ລິ້ງ ສຳຫລັບເຂົ້າຫາ

ມີການຕົກລົງ ທີ່ຈະສ້າງ ເຂດອະນຸລັກ ທາງທະເລ ໃຫຍ່ທີ່ສຸດ ຢູ່ຂົ້ວໂລກໃຕ້


ໜ້າຜາທີ່ອ່ວຍໜ້າໃສ່ Landsend ຢູ່ປາກອ່າວ Cape Denison. ຮ່ວມຢູ່ໃນຂໍ້ຕົກລົງອະນຸລັກໃນເຂດທະເລ Ross ທີ່ກວມເອົາຫລາຍກວ່າ 1.55 ລ້ານຕາລາງກິໂລແມັດ.

ໜ້າຜາທີ່ອ່ວຍໜ້າໃສ່ Landsend ຢູ່ປາກອ່າວ Cape Denison. ຮ່ວມຢູ່ໃນຂໍ້ຕົກລົງອະນຸລັກໃນເຂດທະເລ Ross ທີ່ກວມເອົາຫລາຍກວ່າ 1.55 ລ້ານຕາລາງກິໂລແມັດ.

ໄດ້​ມີການບັນລຸ​ຂໍ້​ຕົກລົງ​ຄັ້ງ​ປະຫວັດສາດ ​ເພື່ອ​ສ້າງຕັ້ງ​ເຂດອະ​ນຸລັກທາງ​ທະ​ເລ​ທີ່​ໃຫຍ່​ທີ່​ສຸດຂອງ​ໂລກ​ ຢູ່ຂົ້ວ​ໂລກ​ໃຕ້ຫຼື Antarctica ຫລັງຈາກ​ຫຼາຍ​ປີ​ທີ່​ມີ​ການ​ຂັດ​ແຍ້​ງທາງດ້ານ​ການ​ທູດ​.

ຣັດ​ເຊຍ​ໄດ້​ເລີກ​ລົ້ມການ​ຄັດຄ້ານ​ທີ່​ມີ​ມາ​ເປັນ​ເວລາ​ດົນ​ນານ ຕໍ່​ຂໍ້​ຕົກ​ລົງດັ່ງກ່າວ​ຢູ່​ກອງ​ປະຊຸມ​ປະຈຳ​ປີ ຂອງອົງການ​ອະນຸລັກສິ່ງ​ທີ່​ມີ​ຊີວິດໃນ​ທະເລຢູ່ຂົ້ວ​ໂລກ​ໃຕ້ ຫລື CCAMLR ທີ່ຈັດ​ຂຶ້ນ​ຢູ່​ເມືອງ Hobat ປະ​ເທດ Australia. ຂໍ້​ຕົກລົງນີ້​ໄດ້​ເຊັນ​ໂດຍ 24 ປະ​ເທດສະມາຊິກ ​ແລະ​ສະຫະພາບ​ຢູ​ໂຣບ.

ທ່ານ Evan Bloom ຫົວໜ້າ​ທູດ​ຜູ້ແທນ​ຂອງສະຫະລັດ ຢູ່​ກອງ​ປະຊຸມ​ກ່າວ​ວ່າ “ການ​ຕັດສິນ​ໃຈ​ດັ່ງ​ກ່າວ​ສຳຄັນ​ທີ່​ສຸດ ບໍ່​ພໍ​ພຽງ​ແຕ່ສຳລັບ​ຂົ້ວ​ໂລກ​ໃຕ້ ​ແຕ່ສຳລັບ ຄວາມ​ພະ​ຍາ​ຍາມເພື່ອສົ່ງ​ເສີມໃຫ້​ມີ​ການອະນຸ​ລັກທາງ​ທະ​ເລ​ໃນ​ທົ່ວ​ໂລກ.”

ຂໍ້​ຕົກລົງ​ນີ້ ​ຈະປົກປ້ອງ​ຂົງ​ເຂດ​ ທີ່​ທະ​ເລ Ross ກວມ​ເອົາ​ຫລາຍ​ກວ່າ 1 ລ້ານ​5 ​ແສນ 5 ໝື່ນຕາລາງ​ກິ​ໂລ​ແມັດ ປະມານ​ຂະໜາດ​ຂອງ​ປະ​ເທດ​ອັງກິດ ​ເຢຍຣະມັນ ​ແລະ​ຝັ່ຣງ​ໂຮມ​ເຂົ້າກັນ. ຈະ​ບໍ່​ມີ​ເຂດ​ຫາ​ປາໃນ​ບໍລິ​ເວນ 1 ລ້ານ 1 ​ແສນ 2 ໝື່ນຕາ​ລາງ​ກິ​ໂລ​ແມັດ.

ທະ​ເລ Ross ​ເປັນ​ບ່ອນຢູ່​ຂອງ​ນົກ penguins ​ແມວນໍ້າ ປາ toothfish ຂອງ​ຂົ້ວ​ໂລກໃຕ້ ປາ whales ​ແ​ລະ​ປາ krill ຈຳນວນ​ຫລວງຫຼາຍ ທີ່​ເປັນ​ອາຫານ​ສຳລັບ​ສັດ​ນໍ້າ​ຫລາຍ​ໆ​ຊະ​ນິດ ຊຶ່ງ​ເປັນ​ບ່ອນສຸດ​ທ້າຍ​ແຫ່ງ​ນຶ່ງ ​ຂອງ​ລະບົບທາງ​ທະ​ເລ​ທີ່​ຍັງ​ບໍ່​ມີ​ການ​ລົ​ບກວນ​ເທື່ອ​ຂອງ​ໂລກ.

ອ່ານຂ່າວນີ້ເພີ້ມເປັນພາສາອັງກິດ

XS
SM
MD
LG