ທ່ານ ບຸນທອງ ຈິດມະນີ ປະທານອົງການກວດກາພັກ ແລະລັດ ໄດ້ແຖງຍອມຮັບໃນ
ໂອກາດການສະເຫຼີມຫຼອງການສ້າງຕັ້ງອົງການກວດກາພັກ-ລັດ ຄົບຮອບ 30 ປີໃນ
ເດືອນກຸມພາ 2012 ນີ້ວ່າ ການໃຊ້ຈ່າຍງົບປະມານຂອງໜ່ວຍງານລັດຖະບານໄດ້
ມີການປະຕິບັດທີ່ບໍ່ເປັນໄປຕາມລະບຽບກົດໝາຍກົດໝາຍ ແລະມີການປະຕິບັດ ໜ້າທີ່ເພື່ອຜົນປະໂຫຍດສ່ວນຕົວ ເກີດຂຶ້ນຢ່າງກວ້າງຂວາງ ຈຶ່ງເຮັດໃຫ້ເກີດການຮົ່ວ
ໄຫຼຂອງງົບປະມານຂອງລັດຖະບານຫຼາຍຂຶ້ນນັບມື້.
ທັງນີ້ ໂດຍຈາກການກວດກາໜ່ວຍງານຂອງລັດຖະບານລາວຈໍານວນ 101 ເປົ້າໝາຍ
ໃນປີ 2011 ທີ່ຜ່ານມາ ກໍພົບວ່າການປະຕິບັດໜ້າທີ່ຂອງພະນັກງານລັດທີ່ບໍ່ເປັນໄປ
ຕາມລະບຽບກົດໝາຍດັ່ງກ່າວໄດ້ເຮັດໃຫ້ງົບປະ ມານຂອງລັດຖະບານເກີດການສູນ
ຫາຍໄປຫຼາຍກວ່າ 259 ຕື້ກີບ ຫຼື 32 ກວ່າລ້ານ ຊຶ່ງຖ້າຫາກສົມທຽບກັບໃນໄລຍະ 5ປີ
ກ່ອນໜ້ານີ້ ກໍເຮັດໃຫ້ສາມາດກ່າວໄດ້ວ່າ ການຮົ່ວໄຫຼ ຫຼື ການສູນຫາຍໄປຂອງງົບປະ
ມານຂອງລັດຖະບານລາວນັ້ນມີລະດັບຄວາມຮຸນແຮງເພີ່ມຂຶ້ນ.
ໂດຍຕໍ່ກໍລະນີດັ່ງກ່າວນີ້ ທ່ານ ບຸນທອງ ກໍໄດ້ຍົກຕົວຢ່າງໃຫ້ເຫັນວ່າໃນຊ່ວງປີ 2011-
2005 ໄດ້ກວດກາພົບວ່າມີການສູນຫາຍຂອງງົບປະມານຂອງລັດຖະບານຄິດເປັນມູນຄ່າ
ຫຼາຍກວ່າ 472 ຕື້ກີບ ກັບ 6.2 ລ້ານບາດ ແລະ $ 21.8 ລ້ານ ສ່ວນໃນຊ່ວງປີ 2006-
2010 ນັ້ນ ການສູນຫາຍຂອງງົບປະມານກໍໄດ້ເພີ່ມຂື້ນຈາກເດີມເກີນກວ່າ 2 ເທົ່າ ແລະ
ເມື່ອຕົກລົງມາເຖິງປີ 2011 ພຽງປີດຽວນັ້ນກໍປະກົດວ່າການສູນຫາຍໄປຂອງງົບປະມານ
ໄດ້ມີມູນຄ່າຫຼາຍກວ່າ 5 ປີ ກ່ອນໜ້ານີ້ແລ້ວ.
ກໍລະນີທີ່ກວດພົບຫລາຍທີ່ສຸດ ກໍ່ຄືການລັກລອບຕັດໄມ້
ເກີນໂຄຕ້າ ຊຶ່ງໃນຕະຫລອດປີທີ່ຜ່ານມາ ກໍປາກົດວ່າສາ
ມາດກວດຢຶດໄມ້ ທີ່ລັກລອບຕັດຢ່າງຜິດກົດໝາຍໄດ້ເຖິງ
65,000 ກວ່າທ່ອນ ຕິດຕາມດ້ວຍການນໍາເຂົ້າຍວດຍານ
ພາຫະນະໂດຍການແຈ້ງວັດຖຸປະສົງທີ່ບໍ່ຈິງເຊັ່ນແຈ້ງວ່າ
ນໍາຍວດຍານພາຫານະເຂົ້າມາໃຊ້ໃນໂຄງການພັດທະນາ
ຕ່າງໆ ເພື່ອໃຫ້ເປັນການຫຼີກລ່ຽງການເສຍພາສີຢ່າງຖືກ
ຕ້ອງຕາມກົດໝາຍ.
ນອກຈາກນັ້ນ ກໍມີການໃຫ້ສໍາປະທານສິດໃນການເຊົ່າທີ່
ດິນເກີນກວ່າພື້ນທີ່ ທີ່ໄດ້ຮັບອະນຸຍາດຈາກລັດຖະບານ
ທີ່ສູນກາງ, ການບໍ່ສົ່ງລາຍຮັບຈາກການຂາຍໄມ້ເຂົ້າຄັງຂອງລັດ ແລະການຫຼີກລ່ຽງການ
ຊໍາລະອາກອນ ແລະຄ່າທໍານຽມຕ່າງໆ ຂອງບັນດາບໍລິສັດເອກກະຊົນໂດຍມີເຈົ້າໜ້າທີ່
ຂອງລັດຖະບານໃຫ້ການຮ່ວມມືດ້ວຍການຍອມຮັບເອົາສິນບົນ ເພື່ອຜົນປະໂຫຍດສ່ວນຕົວ ເປັນຕົ້ນ.
ແຕ່ຢ່າງໃດກໍຕາມ ສະມາຊິກສະພາແຫ່ງຊາດລາວທ່ານນຶ່ງກໍໄດ້ໃຫ້ຄວາມຄິດເຫັນວ່າ ການ
ທີ່ຈະເຮັດໃຫ້ການປະຕິບັດໜ້າທີ່ຂອງອົງການກວດກາພັກ-ລັດມີປະສິດຕິພາບຫຼາຍຂຶ້ນນັ້ນ
ກໍຈຳເປັນທີ່ຈະຕ້ອງມີການກວດສອບການປະຕິບັດງານຂອງບັນດາເຈົ້າໜ້າທີ່ຂອງອົງການ
ກວດກາອີກດ້ວຍ ດັ່ງທີ່ທ່ານໄດ້ເນັ້ນຢໍ້າວ່າ:
“ຜູ້ກວດສອບນີ້ ກໍ່ຕ້ອງກວດ
ກາຄືນຄີກັນ ຄວາມໂປ່ງໃສ
ນີ້ກະຢາກໃຫ້ເບິ່ງຄືກັນ ເດີ້
ນີ້ຜູ້ໄປກວດສອບບໍ່ແມ່ນ
ໄປກວດສອບລ້າໆເດ້ ບໍ່
ແມ່ນເດ້ ພ້ອມກັນນີ້ແລ້ວ
ການໃຊ້ຈ່າຍເດ້ໄປກວດສອບ
ແຕ່ລະບ່ອນໆ ໝົດນ້ອຍ
ຫຼາຍປານໃດມັນຈຶ່ງຈະຮູ້ວ່າ
ຄວາມຮັບຜິດຊອບຂອງເຮົາ
ໃນການປະຕິບັດໜ້າທີ່ນີ້ເດ້
ບາງບ່ອນມັນກະແກ່ຍາວ 2-3 ເດືອນ 6 ເດືອນກໍຍັງບໍ່ແລ້ວ ອັນນີ້ຕ້ອງໄດ້ກວດຄື
ກັນກໍຕ້ອງແຈ້ງຕໍ່ສະພາແຫ່ງຊາດເຊັ່ນດຽວກັນ.”
ກ່ອນໜ້ານີ້ ທ່ານຈູມມະລີ ໄຊຍະສອນ ປະທານປະເທດ ແລະລັດຖະບານລາວທັງຈາກ
ຂັ້ນສູນກາງແລະຂັ້ນແຂວງຈາກທົ່ວປະເທດວ່າມີພະນັກງານຂອງພັກແລະລັດຖະບານ
ຈໍານວນບໍ່ໜ້ອຍທີ່ຍັງປະຕິບັດໜ້າທີ່ໃນຄວາມຮັບຜິດຊອບ ຫຼືວຽກງານ ທີ່ໄດ້ຮັບມອບ
ໝາຍຢ່າງມີປະສິດທິຜົນຕໍ່າ.
