ລະເບີດຂະໜາດຮ້າຍແຮງ ໄດ້ແຕກຂຶ້ນຢູ່ຂ້າງນອກທ່າເຮືອໃໝ່ຂອງ Mogadishu ໃນເຊົ້າວັນອາທິດວານນີ້ ສັງຫາຍ ຢ່າງໜ້ອຍ 20 ຄົນ ແລະເຮັດໃຫ້ບາດເຈັບຫຼາຍກວ່າ 10 ຄົນ.
ກຸ່ມຫົວຮຸນແຮງ al-Shabab ໄດ້ອອກມາອ້າງເອົາຄວາມຮັບຜິດຊອບໃນການລະເບີດຄັ້ງນີ້ ຊຶ່ງໄດ້ແຕກຂຶ້ນ ໃນບ່ອນຈອດລົດ ໃກ້ໆທາງເຂົ້າທ່າເຮືອຂອງເມືອງMogadishu ສ້າງຄວາມເສຍຫານຢ່າງໜັກ ໃນບໍລິເວນແຖບນັ້ນ.
ພວກຜູ້ຄົນທີ່ອາໄສຢູ່ໃນເມືອງ Mogadishu ກ່າວວ່າ ການລະເບີດຄັ້ງນີ້ ແມ່ນດັງສະໜັ່ນ ໄປທົ່ວເມືອງ ແລະມີຄວັນດຳກຸ້ມຂຶ້ນສູ່ທ້ອງຟ້າ ທີ່ໄດ້ຖືກນຳເຜີຍແຜ່ທາງສື່ສັງຄົມ. ທ່ານ Abdifitah Omar Halane ໂຄສົກປະຈຳຂົງເຂດ Mogadishu ໄດ້ບອກ VOA ຜະແນກພາສາໂຊມາເລຍວ່າ ພວກທີ່ໄດ້ຮັບເຄາະສ່ວນໃຫຍ່ແມ່ນພົນລະເຮືອນ ຊຶ່ງທ່ານໄດ້ກ່າວວ່່າ “ການລະເບີດທີ່ວ່ານີ້ ແມ່ນໄດ້ເກີດຂຶ້ນໃນຮ້ານກິນດື່ມນ້ອຍໆທີ່ພວກຜູ້ເປັນແມ່ທັງ ຫຼາຍ ເປັນເຈົ້າຂອງ ບ່ອນທີ່ພວກພະນັກງານພາກັນໄປຊື້ອາຫານເຊົ້າ ກ່ອນຈະເຂົ້າ ໄປຍັງທ່າເຮືອເພື່ອໄປເຮັດວຽກ.”
ທ່າກໍ່າປັ່ນ Mogadishu ແມ່ນບໍລິຫານໂດຍ Al – Bayrak ບໍລິສັດເທີກີ ທີ່ມີສັນຍາ 20 ປີ ກັບລັດຖະບານໂຊມາເລຍ ເພື່ອໃຫ້ຍົກລະດັບການບໍລິຫານໃຫ້ດີຂຶ້ນ.
ຍັງບໍ່ທັນເປັນທີ່ຈະແຈ້ງເທື່ອວ່າ ມີຄົນສັນຊາດເທີກີ ໄດ້ຮັບບາດເຈັບຫຼືບໍ່
ປະທານາທິບໍດີ ໂຊມາເລຍ ທ່ານ Sheikh Mohamoud ໄດ້ປະນາມການລະເບີດຄັ້ງນີ້ແລະຮຽກຮ້ອງໃຫ້ກອງກຳລັງຮັກສາຄວາມປອດໄພແລະຊາວໂຊມາເລຍ ປະສານງານຮ່ວມກັນ ເພື່ອກຳຈັດກຸ່ມກໍ່ການຮ້າຍ ຊຶ່ງແນເປົ້າໝາຍໃສ່ພົນລະເຮືອນນັ້ນ.
ອ່ານຂ່າວນີ້ເພີ້ມຕື່ມເປັນພາສາອັງກິດ
