ລິ້ງ ສຳຫລັບເຂົ້າຫາ

ຕຳຫຼວດເດັນມາກ ຍິງຜູ້ຕ້ອງສົງໄສຕາຍ ທີ່ພົວພັນ ນຳການໂຈມຕີ ຢູ່ໂກເປັນເຮເກັນ


ພວກໄວ້ອາໄລນຳ ຜູ້ເຄາະຮ້າຍໃນການໂຈມຕີ ຢືນຢູ່ຕໍ່ໜ້າ ໂບດຊາວຍິວ ຢູ່ຄຸ້ມ Krystalgadeໃນນະຄອນຫລວງ Copenhagen, ວັນທີ 15 ກຸມພາ 2015.

ຕຳຫຼວດເດັນ​ມາກໄດ້ຍິງຊາຍ​ຄົນ​ນຶ່ງ​ຕາຍ ໃນ​ເຊົ້າ​ວັນ​ອາທິດ​ມື້​ນີ້
ທີ່​ເຂົາ​ເຈົ້າກ່າວ​ວ່າ ຜູ້ກ່ຽວໄດ້​ຢູ່​ເບື້ອງ​ຫຼັງ​ຂອງ​ການ​ຍິງ​ໂຈມ​ຕີ​ສອງ​
ບັ້ນ​ໃນ​ວັນ​ເສົາວານ​ນີ້ ​ຢູ່​ນະຄອນຫລວງ Copenhagen ທີ່​ໄດ້
​ສັງຫານພົນລະ​ເຮືອນ​ 2 ຄົນ ​ແລະ​ເຮັດ​ໃຫ້​ເຈົ້າ​ໜ້າ​ທີ່​ຕຳຫຼວດ​ໄດ້​
ຮັບ​ບາດ​ເຈັບ 5 ຄົນ​ນັ້ນ.

ບັນດາ​ເຈົ້າ​ໜ້າ​ທີ່​ກ່າວ​ວ່າ ບໍ່​ມີ​ຫຼັກ​ຖານ​ໃດໆຊີ້​ໃຫ້​ເຫັນ​ວ່າ ​ມີ​ມື​ປືນ
ຄົນອື່ນໆອີກ ​ພົວພັນ​ໃນ​ການ​ຍິງ​ໂຈມ​ຕີ​ດັ່ງກ່າວ ຊຶ່ງ​ການ​ຍິງ​ບັ້ນ
ນຶ່ງ​ໄດ້​ເກີດຂຶ້ນ​ ທີ່​ຮ້ານ​ກິນ​ດື່ມ​ແຫ່ງ​ນຶ່ງ​ທີ່​ຈັດງານພົບປະໂອ້​ລົມ​ກັນ
​ຢ່າງ​ເສລີ ​ແລະ​ການ​ໂຈມ​ຕີ​ອີກ​ບັ້ນ​ນຶ່ງ​ແມ່ນ​ເກີດ​ຂຶ້ນ​ ໃນ​ໂບດ​ສາສະ
ໜາ​ຢີວທີ່ສຳຄັນ​ແຫ່ງ​ນຶ່ງຢູ່​ນອກ​ນະຄອນ Copenhagen.

ນາຍົກລັດຖະມົນຕີ Helle Thorning-Schmidt ​ແຫ່ງ​ເດັນມາກກ່າວໃນວັນອາທິດມື້ນີ້
ວ່າປະຊາຊົນຜູ້ບໍລິສຸດສອງຄົນນັ້ນໄດ້ເສຍຊີວິດໄປຍ້ອນ “ການກໍ່ການຮ້າຍຢ່າງເລືອດ
ເຢັນ ຕໍ່ເດັນມາກ”
ແລະວ່າ ຜູ້ໃດກໍບໍ່ຄວນຖືກປ່ອຍໃຫ້ລອດພົ້ນຈາກກົດໝາຍໄປໄດ້
ຍ້ອນການໂຈມຕີ “ສັງຄົມເດັນມາກ ທີ່ເປີດກ້ວາງ ເສລີ ແລະມີປະຊາທິປະໄຕນັ້ນ”

​ໃນ​ການ​ໂຮມ​ຊຸມນຸມທີ່ຮ້ານອາຫານ​ດັ່ງກ່າວ ​ມີ​ທ່ານ Lars Vilks ນັກ​ແຕ້ມຮູບກາຕູນຊາວ
ສະວີເດນ ໄປຮ່ວມ​ນຳ ທີ່​ຜູ້​ຄົນຮູ້​ຈັກ​ກັນ​ວ່າ​ເປັນຜູ້​ແຕ້ມ​ຮູບກາຕູນ ​ທີ່​ເຍາະ​ເຍີ້​ຍສາສະໜາ
ອິສລາມ ຮວມທັງ​ ​ຮູບກາຕູນ ຂອງ​ສາດສະດາຈານ Muhammad​ ໃນ​ປີ 2007 ທີ່​ມີ​ຕົນ​
ໂຕ​ເປັນໂຕໝາ​ນັ້ນ ​ແຕ່​ຜູ້ກ່ຽວ​ບໍ່​ໄດ້​ຮັບ​ອັນຕະລາຍ​ໃດໆ​.

​ໃນ​ການ​ໂຈມ​ຕີ​ດັ່ງກ່າວ ມື​ປືນ​ທີ່​ໃຊ້​ອາວຸດປືນ​ອັດຕະ​ໂນ​ມັດ ​ໄດ້​ສັງຫານຜູ້​ຄົນ​ນຶ່ງ​ຄົນ ​ແລະ
ຕຳຫຼວດ 3 ຄົນ​ໄດ້​ຮັບ​ບາດ​ເຈັບ. ໃນ​ເຫດການ​ທີ່​ເກີດ​ທີ່ໂບດ​ສາສະໜາ​ຢິວ ​ໃນ​ເວລາ​ບໍ່​ເທົ່າ​ໃດ​ຊົ່ວ​ໂມງ​ຕໍ່ມາ. ຄົນ​ຍາມ​ອາສາ​ສະໝັກ​ຄົນ​ນຶ່ງ ​ໄດ້ເສຍ​ຊີວິດ ​ແລະ​ຕຳຫຼວດ 2 ຄົນ​ໄດ້​ຮັບ​ບາດ​ເຈັບ​. ແຫຼ່ງຂ່າວ​ເວົ້າ​ວ່າ​ຄົນ​ຍາມ​ຄົນ​ນັ້ນ​ເປັນ​ຄົນ​ຢິວ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG