ທີ່​ລະດັບ​ສູງ​ຄົນ​ນຶ່ງ​ໃນ​ວົງ​ການ​
ລັດຖະບານ​ ທີ່​ຮັບ ຜິດຊອບ​ວຽກ​ງານ​ຄວບ​ຄຸມ​ເຂື່ອນ
​ໄຟຟ້າ​ນໍ້າຕົກ​ທັງ​ໝົ​ດ ຢູ່​ໃນ​ເຂດ​ອ່າງ​ແມ່ນໍ້າ ​ໂຄ​ລໍາ​ເບຍ
ຂອງ​ລັດ​ອໍຣະກັນ. ​

ຜົນງານຕ່າງໆທີ່ ທ່ານໄດ້​ສ້າງ​ໄວ້​ນັ້ນ​ເປັນ​ທີ່ພາກ ພູມ​ໃຈ ​
ແລະໜ້າ​ສັນລະ​ເສີນ ​ໃນ​ນາມເຊື້ອສາຍ​ຂອງ ຊົນ​ຊາດ
​ລາວ-ອາ​ເມຣິກັນ ຜູ້​ນຶ່ງທີ່​ໄດ້​ມີສ່ວນປະກອບໃນ​ການນໍາ
ໃຊ້ເທັກ​ໂນ​ໂລຈີ ​ເພື່ອຄວາມ​ຢູ່ເຢັນ​ເປັນ​ສຸກ ​ແລະ​ສະດວກ​
ສະບາຍ​ ຂອງປະຊາ​ຄົ​ມທັງຫລາຍ​.

ດອກ​ເຕີ້ ບໍລິ​ວົງ ຕາ​ໂນ​ວັນ ເກີດ​ທີ່ເມືອງ ມະຫາ​ໄຊ ປະ​ເທດ​ລາວ. ທ່ານ​ໄດ້​ຮັບ​ການ​ສຶກສາ​
ຊັ້ນ​ປະຖົມ ​ຢູ່ທີ່​ແຂວງ​ຊຽງ​ຂວ​າງ ຫລັງ​ຈາ​ກນັ້ນ ໃນ​ປີ 1949​ ທ່ານ ໄດ້ມາ​ຮຽນຕໍ່​ທີ່ ມັດທະຍົມLycee Pavie ຢູ່​ນະ​ຄອນ​ຫລວງວຽງ​ຈັນ​. ​ຈາກປີ 1954 ຫາ 58 ທ່ານໄດ້​ເດີນທາງ​ໄປ​ສຶກສາຕໍ່​ທີ່ປະ​ເທດ​ຝຣັ່ງ ​ແລະ​ໄດ້​ສອບ​ເສັງເອົາປະກາດ​ສະ​ນີຍະ​ບັດ Baccalaureate deuxieme partie. ​ໃນ​ປີ 1958 ທ່ານ​ໄດ້​ເດີນທາງໄປ ສື​ກສາຂັ້ນ​ສູງ​ຕໍ່​ທີ່ເມືອງ Lausanne ປະ​ເທດ Switzerland ບ່ອນ​ທີ່​ທ່ານຮຽນ​ຈົບ Diplome Civil Engineer ​ໃນ​ປີ 1963.

ຫລັງ​ຈາກ​ນັ້ນ ທ່ານໄດ້​ກັບ​ເມືອ​ ພະລາດ​ຊະ​ອານາ​ຈັກລາວ ​ແລະໄດ້ເຂົ້າ​ຮັບ​ໜ້າ​ທີ່​ຢູ່ກົມ​ໄຟຟ້າ​ລາວ ຢູ່​ນະ​ຄອນ​ຫລວງ​ວຽງ​ຈັນ ​ເປັນ​ເວລາ​ສອງປີ. ​ໃນ​ປີ 1965-67 ທ່ານໄດ້ເດີນ
ທາງ​ອອກ​ຈາກ​ເມືອງ​ລາວ ​ໄປ​ສຶກສາອົບ​ຮົ​ມຕໍ່ອີກ ທີ່​ເມືອງ Portland ລັດ Oregon ສະຫະລັດອາ​ເມຣິກາ ກັບ​ໜ່ວຍ​ວິສະວະ​ກໍາ ຂອງ​ກອງທັບ​ບົກ​ສະຫະລັດ ຫລື US Army Corps of Engineers ກ່ຽວ​ກັບ​ເຂື່ອນ​ໄຟຟ້າ ​ໂດຍ​ໄດ້​ຮັບທຶນ​ຈາກ ຄະນະ​ກໍາມາທິການ​ແມ່​ນໍ້າຂອງສາກົນ.

ຫລັງຈາກ​ນັ້ນ ທ່ານ​ໄດ້​ກັບໄປ​ຮຽນ​ຕໍ່​ ເອົາປະລິນຍາ​ເອກ ທີ່ປະ​ເທດ Switzerland ຝ່າຍ Hydrologic Engineering ຫລື​ວິສະວະ​ກໍາ​ອຸ​ທົກ​ກະ​ວິທະຍາ ທີ່​ສຶກສາ​ກ່ຽວກັບ​ການ
ສະໜອງ​ນໍ້າ ​ແລະ​ປ້ອງ​ກັນ​ນໍ້າ​ຖ້ວມ ​ເປັນ​ຕົ້ນ. ​ຫລັງ​ຈາກ​ກັບ​ຄືນ​ເມືອ​ປະ​ເທດລາວ​ແລ້ວ ໃນ​ປີ 1969 ທ່ານ​ໄ​ດ້ຖືກ​ສົ່ງໄປ​ປະ​ຈໍາ​ການຢູ່ສໍານັກງານ​ຂອງ​ຄະນະ​ກໍາມາ​ທິການແມ່​ນໍ້າຂອງສາກົນ ​ທີ່ບາງກອກ ປະ​ເທດ​ໄທ.

​ຫລັງ​ຈາກ​ການ​ປົກຄອງໃນພະລາດ​ຊະ​ອານາຈັກ​ລາວ ໄດ້​ມີ​ການປ່ຽນ​ແປງໃນ​ປີ 1975 ​ດອກ​ເຕີ້ ບໍຣິວົງ ຕາ​ໂນ​ວັນ ​ໄດ້​ຕັດສິນ​ໃຈນໍາພາ​ຄອບ​ຄົວ​ ຍົກຍ້າຍ​ຈາກ​ບາງກອກ ເຂົ້າມາ​ຕັ້ງ​ຖິ່ນ​ຖານ​ໃໝ່ຢູ່​ທີ່​ລັດ Oregon ສະຫະລັດ ອາ​ເມຣິກາ ​ ໃນ​ປີ 1976 ​ມາຈົນເທົ່າເຖິງ​ປັດ​ຈຸ​ບັນ. ​

ໃນ​ຂັ້ນ​ຕົ້ນ​ຂອງ​ການ​ຕັ້ງ​ຊີວິດ​ໃໝ່ ​ເວລາ​ທີ່​ທ່ານ​ຍັງ​ບໍ່​ທັນ​ໄດ້​ເປັນສັນຊາດອາ​ເມຣິກາ ເທື່ອ
ນັ້ນ ທ່ານ​ໄດ້​ເຮັດ​ວຽກ​ການສ້າງ​ເຂື່ອນໄຟຟ້າ​ໃຫ້​ບໍລິສັດ​ເອກ​ກະຊົນ.

ໃນ​ປີ 1983 ຫລັງ​ຈາກ​ທ່ານໄດ້​ເປັນ​ສັນຊາດອາ​ເມຣິກາ ທ່ານ​ໄດ້​ເລີ້ມ​ເຮັດວຽກ​ໃຫ້​ແກ່ U.S. Corps of Engineers ຕໍາ​ແໜ່​ງເປັນ​ຫົວໜ້າ ​ລັດຖະບານສະຫະລັດໃນເຂດອ່າງ
ແມ່ນໍ້າ ໂຄລໍາເບຍ Columbia basin Water Mangement ຂອງໜ່ວຍ ວິສະວະ​ກໍາ Corps of Engineers ຂອງ​ກອງທັບ​ບົກ​ ປະ​ຈໍາ​ເຂດພາກ​ຕາ​ເວັນ​ຕົກ​ສຽງ​ເໜືອ​ຂອງ​ສະຫະລັດ.

ທ່ານ ດອກ​ເຕີ້ ບໍລິ​ວົງ ຕາໂນ​ວັນ ​ໄດ້ເຮັດ​ວຽກ​ເປັນ​ລັດຖະ​ກອນ ລັດຖະບານ​ ສະຫະລັດ ເປັນ​ເວລາ 25 ປີ (1983-2008) ຈຶ່ງໄດ້​ລາ​ອອກ​ກິນ​ເບ້ຍ​ບໍານານ ທ່ານກໍຍັງສືບ​ຕໍ່​ເຮັດ​ວຽກເປັນ​ທີ່​ປຶກສາ. ​ ​ນອກຈາກ​ນັ້ນ​ແລ້ວ ທ່ານ​ຍັງເປັນ​ຜູ້ສອບ​ເສັງພາສາ​ລາວ ​ໃຫ້ແກ່ບັນ
ດາເຈົ້າໜ້າທີ່ ທີ່ໄປປະຈໍາການຢູ່ເມືອງລາວ ພ້ອມ​ດຽວ​ກັນ​ນີ້ ທ່ານກໍ​ໃຊ້​ຊີ​ວິດ​ເບ້ຍ​ບໍານານ
ຂອງ​ທ່ານ​ຢ່າງມ່ວນ​ຊຶ່ນ​ກັບ​ພັນ​ລະ​ຍາ ອຸ່ນ​ເຮືອນ ຕາ​ໂນ​ວັນ​ ແລະ​ລູກ​ສາວ​ອີກ​ສາມ​ຄົນ ພ້ອ​ມກັບ​ຫລານ​.

ວີ​ໂອ​ເອ ​ໄດ້​ຮັບ​ກຽດ​ໃຫ້​ສໍາ​ພາດ ກ່ຽວ​ກັບ​ຄວາມ​ຄິດ​ເຫັນຂອງ​ດອກ​ເຕີ້ ບໍລິ​ວົງ ຕາ​ໂນ​ວັນ ກ່ຽວກັບ​ແຜນການ​ຂ​ອງ ສປປ ລາວ ທີ່​ຈະສວາຍ​ໃຊ້​ປະ​ໂຫຍ​ດຈາກ​ແມ່​ນໍ້າ​ລໍາ​ເຊ ​ທີ່​ລາວ​ມີ​ຢ່າງ​ຫລວງຫລາຍ ​ສ້າງ​ເຂື່ອນ​ໄຟຟ້າຫລາຍ​ສິບ​ແຫ່ງ ເພື່ອ​ຈະ​ໄດ້​ກາຍ​ເປັນ​ໝໍ້​ໄຟ​ຂອງ​ເຂດ​ອາ​ຊ່ຽນ​ໃນ​ອະນາຄົດ​ນັ້ນ ຊຶ່ງ​ທ່ານ ດອກ​ເຕີ້ ບໍລິ​ວົງ ກໍ​ໄດ້​ອ​ະທິບາຍ ​ເຖິງຜົນ​ປະ​ໂຫຍ​ດ​ ​ແລະຜົນ​ກະທົບ​ທາງ​ລົບ ສູ່​ຟັງດັ່ງ​ນີ້:




ທີ່ ທ່ານ​ໄດ້​ຮັບ​ຟັງ​ຜ່ານ​ໄປ​ນັ້ນ ​ແມ່ນ​ຄໍາ​ເຫັນ​ຂອງ ດອກ​ເຕີ້ ບໍລິ​ວົງ ຕາ​ໂນ​ວັນ, ຜູ້​ຊ່ຽວຊານ ການ​ກໍ່ສ້າງ​ເຂື່ອນ​ໄຟຟ້າ ກ່ຽວ​ກັບຜົນ​ປະ​ໂຫຍ​ດ​ ​ແລະຜົນ​ກະທົບ​ທາງ​ລົບ ຈາກ​ການ​ສ້າງ​ເຂື່ອນ​ເປັນ​ຈໍານວນ​ຫລວງຫລາຍ ຢູ່​ໃນ ສປປ ລາວ. ​ແລງ​ວັນ​ພະຫັດ​ໜ້າ ​ເຮົາ​ຈະ​ມີ​ລາຍ​ງານ​ທີ່​ໜ້າ​ສົນ​ໃຈ​ກ່ຽວ​ກັບ​ຊີວິດ​ຊາວ​ລາວ ​ໃນ​ຕ່າວ​ແດນ​ມາສະ​ເໜີ​ທ່ານ​ອີກ​ຕາມ​ເຄີຍ. ​ໂປດ​ຕິດຕາມ​ຮັບ​ຟັງ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG