ລິ້ງ ສຳຫລັບເຂົ້າຫາ

ຄະນະກູ້ໄພ ສືບຕໍ່ຊອກຫາ ພວກທີ່ອາດລອດຊີວິດມາໄດ້ ຈາກເຫດເຮືອບິນຕົກ ໃນໄຕ້ຫວັນ


ຈຳນວນ​ຜູ້​ເສຍ​ຊີວິດ​ທັງ​ໝົດ ​ໃນ​ເຫດ​ເຮືອບິນໂດຍສານຕົກໃນ
ໄຕ້ຫວັນ ​ແມ່ນ​ເພີ້​ມຂຶ້ນ​ເປັນ 31 ຄົນ​ແລ້ວ ​ໃນ​ວັນ​ພະຫັດ​ ມື້ນີ້
​ໃນ​ຂະນະ​ທີ່ພວກກູ້​ໄພ​ຍັງ​ສືບ​ຕໍ່​ທຳ​ການ​ຊອກ​ຄົ້ນ​ຫາ 12 ຄົນ
ທີ່​ຍັງ​ຫາຍສາບສູນ​ນັ້ນ.

ພາບ​ວີ​ດີ​ໂອທາງ​ອິນ​ເຕີແນັດ ສະ​ແດງ​ໃຫ້​ເຫັນ​ວ່າ ​ເຮືອບິນສອງ
​ໝາກ​ປິ່ນ TranAsia ບໍ່​ເທົ່າ​ໃດ​ນາທີ​ລຸນຫລັງທີ່ໄດ້​ຂຶ້ນ​ຈາກ​ສະ
ໜາມ​ບິນ Songshan ໃນນະຄອນ Taipeiເມື່ອ​ວັນ​ພຸດ​ວານ​ນີ້
ເພື່ອມຸ້ງໜ້າໄປສູ່ໝູ່​ເກາະ Kinmen ທີ່ຢູ່ຫ່າງໄກອອກໄປຂອງ
ໄຕ້ຫວັນ. ປີກ​ຂວາ​ຂອງ​ເຮືອບິນ ເປັນມູມຕັ້ງ​ກັບ​ໜ້າດິນ
​ເບິ່ງ​ເຫັນ​ວ່າ ມັນ​ໄດ້ຕັດ​ຜ່ານ​ໜ້າ​ຖະນົນ​ໃຫຍ່​ທີ່​ຍົກ​ສູງຂຶ້ນມາ ​
ແລະ​ລົດແທັກ​ຊີ ກ່ອນ​ທີ່ຈະ​ຕົກລົງ​ໃສ່​ແມ່ນ້ຳ Keelung. ເຈົ້າໜ້າທີ່ກ່າວວ່າມີ 15 ຄົນ ລອດ​ຊີວິດ​ມາ​ໄດ້ ຮວມທັງ ​ເດັກນ້ອຍ​ຜູ້​ນຶ່ງ​ນຳ.

ທ່ານ Lin Tyh-Ming ຫົວໜ້າ​ກົມ​ການບິນພົນລະເຮືອນ​ໄຕ້​ຫວັນ ​ໄດ້​ກ່າວໃນວັນ​ພະຫັດ​ມື້ນີ້​ວ່າ ການ​ຊອກ​ຄົ້ນ​ຫາ​ບັນດາ​ຜູ້​ໂດຍສານ​ນັ້ນ ຍັງ​ຈະ​ດຳ​ເນີນ​ສືບ​ຕໍ່​ໄປ.

ທ່ານ Lin ກ່າວ​ວ່າ: “​ໃນ​ປະຈຸ​ບັນ​ນີ້ຫົວ​ແລະ​ຫາງ​ຂອງ​ເຮືອບິນ​ໄດ້​ຍົກຂຶ້ນມາຈາກນ້ຳ​ແລ້ວ ເຄື່ອງ ​ຈັກ​ທັງ​ສອງ​ກໍ​ໄດ້​ພົບ​ເຫັນ​ເຊັ່ນ​ກັນ. ພາກສ່ວນ​ປີກ​ຂອງ​ເຮືອບິນ​ ຍັງ​ຈົມ​ຢູ່​ໃນ​ນ້ຳ. ພວກ​ເຮົາ​ບໍ່​ສາມາ​ດດຶງ​ເອົາຊາກ​ຫັກ​ພັງຂອງ​ເຮືອບິນຂຶ້ນ​ມາ​ຈາກ​ນ້ຳ​ໄດ້​ເທື່ອ ​ໃນ​ຂະນະ​ທີ່​ກະແສ​ນ້ຳ​ແມ່ນໄຫຼແຮງ ຫຼາຍ ໃນ​ມື້​ນີ້.”

​ອົງການຂ່າວ Kyodo ຂອງ​ຍີ່​ປຸ່ນ ​ໄດ້​ອ້າງ​ເອົາ​ຄຳ​ເວົ້າ​ຂອງ​ເຈົ້າ​ໜ້າ​ທີ່​ກົມ​ການບິນພົນລະເຮືອນທີ່​ກ່າວ​ ວ່າ ທ່ານ​ສັນນິຖານ​ວ່າ ​ເຮືອບິນ ATR-72 ສອງ​ໝາກ​ປິ່ນນັ້ນ ​ໄດ້​ສູນເສຍ​ຄວາມໄວ ​ໃນຂະນະ​ທີ່​ກຳລັງບິນ​ຂຶ້ນ​ຈາກເດີ່ນ.

​ ເຈົ້າ​ໜ້າ​ທີ່​ກ່າວ​ວ່າ ເຄື່ອງບັນທຶກຂໍ້​ມູນ​ແລະ​ສຽງຂອງເຮືອບິນໄດ້ພົບເຫັນແລ້ວ ແລະ​ກຳລັງ​ຢູ່​ໃນ​ຂັ້ນ​ຕອນ​ການວິເຄາະ​ເຖິງ​ສາ​ເຫດ​ຂອງ​ການ​ຕົກ​ຄັ້ງ​ນີ້ ຊຶ່ງ​ມີ​ຂຶ້ນ​ໃນ​ສະພາວະ​ອາກາດ​ແຈ່ມ​ໃສ​ນັ້ນ.

XS
SM
MD
LG