ຮູບພາບ 43 ຮູບໄດ້ປາກົດຂຶ້ນທີ່ຈໍໂທລະພາບຂະໜາດໃຫຍ່ຢູ່ສະໜາມກິລາໃນນະຄອນ Philadelphia ຊຶ່ງເປັນບ່ອນຈັດກອງປະຊຸມໃຫຍ່ແຫ່ງຊາດ ພັກເດໂມແຄຣັດໃນແລງວັນອັງຄານວານນີ້ຊຶ່ງໃນແຕ່ລະຮູບແມ່ນໄດ້ສະແດງໃຫ້ເຫັນພວກຜູ້ຊາຍທີ່ເຄີຍຮັບໜ້າທີ່ເປັນປະທານາທິບໍດີສະຫະລັດມາກ່ອນ. ຫລັງຈາກຮູບ ຂອງປະທານາທິບໍດີ ບາຣັກ ໂອບາມາແລ້ວຮູບທີ່ຢູ່ເທິງຈໍກໍໄດ້ຂະຫຍາຍອອກແລະຫຼັງຈາກນັ້ນກໍແຕກອອກເປັນຕ່ອນເລັກຕ່ອນນ້ອຍແລ້ວກໍມີຮູບທ່ານນາງ Hillary Clinton ປາກົດອອກມາໃຫ້ເຫັນຊຶ່ງເປັນແມ່ຍິງຜູ້ທຳອິດ ທີ່ໄດ້ຖືກສະເໜີແຕ່ງຕັ້ງ ໃຫ້ເປັນຜູ້ລົງສະໝັກເຂົ້າແຂ່ງຂັນເອົາຕຳແໜ່ງປະທານາທິບໍ ດີສະຫະລັດ ໂດຍພັກການເມືອງໃຫຍ່ຂອງປະເທດ.
ທ່ານນາງ Clinton ກ່າວວ່າ "ມັນເປັນມື້ແລະຄ່ຳຄືນທີ່ຍິ່ງໃຫຍ່. ມັນເປັນກຽດທີ່ບໍ່ໜ້າເຊື່ອທີ່ພວກທ່ານໄດ້ມອບໃຫ້ແກ່ຂ້າພະເຈົ້າ."
ທ່ານນາງໄດ້ປາກົດໂຕທາງວີດີໂອຈາກນະຄອນນິວຢອກ ແລະກ່າວວ່າ ພັກເດໂມແຄຣັດໄດ້ກໍ່ໃຫ້ເກີດ "ຮອຍແຕກແຫງທີ່ໃຫຍ່ທີ່ສຸດ" ຕໍ່ອັນທີ່ເອີ້ນວ່າ ແກ້ວເພດານເພື່ອຂັດຂວາງບໍ່ໃຫ້ພວກແມ່ຍິງ ມີຄວາມກ້າວໜ້າ ເຂົ້າໄປຮັບໜ້າທີ່ ໃນຕຳແໜ່ງທີ່ສູງຂຶ້ນ. ທ່ານນາງ Clinton ໄດ້ກ່າວເຖິງຄວາມສຳຄັນ ຂອງໂອກາດເວລາ ສຳລັບພວກເດັກນ້ອຍແມ່ຍິງທີ່ພວມເບິ່ງລາຍການຢູ່ນັ້ນ.
"ຂ້າພະເຈົ້າອາດຈະເປັນປະທານາທິບໍດີແມ່ຍິງຄົນທຳອິດ ແຕ່ນຶ່ງໃນພວກທ່ານອາດຈະແມ່ນຄົນຕໍ່ໄປ."
ມື້ທີ 2 ຂອງກອງປະຊຸມໃຫຍ່ ພັກເດໂມແຄຣັດ
ຜູ້ກ່າວຄຳປາໄສຄົນສຳຄັນໃນວັນອັງຄານວານນີ້ເພື່ອໃຫ້ການສະໜັບສະໜຸນຕໍ່ທ່ານນາງ Clinton ກໍແມ່ນສາມີຂອງທ່ານນາງ ຄືທ່ານ Bill Clinton ທີ່ເຄີຍຮັບໜ້າທີ່ເປັນປະທານາ ທິບໍດີສອງສະໄໝຂອງປະເທດ ໃນຊຸມປີ 1990. ທ່ານໄດ້ກ່າວເຖິງເລື້ອງສ່ວນຕົວຢ່າງລະ ອຽດ ນັບແຕ່ຕອນເລີ້ມຕົ້ນ ເວລາພວກທ່ານໄດ້ພົບພໍ້ກັນໃໝ່ໆ ແລະກໍເລົ່າປະຫວັດການເຮັດວຽກຂອງທ່ານນາງ ໃນຖານະທີ່ເປັນທະນາຍຄວາມ ເປັນສະມາຊິກສະພາສູງ ແລະລັດຖະມົນຕີການຕ່າງປະ ເທດສະຫະລັດ.
"ທ່ານນາງ Hillary ແມ່ນມີຄຸນນະສົມບັດທີ່ເປັນເອກະລັກ ໃນການຍາດເອົາໂອກາດແລະຫລຸດຜ່ອນຄວາມສ່ຽງ ທີ່ພວກເຮົາກຳລັງ ປະເຊີນໜ້າຢູ່ ແລະທ່ານນາງກໍເປັນຜູ້ເຮັດການປ່ຽນແປງທີ່ດີທີ່ສຸດ ເທົ່າທີ່ຂ້າພະເຈົ້າເຄີຍຮູ້ຈັກມາ" ນັ້ນຄືຄຳເວົ້າຂອງທ່ານ Clinton.
ນອກນັ້ນ ອະດີດປະທານາທິບໍດີ Clinton ຍັງໄດ້ກ່າວເຖິງກຸ່ມຕ່າງໆ ທີ່ຖືກໂຈມຕີດ້ວຍຜູ້ ທີ່ຖືກສະເໜີຊື່ແຕ່ງຕັ້ງເປັນຜູຸ້ສະໝັກປະທານາທິບໍດີຂອງພັກຣີພັບບລີກັນທ່ານ Donald Trump.
"ຖ້າທ່ານຮັກປະເທດນີ້ ທ່ານກຳລັງເຮັດວຽກໜັກ ກຳລັງຈາຍພາສີແລະປະຕິບັດຕາມກົດ ໝາຍແລະທ່ານປະສົງຢາກເປັນພົນລະເມືອງ ທ່ານຄວນເລືອກເອົາການປະຕິຮູບລະບົບຄົນເຂົ້າເມືອງ ແທນບຸກຄົນໃດຄົນນຶ່ງທີ່ຕ້ອງການຢາກຈະສົ່ງທ່ານກັບຄືນປະເທດ" ນັ້ນຄືຄຳເວົ້າຂອງທ່ານ Clinton ຖ້າທ່ານເປັນຊາວມຸສລິມແລະຮັກອາເມຣິກາແລະຮັກອິດສະ ຫຼະພາບແລະກຽດຊັງພວກກໍ່ການຮ້າຍຈົ່ງຢູ່ທີ່ນີ້ແລະຊ່ອຍພວກເຮົາເອົາຊະນະແລະສ້າງອະນາຄົດດ້ວຍກັນ."
