ລິ້ງ ສຳຫລັບເຂົ້າຫາ

ກອງ​ກຳລັງ ​​ອີຣັກ ເລີ້ມໂຈມຕີ ເມືອງ Fallujah ເພື່ອຍຶດເອົາຄືນ ຈາກກຸ່ມລັດອິສລາມ


ກອງ​ກຳລັງ​ຮັກສາ​ຄວາມ​ປອດ​ໄພ​ຂອງ​ອີຣັກ ໄດ້ເລີ່ມການປະຕິບັດການໃນວັນຈັນມື້ວານນີ້ ເພື່ອຍຶດ​ເອົາເມືອງ Fallujah ຄືນ​ມາຈາກພວກຫົວຮຸນແຮງກຸ່ມລັດອິສລາມ ດ້ວຍການບຸກ​ໂຈມ​ຕີທີ່ໝັ້ນຂອງ​ພວກ​ເຂົາຈາກຫຼາຍທາງ, ອີງຕາມຄຳ​ເວົ້າພວກ​ຜູ້​ບັນຊາ​ການທະຫານ.

VOA ​ໄດ້​ໂອ​ລົມ​ ທາງ​ໂທລະສັບກັບກອງກຳລັ​ງພິ​ເສດຂອງ​ອີຣັກ ​ໃນເຂດ​ແນວ​ໜ້າ ກ່ຽວ​ກັບ​ການ​ໂຈມ​ຕີ​ ​ເມືອງ Fallujah.

“ກອງ​ກຳລັງ​ພິ​ເສດແລະ​ການ​ປະຕິບັດ​ງານ​ພິ​ເສດ​ຂອງອີຣັກ ​ແມ່ນ​ໄດ້​ເລີ່​ມ​ບຸກ​ເຂົ້າ​ໄປ​ໃນ​ເມືອງ​ດັ່ງກ່າວ​ ແລະ​ເລີ່​ມກວດ​ລ້າງ ​ເປັນ​ຄຸ້ມໆ​ໄປ ​ແລະ​ຫລັງ​ຈາກ​ນັ້ນ ກໍ​ມອບ​ເຂດທີ່​ກວດ​ລ້າງ​ແລ້ວໃຫ້​ພວກ​ຕຳຫຼວດ​ ທະຫານ​ແລະ​ພວກ​ອາສາ​ສະໝັກອີຣັກ,​” ຊຶ່ງ​ທ່ານ​ໄດ້​ກ່າວ​ຜ່ານ​ທາງ​ນາຍ​ພາສາ.

ເຊີນຊົມ: ຄວາມເປັນຫວ່ງເປັນໃຍກ່ຽວກັບປະຊາຊົນ ພົນລະເຮືອນ ໃນເມືອງ Fallujah

ພວກ​ອາສາ​ສະໝັກ​ເຫລົ່າ​ນີ້ ​ແມ່ນ​ຖືກ​ເອີ້ນວ່າ ກຸ່ມ Hashd al Shaabi ຊຶ່ງ​ເປັນ​ກຸ່ມທີ່ຢູ່​ພາຍ​ໃຕ້ການ​ຄວບ​ຄຸມ​ຂອງພວກ​ທະຫານ​ Shi’ite ​ເປັນ​ສ່ວນ​ໃຫຍ່.

ພວກ​ທະຫານ​ໄດ້​ກ່າວ​ວ່າ “ທຸກ​ບາດ​ກ້າວ ​ພວກ​ເຮົາ​ນຳ​ເອົາ​ທຸງ​ອີຣັກ ​ໄປ​ປັກ​ໄວ້ ມັນ​ໄດ້​ມີ​ການ​ລົ້ມ​ຫາຍ​ຕາຍ​ຈາກ​ຢ່າງ​ຫຼວງ​ຫຼາຍຊຶ່ງ​ຮວມທັງ​ກອງ​ກຳລັງ​ພິ​ເສດ​ນຳ. ພວກ​ເຂົາ​ເຈົ້າ​ໄດ້​ເສຍ​ຊີວິດ​ຍ້ອນ​ປືນ​ຄົກ​ແລະ​ລະ​ເບີ​ດ. ສົງຄາມ​ທີ່ວ່າ​ນີ້ ​ບໍ່​ແມ່ນ​ສົງຄາມ​ຊຶ່ງໆ​ໜ້າ ​ມັນ​ແມ່ນ​ສົງຄາມ​ແບບ​ປະ​ທະ​ກັນ​ດ້ວຍ​ປືນ​ຄົກ ລະ​ເລີດ​ລົດ ​ແລະ​ພວກ​ມື​ປືນສັງຫານ.”

ທ່ານ​ຍັງ​ໄດ້​ກ່າວ​ວ່າ ພວກ​ນັກ​ລົບ​ຂອງກຸ່ມ IS ​ໄດ້​ຖືກ​ສັງຫານ ​ແຕ່​ວ່າ​ບາງຄົນ​ແມ່ນ​ຖືກ​ຈັບ​ກຸມ​ທີ່​ຍັງ​ມີ​ຊີວິດ ​ແລະ​ໄດ້​ໃຫ້​ຂໍ້​ມູນ​ຕ່າງໆ.

​ໃນ​ຂະນະ​ທີ່​ການ​ໂຈມ​ຕີ ​ໄດ້​ເລີ່​ມຂຶ້ນນັ້ນ ກໍ​ມີ​ຄວາມ​ເປັນ​ຫ່ວງ​ເປັນ​ໃຍ ກ່ຽວ​ກັບ​ປະຊາຊົນ ພົນລະ​ເຮືອນ ທີ່​ຍັງ​ຕົກ​ຄ້າງ​ໃນ​ເມືອງ​ທີ່​ຖືກ​ຍຶດຄອງ​ໂດຍ​ພວກ​ກຸ່ມ​ລັດ​ອິສລາມ.

ເຊີນຊົມ : ຄວາມເປັນຫວ່ງເປັນໃຍ ຈາກອົງການ UNHCR

ທ່ານ Muhamed ທະຫານ​ຈາກ​ກອງ​ກຳລັງ​ພິ​ເສດ​ໃນ​ເຂດ​ແນວ​ໜ້າ ທີ່ໄດ້​ຕິດ​ຕໍ່​ທາງ​ໂທລະ ສັບ​ຫວ່າງ​ມໍ່ໆ​ມາ​ນີ້ ​ຊຶ່ງ​ຊື່​ຈິງ​ຂອງ​ທ່ານ​ນັ້ນ ​ແມ່ນ​ບໍ່​ໄດ້​ຖືກ​ເປີດ​ເຜີຍ ໄດ້ກ່າວ​ວ່າ “ກຸ່ມລັດອິສ- ລາມ ຫຼື ພວກ IS ໄດ້ວາງລະເບີດໄວ້ຢູ່ຕາມຫົນທາງຫຼາຍສາຍ, ພວກເຂົາໃຊ້ພວກລະເບີດ ສະຫຼະຊີບ.”

ເມືອງ Fallujah ທີ່​ໝັ້ນ​ຂອງ​ຊາວ Sunni ​ໄດ້​ຖືກ​ຍຶດຄອງ​ໂດຍ​ກຸ່ມ IS ມາເປັນ​ເວລາ​ນານ​ກວ່າ​ເມືອງ​ອື່ນໆ ​ໃນ​ອີຣັກ ​ແລະ​ເຊື່ອ​ກັນ​ວ່າ ພວກ​ນັບ​ລົບ​ທີ່ຢູ່​ໃນ​ເມືອງ​ນັ້ນ ​ໄດ້​ພາກັນ​ຂຸດ​ຄຸມ ລີ້ຢູ່​ໃນ​ເມືອງ​ດັ່ງກ່າວ.

ກະລຸນາ​ອ່ານ​ຂ່າວ​ນີ້​ເພີ້​ມຕື່ມ​ເປັນ​ພາສາ​ອັງກິດ

XS
SM
MD
LG