ພວກມີສິດປ່ອນບັດເລືອກຕັ້ງໃນສາທາລະນະປະຊາທິປະໄຕຄອງໂກ ໄດ້ເລິ່ມປ່ອນບັດ
ເລືອກຕັ້ງເອົາປະທານາທິບໍດີແລະສະມາຊິກສະພາ ຫລັງຈາກເຫດການກໍ່ຄວາມຮຸນແຮງ
ແລະການກ່າວຫາຕ່າງໆນາໆ ກ່ຽວກັບການສໍ້ໂກງການເລືອກຕັ້ງ ໄດ້ສ້າງຄວາມມົວ
ໝອງໃຫ້ແກ່ບັນຍາກາດກ່ອນມາເຖິງວັນເລືອກຕັ້ງ ໃນວັນຈັນມື້ນີ້.
ຫົວໜ້າຄະນະກໍາມະການເລືອກຕັ້ງໄດ້ກ່າວເມື່ອວັນອາທິດວານນີ້ວ່າບໍ່ມີຫລັກຖານການ
ສໍ້ໂກງແຕ່ຢ່າງໃດ ຫລັງຈາກມີຜູ້ສະມັກເລືອກຕັ້ງຝ່າຍຄ້ານ ຢ່າງໜ້ອຍຄົນນຶ່ງ ອອກມາ
ກ່າວວ່າ ມີການປອມແປງບັດເລືອກຕັ້ງເພື່ອໃຫ້ຄະແນນແກ່ປະທານາທິບໍດີທີ່ຢູ່ໃນຕໍາແໜ່ງ
ຄືທ່ານ Joseph Kabila ນັ້ນ.
ມີລາຍງານວ່າ ມີຜູ້ເສຍຊີວິດຢ່າງໜ້ອຍສາມຄົນ ໃນໄລຍະກ່ອນການເລືອກຕັ້ງ.
ຕໍາຫລວດທີ່ເມືອງ Lubumbashi ພາກຕາເວັນອອກສຽງໃຕ້ຂອງປະເທດກ່າວວ່າພວກມື
ປືນ ໄດ້ໂຈມຕີແລະຈູດ ລົດເລືອກຕັ້ງສອງຄັນ ໃນຕອນເຊົ້າວັນຈັນມື້ນີ້.
ເທື່ອນີ້ເປັນການເລືອກຕັ້ງທີ່ມີຫລາຍພັກຝ່າຍ ຄັ້ງທີ່ສອງເທົ່ານັ້ນ ນັບຕັ້ງແຕ່ປະເທດໃຫຍ່
ໃນພາກກາງຂອງທະວີບອາຟຣິກາແຫ່ງນີ້ ໄດ້ແຕກສະບັ້ນລົງ ຍ້ອນສົງຄາມສອງຄັ້ງລຸນ
ຫລັງໄດ້ຮັບເອກະລາດແລ້ວ ຊຶ່ງສົງຄາມຄັ້ງສຸດທ້າຍ ໄດ້ຍຸຕິລົງໃນປີ 2003.
ເປັນທີ່ຄາດກັນຢ່າງກວ້າງຂວາງວ່າ ປະທານາທິບໍດີ Kabila ທີ່ສະໝັກເລືອກຕັ້ງອີກນຶ່ງ
ສະໄໝນຶ່ງແຂ່ງກັບພວກສະໝັກຝ່າຍຄ້ານ 10 ຄົນນັ້ນ ຈະຊະນະການເລືອກຕັ້ງຄັ້ງນີ້.
ຜົນການເລືອກຕັ້ງຄາດວ່າຈະປະກາດໃຫ້ຮູ້ວັນທີ 5 ເດືອນທັນວາ ຊຶ່ງເປັນມື້ກ່ອນໝົດ
ສະໄໝການດໍາລົງຕໍາແໜ່ງຊຸດປັດຈຸບັນ ຂອງທ່ານຄາບິລານັ້ນ.
ທ່ານ Kabila ໄດ້ກໍາອໍານາດ ມາຕັ້ງແຕ່ປີ 2001 ເວລາທ່ານເຂົ້າຮັບຕໍາແໜ່ງປະທານາ
ທິບໍດີ ຫລັງຈາກ ທ່ານ Laurent Kabila ພໍ່ຂອງທ່ານຖືກລອບສັງຫານ. ທ່ານຄາບິລາ
ຊະນະການເລືອກຕັ້ງປະທານາທິບໍດີ ໃນປີ 2006.
ຟັງລາຍງານຂ່າວກ່ຽວຂ້ອງກັນເປັນພາສາອັງກິດ
