ລິ້ງ ສຳຫລັບເຂົ້າຫາ

ເຂື່ອນແມ່ນໍ້າຂອງ ຈະສົ່ງ ຜົນກະທົບ ຢ່າງໃຫຍ່ຫລວງ ຕໍ່ວິຖີຊີວິດຂອງປະຊາຊົນ (ວີດິໂອ ພາສາລາວ)


ເຂື່ອນໄຟຟ້າພະລັງນໍ້າແຫ່ງນຶ່ງ ທີ່ສ້າງຢູ່ເທິງແນວແມ່ນໍ້າຂອງ ໃນປະເທດລາວ

ເຂື່ອນໄຟຟ້າພະລັງນໍ້າແຫ່ງນຶ່ງ ທີ່ສ້າງຢູ່ເທິງແນວແມ່ນໍ້າຂອງ ໃນປະເທດລາວ

ແມ່ນໍ້າຂອງ ທີ່ມີຄວາມຍາວຫລາຍ​ກ່ວາ 4500 ຫລັກນັ້ນ ເປັນ
ແຫຼ່ງຜະລິດ ປາ ປະມານ 2 ລ້ານ 5 ແສນໂຕນຕໍ່ປີ. ມີປະຊາຊົນ
65 ລ້ານຄົນ ຈາກຫົກປະເທດ ທີ່ເພິ່ງພາອາ​ໄສແມ່ນໍ້າຂອງເປັນ ແຫຼ່ງອາຫານແລະການກະເສດ. ມາບັດນີ້ແມ່ນໍ້າຂອງກໍາລັງຖືກ
ຫັນປ່ຽນໃຫ້ເປັນ ແບດເຕີລີໄຟຟ້າ ແຫ່ງຂົງເຂດເອເຊຍຕາເວັນ
ອອກສຽງໃຕ້ ໂດຍການກໍ່ສ້າງເຂື່ອນພະລັງນໍ້າຈໍານວນ​ຫຼວງຫຼາຍ. ຕາມທີ່ຜູ້ສື່ຂ່າວວີໂອເອພະ​ແນ​ກຂະ​ເໝນ ເຊ ​ໂມ​ນີ ລາຍງານມາ ຈາກພາກເໜືອຂອງກໍາປູເຈຍນັ້ນກໍ​ແມ່ນ​ວ່າ ຊາວ​ກໍາປູ​ເຈຍ​ໃນ​
ເຂດ​ນັ້ນ ພາກັນຢ້ານກົວວ່າ ຈະ​ມີຜົນ​ກະທົບ​ຕໍ່ການດໍາລົງຊີວິດ
ຂອງພວກເຂົາເຈົ້າ ຊຶ່ງທອງປານມີເລຶ່ອງນີ້ມາສະເໜີທ່ານ.

ເບິ່ງວີດິໂອລາຍງານນີ້ ເປັນພາສາລາວ:



ປະຊາຊົນຫຼາຍພັນຄົນໃນແຂວງສະຕຸງເຕັຣງກໍາລັງຈະຖືກບັງຄັບໃຫ້ຍົກຍ້າຍຖິ່ນຢູ່.
ປະຊາຊົນເຫຼົ່ານີ້ໄດ້ຢູ່ອາ​ໄສຢູ່ຕາມລໍາແມ່ນໍ້າເຊສານ ຊຶ່ງ​ເປັນສາຂານຶ່ງຂອງແມ່ນໍ້າ
ຂອງ ​ແລະຈະເປັນບ່ອນກໍ່ສ້າງ ເຂື່ອນໄຟຟ້າພະລັງນໍ້າ ໃນອະນາຄົດ.

ພວກຊາວບ້ານ​ໄດ້ພາກັນປະທ້ວງໂຄງການກໍ່ສ້າງເຂື່ອນດັ່ງກ່າວ ຊຶ່ງ​ເປັນການ​ລົງທຶນ ຮ່ວມກັນ ລະຫວ່າງກໍາປູເຈຍ ຈີນ ແລະຫວຽດນາມ. ມູນຄ່າກໍ່ສ້າງ​ແມ່ນ​ຫຼາຍກວ່າ 780 ລ້ານໂດລາ ສໍາລັບເຂື່ອນໄຟຟ້າ​ ພະລັງ​ແຮງ 400 ເມກະວັດ ທີ່​ຈະ​ສ້າງ​ຂຶ້ນ​ນັ້ນ.

ພວກປະຊາຊົນ ຊຶ່ງສ່ວນໃຫຍ່ແມ່ນພວກຊົນເຜົ່ານ້ອຍ ເວົ້າວ່າ ພວກເຂົາເຈົ້າບໍ່ໄດ້ຮັບ
ການປຶກສາຫາລື ກ່ຽວ​ກັບ​ໂຄງການ​ນີ້​ເລີຍ ແຕ່ກໍຕ້ອງ​ເປັນ​ຜູ້ແບກຫາບຄ່າເສຍຫາຍ.

ຊາວບ້ານ ທ້າວ ຟຸດ ຄູເອັນ ເວົ້າວ່າ: “ຫຼັງຈາກມີ​ການອະນຸມັດ​ໃຫ້​ສ້າງ​ແລ້ວ ພວກ
ປະຊາຊົນ ທີ່ອາ​ໄສຢູ່ຕາມແມ່ນໍ້ານີ້ ກໍເປັນຫວ່ງຫຼາຍກ່ຽວກັບ ການຍົກຍ້າຍໄປ ຢູ່ບ່ອນອື່ນ ພວກເຮົາບໍ່ຢາກຍ້າຍໄປຢູ່ບ່ອນໃໝ່ ເພາະມັນລໍາບາກຫຼາຍ ທີ່ ພວກເຮົາຈະຕ້ອງຕັ້ງຕົ້ນຊີວິດໃໝ່ຢູ່ທີ່ນັ້ນ ຕ້ອງໄດ້ເຮັດ​ນາ​ໃໝ່ ແລະປູກເຂົ້າ ກັນໃໝ່ອີກ.”


ພວກປະທ້ວງຢາກໃຫ້ລັດຖະບານໂຈະການກໍ່ສ້າງນັ້ນໄວ້ກ່ອນ ແລະ​ໃຫ້ສຶກສາເບິ່ງຢ່າງ ລະອຽດຖີ່ຖ້ວນ ກ່ຽວ​ກັບຜົນກະທົບ​ໂດຍ​ເຕັມຂອງເຂື່ອນ ຕໍ່ສະພາບແວດລ້ອມ. ລາຍງານ ສະບັບນຶ່ງໂດຍສະຖາບັນວິທະຍາສາດແຫ່ງຊາດຂອງສະຫະລັດ ກໍໄດ້ຮຽກຮ້ອງໃຫ້ທໍາ ການສັ່ງຊາຕີລາຄາຜົນ​ກະທົບຄືນໃໝ່​ເຊ່ນ​ກັນ. ລາຍ​ງານ​ນີ້ ເຕືອນວ່າການພັດທະນາ ເຂື່ອນດັ່ງກ່າວ ຕາມທີ່ວາງແຜນ​ໃນ​ເຂດ​ອ່າງແມ່ນໍ້າຂອງນັ້ນ ອາດສົ່ງຜົນກະທົບທີ່ສ້າງ ຄວາມຫາຍະນະອັນໃຫຍ່ຫຼວງ ຕໍ່ການ​ສືບ​ພັນ​ຂອງປູປາ ແລະຊີວະນານາພັນ​ໃນແມ່​ນໍ້າ
ຂອງໄດ້.

ບັນດານັກອະນຸລັກສະພາບແວດລ້ອມເວົ້າວ່າ ຜົນກະທົບຈາກເຂື່ອນໃໝ່ໃນປະ​ເທດລາວ ແລະຈີນນັ້ນ ແມ່ນ​ປະກົດ​ໃຫ້ເຫັນ​ຢ່າງ​ແຈ້ງ​ຂາວແລ້ວ ກໍຄືລະດັບນໍ້າຂອງໄດ້ລົດຕໍ່າລົງໄປ
ຢູ່​ໃນກໍາປູ​ເຈຍ. ບາງຄົນກໍບໍ່​ເຊື່ອ​ໃນ​ການຄາດ​ໝາຍຕ່າງໆ ສໍາລັບເຂື່ອນທີ່​ຈະ​ສ້າງ​ໃນກໍາ
ປູເຈຍນັ້ນ ​ເປັນ​ຕົ້ນ​ທ່ານ Meach Mean ຈາກ​ເຄືອ​ຂ່າຍ​ປົກ​ປ້ອງ​ແມ່​ນໍ້າ 3S.

ທ່ານ Meach Mean ເວົ້າວ່າ: “ຖ້າຫາກວ່າລະດັບນໍ້າ ສູງຮອດ 75 ແມັດ ກາຍ
ລະດັບນໍ້າທະເລແລ້ວ ເຂື່ອນ Sesan 2 ​ໃນ​ເຂດ​ລຸ່ມ​ຂອງ​ ແມ່​ນໍ້າເຊສານນີ້
ກໍຈະສາມາດຜະລິດກະແສໄຟຟ້າ​ໄດ້ຮອດ 400 ເມກະວັດແທ້ ແຕ່ຖ້າຫາກວ່າ
ລະດັບນໍ້າຕໍ່າ ຄື​ແບບນີ້ ມັນກໍຈະຜະລິດບໍ່ໄດ້ ຮອດສໍ່ານັ້ນ.”


ບັນດານັກອະນຸລັກສະພາບແວດລ້ອມເຊື່ອວ່າ ສະເພາະເຂື່ອນນີ້ແຫ່ງດຽວ ຈະສົ່ງຜົນກະ
ທົບໃນທາງລົບ ຕໍ່ປະຊາຊົນຫຼາຍເຖິງນຶ່ງແສນຄົນ ບໍ່ແມ່ນກະທົບແຕ່ການຫາປາຂອງ
ພວກເຂົາເຈົ້າເທົ່ານັ້ນ ແຕ່ກະທົບຕໍ່ທັງເຂົ້າ​ແລະ​ພືດ​ຜັກ​ທີ່​ເຂົາ​ເຈົ້າປູກ​ນັ້ນ​ນໍາ. ພວກຊາວ
ບ້ານບໍ່ເຫັນວ່າ ​ເຂື່ອນຈະໃຫ້ປະໂຫຍດທາງເສດຖະກິດແກ່ພວກເຂົາເຈົ້າແຕ່ຢ່າງໃດເລີຍ.

ຊາວນາ Set Kal ເວົ້າວ່າ: “ຜົນປະໂຫຍດໂດຍສ່ວນໃຫຍ່ຈະຕົກເປັນຂອງພວກ
ເຈົ້າ​ນາຍ ຢູ່ໃນເມືອງນັ້ນຫຼາຍກວ່າ ແຕ່ພວກເຮົາຢູ່ນີ້ຈະບໍ່ໄດ້ຫຍັງ ຄື​ເຂື່ອນຈະ
ໃຫ້ຜົນປະໂຫຍດ​ແກ່ພວກຢູ່ໃນເມືອງຫຼາຍກວ່າ ພວກຢູ່ຕາມຊົນນະບົດ.”


ລັດຖະບານເວົ້າວ່າ ບັນຫາເລຶ່ອງສະພາບແວດລ້ອມຈະຖືກແກ້ໄຂ. ຂະນະນີ້ ພວກຄົນງານ
ກໍໄດ້ເລີ່ມຖາກຖາງດິນດອນກັນໄປແລ້ວ.

ພວກປະຊາຊົນຢູ່ທີ່ນີ້ ກໍ​ໄດ້​ແຕ່ຫວັງວ່າ ດວງ​ວິນ​ຍານ​ຂອງບັນພະບຸລຸດຂອງພວກເຂົາເຈົ້າ ​
ຈະໄດ້ຍິນຄໍາບົນບານສານກ່າວ ຂໍຄວາມຊ່ວຍເຫຼືອຂອງ​ພວກເຂົາ​ເຈົ້າ ກ່ອນທີ່ມັນຈະສາຍ
ເກີນໄປ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG